IELEMIA 27 - Tuvalu Revised Bible

Ielemia mo te Amo i tena Ua

1 ki tupu o Etoma, Moapi, Amoni, Tulo mo Saitonu, ke avatu te fekau tena ne olotou sui kola ne o'mai ki te Tupu ko Setekaia i Ielusalema.

4A te Aliki Malosi, te Atua o Isalaelu, ne fai mai ki a au ke fakatonu atu ki a latou ke fai ki olotou tupu i te Aliki ne fai mai penei:

5“Ne faite ne au te lalolagi ki toku mana mo toku malosi, pena foki tagata mo manu katoa i te lalolagi; kae e pule eiloa au i te tino e fia ave ne au ki ei.

6Ko au ne tuku ne au a malo katoa konei mai i lalo o te pulega a taku tavini ko Nepukanesa, te tupu o Papelonia, kae fai foki ne au a manu o te vao ke tavini atu ki a ia.

7A malo katoa ka tavini atu ki a ia, ka tavini atu foki latou ki tena tama tagata, pela foki ki tena mokopuna tagata, ke oko eiloa ki te taimi e fakatakavale ei tena malo. Tena la, ka tavini atu ei tena malo ki malo lasi mo tupu takutakua.

8“Kae kafai e isi se fenua io me se malo e se talia ne ia te pule a Nepukanesa, ko te mea ka fakasala ne au a te malo tena ki te taua, te mate fiakai, mo te famai, ke oko eiloa ki te taimi e ta fakapalele ei ne Nepukanesa.

9Sa fakalogo ki otou pelofeta, io me ki so se tino tela e fai aka pela me e mafai ne ia o folafola mai a mea ka 'tupu i aso fakamuli e auala i moemiti, io me ko agaga o tino mate, io me i faiga fakataulaitu. A latou katoa kona e fai mai ki a koutou ke sa talia ne koutou a te pule a te tupu o Papelonia.

10E fakaloiloi fua ne latou koutou, kae ka pogai mai i a latou te ave o koutou ki fenua e mao mai i te otou fenua. Ka afuli ne au koutou keatea, kae ka ta fakamaseigina koutou.

11Ka ko te malo tela e talia ne ia a te pule a te tupu o Papelonia kae tavini atu ki a ia, ka nofo tumau eiloa te malo tena i tena fenua tonu, mo ona tino ka toki olotou lakau i kona kae nofo tumau foki i kona. Ko au, te Aliki, tena ne faipati atu.”

12E pena foki aku muna ki a Setekaia, te tupu o Iuta, “E tau mo koe o fakamalalo atu ki te tupu o Papelonia. Tavini atu ki a ia mo tena fenua, kae ka ola koe.

13Ai a ka sona mate fua ei a tino o tou fenua i te taua, io me ko te fiakai, io me i famai? Tena te mea tela ne fai mai te Aliki me e oko ki so se malo tela e se talia ne ia a te pule a te tupu o Papelonia.

14Sa fakalogo ki pelofeta kola e fai mai ke sa fakamalalo koutou ki te tupu o Papelonia. A latou e o'mai fua o fakaloiloi koutou.

15A te Aliki ne fai mai me e seki uga ne ia a pelofeta kona, kae ko fakaloiloi fua ne latou koutou i te igoa o te Aliki. Tela la, ka afuli keatea ne ia koutou, kae ka mate koutou, ko koutou fakatasi mo pelofeta kona e fakaloiloi ne latou koutou.”

16Tena ne fai atu ei au ki faitaulaga mo tino o te fenua, i te Aliki ne fai mai penei: “Sa fakalogo ki pelofeta kola e fai pela i koloa o te Faletapu ka fakafoki fakavave mai, mai i Papelonia. A latou e o'mai fua o fakaloiloi koutou.

17Sa fakalogo ki a latou! Fakamalalo atu ki te tupu o Papelonia kae ka ola koutou! Ai a ka maofa valevale fua ei te fa'kai tenei?

18Kafai latou ne pelofeta tonu eiloa, kafai e maua eiloa ne latou taku fekau, ke o'mai la o fakamolemole mai ki a au, te Aliki Malosi, e uiga ki koloa kola e toe i te Faletapu, pela foki i te palesi, ke se ave ki Papelonia.”

19-20(I te avega ne te Tupu ko Nepukanesa ki Papelonia a te tupu o Iuta ko Ieoiakini, te tama tagata a Ieoiakimo, fakatasi mo tino takitaki o Iuta mo Ielusalema, ne seki ave ne ia a pou, mo te tani palasi, mo ka, mo nisi mea taua aka foki o te Faletapu.)

21“Fakalogo mai ki muna a te Aliki Malosi, te Atua o Isalaelu, e uiga ki koloa kola ne toe i te Faletapu pela foki i te palesi o Ielusalema:

22Ka ave a mea kona ki Papelonia kae ka tuku eiloa i kona ke oko ki te taimi e toe saga toku mafaufau ki ei. Tena la, ka toe fakafoki mai ei ne au ki te koga tenei. Ko au, te Aliki, tena ne faipati atu.”