ISAIA 65 - Tuvalu Revised Bible

Ko Fakasala ne te Atua a Tino Teke

1 Loma 10.20 Ne faipati mai te Aliki penei, “Au ko toka o tali atu a talosaga a tino o toku fenua, ka ko latou ne seki talo mai ki a au. Ko talia ne au ke maua au ne latou, ka ko latou e seki taumafai o sala mai au. A toku fenua e seki talo mai eiloa ki a au, kae tela la, au e toka faeloa o tali atu ki a latou penei, ‘Tenei au; ka fesoasoani atu au ki a koutou.’

2Loma 10.21 Au ne toka faeloa o talia mai toku fenua, kola e fai faeloa ne latou a mea se tonu kae fai eiloa a mea e ma'nako latou ki ei,

3E tumau faeloa te lotou faka'itaita mai ki a au, kae se mafai o tae'ma. E ofo atu ne latou a taulaga fapaupau i fatoaga tapu kae sunu mea manogi i luga i fata-fai-taulaga fapaupau.

4I po, ko olo ei ki ana mo tugamau o faipati ki agaga o tino mate. E kai ki kano o puaka kae inu ki te kava tela e faite mai i kano manu kola e ofo ne latou mo fai olotou taulaga fapaupau.

5Tena la, ko fai ake ei latou ki nisi tino penei, ‘Fakamao keatea mai i a matou; e se tau mo koutou o patele mai ki a matou i a matou ko 'to 'malu!’ E se mafai ne au o talia ne vaega tino pena — a toku kaitaua ki tino pena e pela eiloa me se afi tela e se mafai o mate.

6“Ko oti ne iku i a au a te fakasalaga ka fakaoko ki a latou, a te lotou ikuga ko oti ne tusi ki lalo. Ka se toe fakapuli ne au a te mea ne fai ne latou, ka taui atu eiloa ne au ki a latou

7e tusa eiloa mo olotou agasala ne fai, pela foki agasala a olotou tupuga. Ne sunu mea manogi i koga tapuaki fapaupau i luga i mauga foliki kae faipati foki ki muna masei e uiga ki a au. Tela la, ka fakasala ne au latou e pela eiloa mo uiga se lei o latou i taimi ko teka.”

8Muna a te Aliki, “E seai se tino e fakamasei ne ia a fuagavine lei; e fakaaoga ne ia mo fai te uaina. E pena foki taku faiga ki oku tino, e se ta fakapalele katoa ne au — ka faka'sao ne au a latou kola e tavini mai ki a au.

9Ka fakamanuia ne au a tino Isalaelu i te matakaiga o Iuta, a tino i te gafa o latou ka puke mo latou a toku fenua maugā. A oku tino filifilia, kola e tavini mai ki a au, ka nofo i kona.

10Iosu 7.24-26 Ka tapuaki mai latou ki a au kae ka ave olotou mamoe mo pulumakau ke kaikai i te mouku i te koga laugatasi o Salona i te togala, pela foki i te Vanu o Fakalavelave i te saegala.

11“Ka ko koutou kola e se saga mai ki a au, kola e se saga ki a Siona, toku mauga tapu, kae e tapuaki ki atua fapaupau ko Kato mo Meni.

12A te ikuga o koutou, ka 'mate i se mate fi'ta, me i a koutou e seki tali mai i taku kalagaatuga, e seki fakalogo mai foki koutou i taku faipatiatuga. Ne filifili eiloa koutou o se fakalogo mai ki a au kae fai a amioga se lei.

13Tela la, au e fai atu me i tino kola e tapuaki kae fakalogo mai ki a au ka uke olotou meakai mo meainu, ka ko koutou ka fia'kai kae fiainu. Ka fiafia latou, ka ko koutou ka fakamasiasigina.

14Ka usu pese latou mo te fiafia, ka ko koutou ka tagi i te fanoanoa.

15A oku tino filifilia ka fakaaoga ne latou a te igoa o koutou e pela me se muna fakamalaia. Ko au, te Aliki Sili, ka tamate ne au koutou. Ka ko latou kola e fakalogo mai ki a au, ka avatu ne au se igoa fou mō latou.

16So se tino i te fenua tela e manako ki se fakamanuiaga ka fakatagi atu ki te Atua Fakamaoni ke fakamanuia mai a ia. So se tino e tauto, e tauto i te igoa o te Atua Fakamaoni. A fakalavelave o aso ko teka ka galo atu ko se toe manatua eiloa.”

Ko te Toe Faitega Fou

17 Isa 66.22; 2Pete 3.13; Faka 21.1 Muna a te Aliki, “Ko toe faite nei ne au se lalolagi fou mo ne lagi fou. A mea ne tupu i aso ko teka ka se toe manatua eiloa.

18Ke lifu kae fiafia koutou ki te se gata mai i mea ne faite ne au. A te Ielusalema fou tenei ka faite ne au ka fonu i te fiafia, mo tino i ei ka fiafia katoa.

19Faka 21.4 Au foki ka fonu i te fiafia ona ko Ielusalema mo tino i ei. Ka se toe ai ne tino e tagi fanoanoa, se toe ai se kalaga mō se fesoasoani.

20A tamaliki ka se toe 'mate foliki, a tino katoa ka ola eiloa ki te gataga o te olaga o te tagata. A latou kola ko oko ki te taki selau e fai pela me koi foliki fua. A tino e mate kae seki oko ki te taki selau e fakaasi ei i a latou e fakasala ne au.

21-22A tino ka faite olotou fale ko nofo ei i ei—ka se toe fakaaoga eiloa ne tino fakaatea. Ka toki olotou togāvine kae inu fiafia i te uaina mai i olotou togāvine kona, ka se toe inu ne nisi tino fakaatea. A oku tino ka ola leva pela me ne lakau. Ka fakaoga faka'lei eiloa ne latou mo te fiafia a fua o olotou galuega.

23A te galuega e fai ne latou ka iku manuia, ka ko olotou tamaliki ka se toe fetaui mo ne puapuaga. Ka fakamanuia ne au a latou pela foki a tino e tupu mai i a latou, i taimi katoa konei mai i mua.

24Koi tuai o oti a talosaga a latou ki a au, ka ko leva ne tali atu au ki a latou:

25Isa 11.6-9 A kuli vao mo tama mamoe ka kai fakatasi; a leona ka kai ki kausaito e pela mo pulumakau, ka ko gata ka se toe fakama'taku. Ka se toe ai se mea fakama'taku io me masei i luga i Siona, toku mauga tapu.