FAMASINO 14 - Tuvalu Revised Bible

Ko Samasoni mo te Tamafine mai i Timenata

1I te aso e tasi, ne fano a Samasoni ki te fa'kai o Timenata, kae ne matea ne ia te tamafine Filisitia i kona tela e manako a ia ki ei.

2Ne foki atu a ia ki tena fale kae fai atu ki tena tamana mo tena matua penei, “E isi se tamafine Filisitia i te fa'kai o Timenata e fiafai au ki ei. Au e manako ke avaga maua.”

3Kae ne fesili atu tena tamana mo tena matua penei, “Ai a ne manako ei koe ki se tamafine mai te fenua fapaupau tena o Filisitia ke avaga mo koe? Ai a se sala ei se tamafine i loto i tou kaukaiga, i tamafine o te tou fenua?”

Kae ne fai atu eiloa Samasoni ki tena tamana penei, “Tena te tamafine e manako au o avaga ki ei. Au e fiafai ki te tamafine tena.”

4E se iloa lele eiloa ne ona matua, me ko te Aliki tena e takitaki ne ia Samasoni ke fai te mea tena, me i te Aliki e salasala ki se auala ke taua ei Samasoni mo te kau Filisitia. I te vaitaimi tena, a Isalaelu e nofo mai i lalo o te pulega a te malo o Filisitia.

5Tena, ne olo atu eiloa Samasoni mo ona matua ki te fa'kai o Timenata. I te taimi ne ui atu ei latou i loto i te togā vine i kona, ne lagona ei ne Samasoni te leona e gulu.

6I kona eiloa ne oko mai ei te mana o te Aliki ki a Samasoni, fai ei ne ia Samasoni ke mafi, tena ne sae ei ne ia te leona tena ki ona lima, e pela eiloa me se tamā kouti. Ne seki fakaasi ne ia ki ona matua a te mea tena ne fai ne ia.

7Ne fanatu Samasoni o faipati ki te tamafine tena, kae ne fiafia eiloa a ia ki ei.

8I ne nai aso mai tua ifo, ne toe foki mai Samasoni o avaga ki te tamafine tena. I tena auala ki te fa'kai tena, ne fanatu a Samasoni o onoono ki te leona tela ne tamate ne ia, kae ne poi a ia i te mateaga ne ia a te muimuiga lagomeli mo te hani i loto i te foitino o te leona.

9Ne 'salu mai ne ia te hani ki ona lima, kaikai mai ei ne ia i te auala. Ne fanatu a ia ki tena tamana mo tena matua, tuku atu foki ne ia ki a laua ne mu hani. Tena, ne kai laua ki ei, kae e seki fakailoa eiloa ne Samasoni ki a laua i te hani ne tapale mai ne ia i loto i te foitino o te leona mate.

10Ne fanatu te tamana o Samasoni ki te fale o te tamafine tena, i kona foki ne fai ei ne Samasoni se kaiga. A te mea tena se tu e masani o fai sale ne tamataene.

11I te laveaga ne tino Filisitia a Samasoni, ne uga atu ei ne latou e tino tolu tamataene ke nofo mo ia.

12-13Ne fai atu Samasoni ki a latou kona penei, “Fakalogo mai ke fai atu taku tupua. Kafai e mafai ne koutou o fakaasi mai tena uiga kae seki katoa te fitu o aso o te fakaipoipoga, ka avatu ne au ki a koutou taki tokotasi se laugatu lino mo se gatu fou.” Ne fai mai latou penei, “Fakamatala mai tau tupua ke lagona ne matou.”

14Tena ne fai atu ei Samasoni penei,

“Ne vau te meakai mai loto i te tagata kai;

Ka ko te mea magalo mai loto i te tagata malosi.”

E tolu aso mai tua, kae e seki maua eiloa ne latou te uiga o te tupua.

15I te fa o aso ne fai atu ei latou ki te avaga a Samasoni penei, “Taumafai ki tau avaga ke fakaasi mai ne ia te uiga o tena tupua. Kafai e se fai ne koe te mea tena ko te mea ka sunu ne matou te fale o tou tamana, sunu fakatasi foki mo koe. Ne kami mai fua ne koulua matou ke fakama'tiva matou.”

16Tena ne fanatu ei te avaga a Samasoni ki a Samasoni kae tagi kae fai atu penei, “A koe e se alofa mai ki a au! A koe e se fiafia ki a au. E isi se tupua a koe ne fai ki oku takaga, kae e seki taku mai mua ne koe ki au tena uiga!”

Ne fai atu Samasoni penei, “Kiloke, e seki fakaasi foki ne au tena uiga ki oku matua. Ai a ka sona fakaasi atu ei ne au ki a koe?”

17Ne tagi faeloa te avaga a Samasoni i aso o te fakaipoipoga ke fakaasi atu te uiga o te tupua a Samasoni. I te fitu o aso, ne fakaasi atu ei ne Samasoni te uiga o tena tupua ki tena avaga, me e tagi atu faeloa ke fakaasi atu te uiga o te tupua. Tena, ne fakaasi atu ei ne ia ki te kau Filisitia.

18Tena la, i te fitu o aso, koi tuai ei o ulu atu Samasoni ki tena potu moe, ne fai atu ei a tagata o te fa'kai tena penei,

“E a, e isi aka foki se mea e magalo atu i te hani?

E a, e isi aka foki se mea e malosi atu i te leona?”

Ne tali atu Samasoni,

“Moi ne seki fakaoga ne koutou taku pulumakau, o fakamalu te laukele,

E penei e se maua nei ne koutou a te tali.”

19Ne oko atu te mana o te Aliki, tena ne oko atu ei te malosi ki a ia, fanatu ei a ia ki te fa'kai o Asekelona, i kona ne tamate ei ne ia e tino tolu tagata, kae avatu olotou gatu gali mo tagata kola ne maua ne latou te tali o tena tupua. I te otiga o mea kona, ne foki atu ei a ia ki tena fale mo te kaitaua i te mea tena ne tupu,

20ka ko tena avaga ko oti ne tuku atu ki te tagata ne soa mo ia i te fakaipoipoga.