IOSUA 11 - Tuvalu Revised Bible

Ko Fakatakavale ne Iosua a Iapino mo Ana Taugasoa

1I te Iogoga o te Tupu o Hasola ko Iapino i te manumalo o Isalaelu, ne ave ei tena fekau ki te Tupu o Matoni ko Iopapu, ki tupu o Similona mo Akasafo,

2pela foki ki tupu i te fenua mauga i matu, mo tupu i te Vanu o Iolitana i te feitu ki saute o te Vai o Kalilaia, mo tupu o fa'kai i lalo o mauga, mo tupu o fa'kai i te matafaga, e pili ki Toa.

3Ne ave foki tena fekau ki tino Kanana i feitu e lua o te Iolitana, ki tino Amoli, tino Heti, tino Pelise, mo tino lepuse i te fenua maugā, e pela foki mo tino Hivi kola e nofo i lalo o te Mauga o Helemoni i te fenua o Mesepa.

4Ne o'mai katoa latou kona mo olotou kautau ko pela eiloa mo one o te matafaga i te tokouke. E uke foki olotou kaliota mo solofanua.

5Ne kau fakatasi a tupu katoa kona, tela ne olo atu ei o faka'tu olotou faleie i te vai o Meloma, o fakatoka o taua ki tino Isalaelu.

6Muna a te Aliki ki a Iosua, “Sa mataku i a latou. I te taimi penei ma taeao, ka ko palele latou ne ta ne au. A te mea ka fai ne koutou ko te fakaseaogaga o olotou solofanua kae sunu olotou kaliota.”

7Tena ne olo fakapulele atu ei a Iosua mo te kautau katoa o taua atu ki a latou i te vai o Meloma.

8Ne fai ne te Aliki a Isalaelu ke manumalo tena ne afuli atu eiloa latou ke oko ki Miselefota Maima mo Saitonu i matu, kae ki te feitu ki te saegala o te Vanu o Mesepa. Ne taua eiloa te kautau, ke oko eiloa ki te taimi ko seai ei se tino o te fili e toe.

9Tena, ne fai ei ne Iosua te mea tela ne fakatonu atu ne te Aliki: ne fakaseaoga ne ia olotou solofanua kae sunu olotou kaliota.

10Ne foki atu ei Iosua mo tena kau, puke a te fa'kai o Hasola kae tamate tena tupu. I te taimi tena, a Hasola ko te toe malo malosi eiloa i malo katoa i kona.

11Ne tamate ne latou a tino katoa i kona, e seai eiloa se tino ne fakasao, kae sunu foki ne latou te fa'kai.

12Ne fakatakavale ne Iosua a fa'kai katoa konei mo olotou tupu, kae tamate a tino katoa i ei, e pela eiloa mo te fakatonuga a Mose, te tavini a te Atua.

13Ne seki sunu ne tino Isalaelu a fa'kai kola e faite i luga i koga malugaluga, na ko Hasola fua, tela ne sunu ne Iosua.

14Ne puke ne tino Isalaelu ma latou a pulumakau mo mea taua i fa'kai kona, ka ko tino ne tamate katoa ne latou, seai se tino ne fakasao.

15A te Aliki ne tuku ana fakatonuga ki tena tavini ko Mose, kae ne toetuku atu ne Mose ki a Iosua, kae ne fakataunu ne Iosua. Ne fai katoa ne ia a mea ne fakatonu mai ne te Aliki ki a Mose.

Ko te kogā Fenua ne Puke ne Iosua

16Ne fakatakavale ne Iosua te fenua katoa — ko fenua i mauga mo fenua i lalo o mauga, i matu mo saute, ko te kogā fenua katoa o Kosena, mo te fenua vela i tena feitu ki saute, pela foki te Vanu o Iolitana.

17-18A te kogā fenua tena e vau mai te Mauga o Halaka i saute, pili ki Etoma, ke oko ki Paalakato i matu, i te Vanu o Lepanona i te feitu ki saute o te Mauga o Helemoni. E tai leva eiloa te tauaga a Iosua mo tupu o te koga fenua tenei, kae ne fakatakavale eiloa ne ia latou, tamate katoa ei ne ia.

19E tasi eiloa te fa'kai ne fakataugasoa mo Isalaelu, ko Kipeona, tela e isi ne tino Hivi e nofo i ei. A nisi fa'kai katoa ne puke i te taua.

20Teu 7.16 Ne fai ne te Aliki a tino kona ke fia taua ki tino Isalaelu, ko te mea ke ta fakapalele eiloa latou. Tena te mea ne fakatonu ne te Aliki ki a Mose.

21I te taimi tenei, a Iosua ne fano o 'ta fakapalele a te gafa o tino mafi kola e fakaigoa ko tino Anaki, kola e nofo i fenua i mauga — i Hepelona, i Tipeli, i Anapa, pela foki i fenua maugā o Iuta i Isalaelu. Ne ta fakapalele eiloa ne Iosua, pela foki olotou fa'kai.

22E seai eiloa ne tino Anaki ne toe i te fenua o Isalaelu; e isi ne nai tino o latou e toe i kasa, kata mo Asetota.

23Ne puke ne Iosua te fenua kātoa, e pela eiloa mo te fakatonuga a te Aliki ki a Mose. Ne tuku ne Iosua mō tino Isalaelu, kae vaevae ne ia i vaega, e takitasi i matakaiga takitasi.

Tena, ne ma'nava ei a tino Isalaelu mai i te taua.