1 TUPU 15 - Tuvalu Revised Bible

9I te luasefulu o tausaga o te nofoaiga a Ielopoamo i Isalaelu, ne fai ei a Asa mo tupu o Iuta kae ne fai a ia mo tupu i Ielusalema i tausaga e fasefulu tasi.

10A tena tupuna fafine, ko Maaka, te tama fafine a Apisaloma.

11A Asa ne fakafiafia ne ia te Aliki i ana mea ne fai, e pela eiloa mo tena tupuga ko Tavita.

12Ne afuli ne ia keatea mai te fenua a tagata tali fafine mo fafine tali tagata katoa kola e tavini i koga tapuaki fapau'pau, kae ne ave keatea foki ne ia a tupua kola ne faite ne tupu i ona mua.

13Ne ave keatea foki ne ia tena tupuna fafine ko Maaka mai tena tulaga ko te tupu fafine, me ne faite ne ia se fakatusa tupua o te atua fafine ko Asaila. Ne ofa ne Asa te tupua tena kae ave o sunu i te vanu o Kitilona.

14E ui eiloa e seki fakamasei ne Asa a koga tapuaki fapaupau katoa, ka ko ia ne tumau eiloa tena fakamaoni ki te Aliki i tena olaga kātoa.

15Ne tuku ne ia i te Faletapu a mea katoa kola ko oti ne fakatapu ne tena tamana mō te Atua, e pela foki mo aulo mo siliva kola ne fakatapu eiloa ne ia.

16A te Tupu o Iuta ko Asa mo te Tupu o Isalaelu ko Paasa, e taua faeloa i aso kona ne fai ei laua mo tupu o malo kona.

17A Paasa ne taua atu ki Iuta, kae ne toe faite ne ia a te fa'kai o Lama ko te mea ke pono ei a auala ki loto mo auala ki tua mai i Iuta.

18Tena ne puke aka ei ne Asa a siliva mo aulo katoa i loto i te Faletapu mo te palesi, kae tuku ne ia ki ana ofisa ke olo o ave ki Tamaseko, ki te Tupu o Sulia ko Peniata, te tama tagata a Tapilimoni, kae ko te mokopuna o Hesioni, mo te fekau tenei:

19“E talia ne koe ke taugasoa taua, e pela mo ta tamana. A siliva mo aulo kona, ko taku meaalofa ki a koe. Fakagata tou va fakataugasoa mo te Tupu ko Paasa o Isalaelu, ko te mea ke na olo keatea tena kautau mai i toku laukele.”

20Ne talia ne te Tupu ko Peniata te manako o Asa, tena ne uga atu ei ne ia ana ofisa mo olotou kautau ke olo o taua ki fa'kai o Isalaelu. Ne fakatakavale ne latou a kogā koga konei: ko Itioni, ko Tanu, ko Apelu Peta Maaka, ko te laukele i tafa o te Vai o Kalilaia, mo te kogā laukele katoa o Nafatali.

21I te logoga o te Tupu ko Paasa i te mea ko tupu, ne fakagata ei tena galuega ki te faitega o te olo o Lama, kae fanatu ei ki Tilesa.

22Tena, ne fakasalalau atu ei te fakatonuga a te Tupu ko Asa i luga i Iuta kātoa ki tino katoa ke olo o tali keatea mai i Lama a fatu mo laupapa kola ne fakaaoga ne Paasa mo faite te olo o Lama. Ne fakaaoga ne Asa a mea kona o faite ei a olo o te fa'kai o Mesepa mo Kepa, se fa'kai i te kogā laukele o Peniamina.