LOMA 13 - Tuvalu Revised Bible

Ko Tiute o Tatou ki Tino Pule o te Malo

1A tino katoa e 'tau o fakalogo ki pule o te malo, i te mea ne aumai katoa mai i te Atua te lotou tulaga pule. A tino pule katoa konei e 'tu nei, ne fakatu katoa ne te Atua.

2Tela la, ko te tino tela e 'teke ki pule e 'teke foki ki te mea ne filifili ne te Atua, ka ko latou foki kola e 'teke, ka i luga i a latou te fakamasinoga.

3Me i tino pule e se 'tau o mataku ki ei tino kola e amio 'lei, ka ko latou fua kola e amio ma'sei. E seai sou mataku ki te tino pule? Tela la, fai ne koe te mea 'lei, kae ka maua ne koe a tena fakamanuiaga,

4me i a ia se tavini a te Atua e galue mo tou 'lei. Kae kafai ne fai ne koe te masei, ke 'tau koe o mataku ki a ia, me ne se sona fai fua ne ia a tena pule; i a ia ko te tavini a te Atua tela e taui atu ki a koe tena kaitaua.

5Tela la, e 'tau eiloa mo te tino o fakalogo ki pule, e se ko te feitu fua ki te fakasalaga a te Atua, kae pela foki te lagona faka te mafaufau.

6 Mata 22.21; Male 12.17; Luka 20.25 Me e tenei foki eiloa te sua pogai e fai lafoga ei koutou, me i pule ko faifeau a te Atua e galue mo te mea nei.

7Tela la, 'togi atu tau kaitalafu; 'togi atu ou lafoga ki tino kola ko 'tau o 'togi ki ei; tuku te ava ki a ia tela ko 'tau ki ei te ava, mo te fakaaloaloga ki a ia tela ko 'tau ki ei te fakaaloaloga.

Ko Tiute i te Va o te Sua Tino mo te Sua Tino

8Sa 'nofo kaitalafu ki so se tino, ka ke fakatau alofa fua koutou; me ko te tino tela e alofa ki tona tuakoi, e fakalogo foki ki te Tulafono.

9Eso 20.14; Teu 5.18; Eso 20.13; Teu 5.17; Eso 20.15; Teu 5.19; Eso 20.17; Teu 5.21; Levi 19.18Konei la muna o te fakatonuga, “Sa mulilua; sa tatino; sa kaisoa; sa kaimanako,” mo nisi fakatonuga ake, ko tuku fakatasi katoa a mea konei i te fakatonuga e tasi, “Alofa ki tou tuakoi, e pela eiloa mo koe ki a koe.”

10E se fai mea masei te alofa ki te tuakoi; me i te alofa ko te fakakatoatoaga o te Tulafono.

11I tafa o te mea nei, e iloa ne koutou a te taimi nei, ko te taimi ko 'tau ei koutou o ala ake. Me i te fakaolataga ko pili mai ki a tatou i lo te taimi muamua ne talitonu tatou i ei;

12me ko leva foki te po, ka ko oko mai te ao. Ke tiakina ne tatou a galuega o te pouliga, kae pei ake ki mea taua o te mainaga;

13ke takitaki fakalei eiloa tatou ne tatou, e pela eiloa mo tatou e 'nofo i te ao; sa fiafia valea io me ko'na; sa amio masei io me kaima'nako ki te fia maumea; sa taua io me kaisano'sano.

14Kae fakaeke ki luga i a koutou a te Aliki ko Iesu Keliso, kae ke gata foki i a koutou te fai ne manakoga o te foitino, e fakamalie ei te loto.