1Konei a feitu taua o te feagaiga tela ne fakatonu ne te Aliki ki a Mose ke fai mo tino Isalaelu i te fenua o Moapi; a mea katoa kona e fakaopoopo ki te feagaiga tela ne fai ne te Aliki mo latou i te Mauga o Sinai.
2Ne fakamaopoopo ne Mose a tino Isalaelu katoa, kae fai atu ki a latou penei, “Ne lavea fakalei eiloa ne koutou a te mea ne fai ne te Aliki ki te tupu o Aikupito mo ana tino maluga, pela foki ki te fenua katoa.
3Ne lavea ne koutou a mala fakamataku, mo vavega, mo mea fakaofoofogia kola ne fai ne te Aliki.
4Ke oko mai eiloa ki te aso nei, e seki fai eiloa ne ia koutou ke malamalama i mea kona ne tupu ki a koutou.
5E fasefulu tausaga ne taki sale ei ne te Aliki a koutou i loto i te vao, ka ko otou gatu mo taka e seki masei eiloa.
6E seki ai ne falaoa mo otou kai, io me ne uaina mo pia mo otou inu, ka ko te Aliki ne avatu eiloa ne ia a mea e manako koutou ki ei, ko te mea ke fakaasi atu ne ia ki a koutou i a ia ko te otou Atua.
7Nume 21.21-30; Nume 21.31-35 I te okomaiga o tatou ki te koga tenei, kae o'mai a te Tupu o Hesepono ko Sekono, mo te Tupu o Pasana ko Oko o taua mai ki a tatou, kae ne fakatakavale ne tatou.
8Nume 32.33 Ne fao ne tatou te lotou laukele o vaevae ma matakaiga o Leupena, Kato mo te sua afā o te matakaiga o Manase.
9Tausi fakamaoni ki muna o te feagaiga tenei, ko te mea ke manuia koutou i otou mea e fai.
10“I te aso nei, a koutou katoa ko tu nei i mua o te Aliki te otou Atua, koutou katoa — otou takitaki mo ofisa, otou tagata,
11fafine mo tamaliki, mo tino fakaatea kona e nofo tasi koutou, kona e galue mo koutou, i te katiga o fafie mo te taliga o vai.
12A koutou ne o'mai ki konei ke kau fakatasi koutou i te feagaiga tenei ko fai ne te Aliki te otou Atua mo koutou, kae talia foki ne koutou a fakatonuga o te feagaiga,
13ko te mea ke na fakamautakitaki nei ne te Aliki i a koutou ko ona tino ka ko ia ko te otou Atua, e pela mo tena tautoga ki a koutou mo otou tupuga ko Apelaamo, Isaako mo Iakopo.
14E se ko koutou fua konei e fai ki ei te feagaiga a te Aliki.
15A te feagaiga tenei e fai ne ia mo tatou katoa konei e tu i konei, i ona mua i te aso nei, pela foki ki tino i otou gafa kola e seki fanau mai.
16“E masaua ne koutou te olaga ne ola ei koutou i Aikupito mo te olaga i te oloolo sale i loto i laukele o nisi malo.
17Ne lavea ne koutou olotou tupua masei kola ne faite ki lakau, fatu, siliva mo aulo.
18Epe 12.15 Masaua ke mo a se tagata, se fafine, se kaiga io me se matakaiga konei e tu mai i konei i te aso nei, e fulitua atu ki te Aliki te tou Atua o tapuaki atu ki atua o nisi malo. A te mea tena ka pela me se aka ne tupu ake, ko fai mo lakau 'kona kae poisini.
19Masaua ke mo a se tino i a koutou konei ne lagona a muna malu konei, kae mafaufau pela me e seai se mea e mafai o tupu ki a ia manafai e makeke tena loto o fai a mea e loto a ia ki ei. A te manatu tena e ana fakamalaiagina koutou katoa, tino lei mo tino masei fakatasi.
20Ka se mafai ne te Aliki o fakamagalo se tagata pena. Ka aumai ne te Aliki te afi o tena kaitaua o sunu te tagata tena; ka aumai foki ne ia a mala katoa konei e tusi i te tusi tenei ki luga i te tagata tena, ke oko eiloa ki te taimi e ta fakapalele ei a ia ne te Aliki.
21Ka fai a ia ne te Aliki mo akoakoga ki matakaiga katoa o Isalaelu, kae ka aumai ne ia a mala ki luga i a ia, e pela mo mala kola e tusi i te fakasologa o fakamalaiaga i te feagaiga, tenei e tusi i te tusi tenei o akoakoga a te Aliki.
22“I tupulaga fakamuli, ka lavea ne tino i otou gafa mo tino fakaatea mai i fenua mao a mala mo puapuaga kola ne aumai ne te Aliki ki te otou fenua.
23Kene 19.24,25 A fatoaga ka mate valevale, kae e fonu i teio mo masima; e seai se lakau e mafai o toki i ei, ke oko foki eiloa ki mouku ka se ola i ei. A te otou fenua ka pela mo fa'kai o Sotoma mo Komolo, pela mo Atama mo Sepoima, kola ne fakamasei ne te Aliki i tena kaitaua malosi.
24Ka fesili te lalolagi penei, ‘Ai a ne fai ei ne te Aliki te mea tena ki te lotou fenua? Se a te pogai ne kaitaua ei penei te Aliki?’
25Ka ko te tali e penei, ‘Me ne ofa ne latou te feagaiga a latou mo te lotou Aliki te Atua o olotou tupuga, i te taimi ne aumai ei ne ia latou mai Aikupito.
26Ne tavini latou ki nisi atua kola e seki tapuaki eiloa latou ki ei i aso mua, ko atua kona kola ne fakatapu ne te Aliki a latou o tapuaki ki ei.
27Tena la, ne kaitaua te Aliki ki ana tino kae aumai ne ia a mala katoa konei e tusi i te tusi tenei ki luga i te lotou fenua.
28Ne kaitaua malosi te Aliki, tena ne unu ei ne ia latou pela me ne lakau mai i te lotou fenua, kae pei ne ia latou ki se fenua fakaatea, kae kona e nofo mai eiloa i ei ke oko mai ki aso nei.’
29“E isi ne mea funa e seki fakaasi mai ne te Aliki te tou Atua; kae ko oti ne fakaasi mai ana Tulafono, kae e tau mo tatou mo tino i 'tou gafa o tausi ki ei ki te se gata mai.
Who We AreWhat We EelieveWhat We Do
2025 by iamachristian.org,Inc All rights reserved.
