1I te otiga ne puke ne te kau Filisitia a te Pusa o te Feagaiga, ne ave ne latou mai Epenesa ki te fa'kai o latou ko Asetota,
2avatu eiloa ne latou ki loto i te faletapu o te lotou atua ko Takono, fakatu ei ne latou i tafa o te fakatusa o Takono.
3I te tafataeao o te sua aso, ne maua atu ne tino Asetota a te fakatusa o Takono e siga fakasaga ki lalo i mua o te Pusa o te Feagaiga a te Aliki. Tena, ne toe fakatu aka ei ne latou ki tena koga.
4I te tafataeao o te sua aso, toe maua atu foki ne latou e siga i mua o te Pusa o te Feagaiga. I te taimi tena, ko 'to keatea ona lima mo tena ulu, kae e takato i te mata o te mataloa; ko te foitino fua e toe mai.
5Tena te mea, i aso nei, a faitaulaga a te atua ko Takono mo tino katoa e tapuaki ki ei i Asetota, e se mafai o sasale i luga i te koga tena, kae e 'maga sale fua i luga i ei.
6Ne fakasala fakamasei ne te Aliki a tino Asetota, kae fakamatakutaku ne ia latou. Ne fakasala ne ia a tino i te koga fenua tena ki mea faka'fua.
7I te laveaga ne latou te mea tena e tupu olotou muna, “A tatou mo te 'tou atua ko Takono ko fakasala ne te Atua o Isalaelu. Ko se tau nei o tuku fakalevaleva a te pusa o te Feagaiga i konei.”
8Tena ne maopoopo aka ei te tokolima tupu o Filisitia, kae ne fesili atu a tino i kona ki a latou penei, “Se a te mea ka fai ne tatou ki te Pusa o te Feagaiga a te Atua o Isalaelu?”
Ne tali mai latou penei, “Puke o ave ki Kata,” tena ne avatu ei ne latou ki Kata, se fa'kai foki o te kau Filisitia.
9Kae i te taimi ne oko atu ei ki te fa'kai tena, ne fakasala foki ne te Aliki a tino i te fa'kai tena, kae fai latou ke tele valevale i te ma'taku. Ne fakasala ne te Aliki latou ki mea faka'fua, kola ne maua i tino katoa o te fa'kai mai tamaliki foliki ke oko eiloa ki toeaina.
10Ne toe avatu ne latou te Pusa o te Feagaiga ki te sua fa'kai o Filisitia ko Ekelona, kae i te okoatuga ki kona, ne kalaga katoa a tino i kona penei, “Ko aumai ne latou te Pusa o te Feagaiga a te Atua o Isalaelu ki konei, ke tamate ne ia tatou!”
11Tena ne toe uga atu te lotou fekau ke maopoopo mai te tokolima tupu, kae fai atu ki a latou penei, “A te Pusa o te Feagaiga ke na fakafoki atu ki Isalaelu, ke se toe 'ta ne ia matou mo motou kaiga.” A tino katoa i te fa'kai ko oko eiloa i te ma'taku me ko fakasala latou ne te Atua.
12A tino kola e seki mate ne olo aka foki a mea fakafua i ei; kae ne tagi latou ki olotou atua mo se fesoasoani.
Who We AreWhat We EelieveWhat We Do
2025 by iamachristian.org,Inc All rights reserved.
