FAATAOTO 2 - Tuvalu Revised Bible

Ko te Taui o te Poto

1Taku tama, tauloto fakalei a mea konei e akoako atu ne au ki a koe, kae sa puli a mea e fai atu ne au ke fai ne koe.

2Fakalogo ki muna o te poto, kae taumafai ke malamalama koe i ei.

3E tonu, akai atu ke maua ne koe te poto; fakamolemole atu ke maua ne koe te atamai.

4Sala malosi ki te poto, e pela manafai e sala koe ki siliva io me ko se koloa tāua.

5Kafai e fai ne koe te mea tena, kae ka iloa foki ei ne koe te uiga o te mataku ki te Aliki, kae ka manuia eiloa koe i tau taulotoga e uiga ki te Atua.

6Ko te Aliki e aumai ne ia te poto; a te atamai mo te malamalama e o'mai katoa mai i a ia.

7E fesoasoani kae puipui ne ia tino fakamaoni kae amiotonu.

8E puipui ne ia a tino kola e fai fakalei ki nisi tino, kae tausi ne ia a tino kola e tavini fakamaoni ki a ia.

9Kafai e fakalogo mai koe ki a au, kae ka iloa ne koe te mea tonu, faiga tonu, mo uiga tonu. Ka iloa foki ne koe a mea e tau o fai ne koe.

10Ka gasolo foki ei koe o poto, kae ka fiafia koe i a koe e poto.

11A tou atamai mo tou malamalama ka puipui ne ia koe,

12ke mo a e fai ne koe te mea 'se. Ka fakamao ne latou a koe mai i tino fakatupu taua i olotou muna e fai,

13ko tagata kona kola ko oti ne tiaki te olaga tonu kae ola i se olaga pouliuli o te agasala,

14ko tagata kona e fiafia o fai a amioga masei,

15ne tagata e se mafai o fakatuagagina.

16Ka mafai ne koe o teke atu te fafine masei tela e taumafai o fakapakū koe ki ana muna molemole,

17tela e se fakamaoni ki tena avaga kae fakapuli fua ne ia ana tautoga malu ne fai.

18Kafai e fano koe ki tena fale, a koe ko sasale i te auala ki te mate. A te fano o koe ki kona, ko pau eiloa mo te fano ki te lalolagi o tino mate.

19A tino katoa kola ne olo ki ei, e seki ai eiloa se tino kai foki mai. E seai se tino e toe foki mai ki te auala o te ola.

20Tela la, e tau eiloa koe o tautali i faiga a tino amiotonu, kae ola i se olaga fai mea tonu.

21A tino amiotonu kae fai mea tonu ka ola i te fenua tenei.

22Ka ko te Atua ka tapale keatea ne ia a tagata amio masei mai i te fenua, kae unu keatea a tino agasala, e pela me ne lakau e unu keatea mai i te laukele.