SALAMO 139 - Tuvalu Revised Bible

Ko te Poto mo te Tausiga a te Atua

1Te Aliki, ko oti au ne sukesuke ne koe, ka ko iloa foki au ne koe.

2E iloa ne koe aku mea katoa e fai;

E iloa 'mao mai ne koe oku mafaufauga.

3E lavea mai au ne koe, mafai au e galue io me malolo;

E iloa katoa ne koe aku faifaiga.

4Koi tuai au o faipati,

Ka ko leva ne iloa ne koe aku pati ka fai.

5Au e puipui ne koe mai oku feitu katoa;

E tausi au ne koe ki tou malosi.

6A tou iloa i aku faiga ko to 'loto;

E silia atu i toku malamalama.

7Tefea te koga ka tele au ki ei, ke galo au mai i a koe?

Tefea te koga ka 'muni ei au mai ou mata?

8Kafai e fano au ki te lagi, a koe e nofo i ei;

Kafai e moe au i te fenua o tino 'mate, e nofo foki koe i ei.

9Kafai e lele au ki tua atu o te saegala io me nofo i koga tafasili i te 'mao i te togala,

10E nofo foki koe i ei

O takitaki au,

E nofo foki koe i ei o fesoasoani mai.

11E mafai ne au o fai ki te pouliga ke faka'muni au,

io me ko te mainaga ke fuli ki te pouliga.

12A te pouliga ki a koe e se pouli,

Ka ko te po e pau fua me se ao.

A te pouliga mo te mainaga e pau faeloa i a koe.

13Ne faite ne koe a mea katoa i toku foitino;

Ne faite ne koe au i te tinae o toku matua.

14Ko tavae koe ne au, me tau o ma'taku ki a koe a tino;

E iloa ne au mo toku loto katoa, i au mea katoa e fai e fakaofoofogina kae gali.

15I te kamataga o te faitega o oku ivi,

Ne sokosoko fakatasi i loto i te tinae o toku matua.

Kae i taku tupuakega i te koga se matea tena,

E iloa eiloa ne koe i au e nofo i ei —

16Ne matea mai au ne koe ka koi tuai au o fanau.

A aso katoa kola ne fakatoka mo toku olaga,

Ko oti ne fakamau i tau tusi,

Ka koi tuai o kamata aso kona.

17Te Atua, e faigata mo au o malamalama i ou mafaufauga;

Me e se mafai o lau!

18Kafai e lau ne au, e uke atu i one;

Ka ala ake au, au e fakatasi faeloa mo koe.

19Te Atua, au e manako ke tamate ne koe a tino amio ma'sei!

Au e manako ko tino fakatupu taua ke se fakalavelave mai ki a au!

20Ne faifai muna latou e uiga ki a koe;

Kae muna masei foki ki tou igoa.

21Te Aliki, ko oko eiloa i toku se fiafia ki a latou kola e se fia'fia ki a koe!

Au foki e ita ki a latou kola e 'teke atu ki a koe!

22Ko oko eiloa i toku takalialia ki a latou,

Ko taku ne au latou ko oku fili.

23Te Atua, sukesuke mai au, ke iloa ne koe oku mafaufauga;

Tofotofo mai au ke malamalama koe i aku faiga.

24Sala ake me isi se mea masei i toku loto,

Kae takitaki mai au ki te auala se gata mai.