NUMELA 5 - Tuvalu Revised Bible

Ko Tino Lailai

1Muna a te Aliki ki a Mose,

2“Fakatonu atu ki tino Isalaelu ke ave keatea mai loto i te fa'kai a tino kola e maua ne te lepela, mo tino kola e isi se sua e vau mai loto i olotou foitino, pela foki mo tino ne pa'tele ki foitino o tino mate.

3Ave katoa a tino lailai konei keatea mai te fa'kai, ke mo a e fakalailai ne latou te koga e nofo fakatasi ei au mo oku tino.”

4Tena, ne fai eiloa ne tino Isalaelu a te fakatonuga tena.

Ko te Toe Togiga o Mea 'Se ne Fai

5 Levi 6.1-7 Ne tuku mai ne te Aliki ki a Mose

6a fakatonuga konei mo tino Isalaelu. Kafai se tino ko se fakamaoni ki te Aliki kae fai ne ia se mea 'se ki te sua tino,

7e tau mo ia o fakaasi tena agasala, kae togi katoa ne ia te aofaki, e tusa mo tena mea 'se ne fai ki te tagata ne 'se a ia ki ei, fakaopoopo ki ei mo te luasefulu pasene.

8Kae kafai ko oti ne mate te tagata tela ne fai te 'se ki ei, kae e seai se kaiga pili o ia ke togi ki ei te togi o te agasala, ko tena uiga, ko tau o tuku atu ki te Aliki kae puke ma te faitaulaga. A te aofaki tena e fakaopoopo ki te mamoe tagata tela e masani o fakaaoga i te sauniga o te faka'maga o te tagata agasala.

9A lafoga e aumai ne tino Isalaelu ki te Aliki e puke ma te faitaulaga tela ne avatu ki ei a mea kona.

10A faitaulaga taki tokotasi e puke eiloa ne latou ma latou a taulaga kola e avatu ki a latou.

Ko Faiga ki Fafine kola e Masalosalo Olotou Avaga

11Ne fakatonu mai te Aliki ki a Mose,

12ke tuku atu a fakatonuga konei ki tino Isalaelu: Kafai se tagata e masalosalo i tena avaga ko se fakamaoni atu ki a ia,

13me ko oti ne moe fakatauavaga mo te sua tino, kae e se mautinoa tonu ne ia, me e seai se molimau; io me kafai foki te tagata tena e masalosalo i tena avaga, kae tela la, e seai eiloa se agasala a tena avaga ne fai,

14kafai e oko te loto masalosalo ki ia, tela ko masalosalo ei a ia ki tena avaga, ko tena uiga ko fakamasei ne ia tena avaga, io me kafai e vau te loto masalosalo ki a ia, kae ko masalosalo a ia ki tena avaga, kae tela la e 'ma faeloa tena avaga;

15ko tau ei o ave ne ia te fafine ki te faitaulaga. E tau o aumai ne te tagata tenei e tasi te kilokalame o falaoa ne faite mai kalite, kae e se tau o ligi ne ia ne sinu olive ki ei io me ne mea faka'manogi, me i te mea tenei se taulaga mai te tagata masalosalo e fai ei ke sae mai te mea tonu.

16Ka aumai ne te faitaulaga a te fafine o fakatu i mua o te fata-fai-taulaga.

17Ka ligi ne te faitaulaga ne mu vai tapu ki loto i se pola fatu kae tuku atu ne ia ki loto i ei ne one mai te fola o te Faleie o te Aliki, ke fakakona ei te vai.

18Ka oti, ko tala ei ne ia a laulu o te fafine kae tuku atu ki ona lima a te taulaga falaoa. Ka ko te faitaulaga e puke i ona lima a te pola tela e fonu i te vai kona, tela e aumai ne ia te malaia.

19Tena, ka fai ei ne te faitaulaga a te fafine ke talia ne ia a te tautoga tela ka faipati mai ne te faitaulaga: “Kafai e seki mulilua koe, ko tena uiga ka se oko atu ki a koe a te mala tenei e aumai ne te vai tenei.

20Kae kafai ne mulilua eiloa koe,

21ko te Aliki ke fai ne ia tou igoa mo mala i tou fenua. A te Aliki ke fakamalaia ne ia ou koga tapu ke kutu ki lalo, ka ko tou tinae ke fete ki luga.

22A te vai tenei ke ulu ki loto i tou tinae kae fai ne ia ke fete, mo ou koga tapu foki ke kutu.”

A te tali a te fafine e fai penei, “Ko talia ne au; ke fai eiloa pena ne te Aliki.”

23Tena, ka tusi ki lalo ne te faitaulaga a pati fakamalaia kona, ko ufi ei ne ia o mulu keatea i loto i te pola tela e tuku ei a te vai kona.

24Kae koi tuai o fainu ne te faitaulaga a te fafine ki te vai kona, tela ka fakamae ne ia te fafine manafai ne agasala,

25e tau mua o puke mai ne ia a te taulaga falaoa mai i lima o te fafine, o fakatapu ki te Aliki i luga i te fata-fai-taulaga.

26Ka oti ko aku fakafonu ne ia a tena lima i te taulaga tena, ko sunu ei i luga i te fata-fai-taulaga, e fai mo sui o te taulaga katoa. Ka oti, ko fainu ei ne ia a te fafine ki te vai tena.

27Kafai ne mulilua a te fafine tena, tena tinae ka fete mo ana koga tapu ka kutu ki lalo. A tena igoa ka fai mo igoa malaia i tena fenua.

28Kae kafai e seki agasala a ia, ka seai eiloa se mea e tupu ki a ia; kae ka fanafanau eiloa a ia.

29Tenei te tulafono e uiga ki sala o te masalosalo, kafai se fafine avaga tela e nofo i lalo o te pulega a tena avaga, ko mulilua mo te sua tagata a ia ko agasala.

30Io, manafai te agaga o te masalosalo ko oko ki te tagata tena tela ko masalosalo ki tena avaga; tena la ko ave ei ne ia a tena avaga i mua o te Aliki, ka ko te faitaulaga ka fai ne ia a te sauniga tena.

31A te tagata avaga tena e seai sena 'se i te agasala, ka ko te fafine, kafai ne agasala, ka maua eiloa ne ia a te ikuga o tena agasala.