1 KOLINITO 4 - Tuvalu Revised Bible

Ko Apositolo a Keliso

1E 'tau mo koutou o manatu mai ki a matou me ne tavini a Keliso, kola ko oti ne tofi ke pule i fuafuaga 'funa mo mea tonu a te Atua.

2A te mea e 'tau o fai ne te tino ko tofia ke tavini, ko te fakamaoni ki tena pule.

3Kae nei au e se mafaufau ki toku fakamasinogina ne koutou e uiga ki toku fakamaoni, io me ko te fakamasinogina ki mafaufauga faka te tagata; me se masani au o fakamasino ifo ki a au eiloa.

4E se iloa ne au se mea e 'se ei au, kae se ko tena uiga me ko au e tonu. Ko te Aliki e fakamasino ne ia a au.

5Tela la, e se 'tau mo koutou o fakamasino atu ki so se tino, ka koi tuai o oko mai ki te taimi tonu o te fakamasinoga. A te fakamasinoga fakapalele ka taofi eiloa ki te oko mai o te Aliki. A te Aliki ka fakaasi ne ia agasala 'funa, kae fakaasi mai foki ne ia a fuafuaga 'funa a tino i olotou loto. Ka fakamasinogina a tino katoa e tusa mo galuega a te tino ne fai.

6Oku taina, ne fakatusa ne au a mea konei ki a maua mo Apolo ona ko koutou. Ne fakaaoga ne au a maua ke fai mo fakatusa, e akoako ei koutou ke iloa ne koutou o fai fakalei otou amio. E se 'tau mo so se tino i a koutou o fakamatamata ona ko te sua tino, kae fakatauemu ki te sua tino.

7Ko oi ne fai ne ia koe ke sili i nisi tino? Ne seki tuku atu ne te Atua a mea katoa kona e i a koe? Kafai la ko maua ne koe, ai a la ne fakamatamata ei koe? E se iloa ne koe a mea kona ne tuku atu fakameaalofa?

8Ko leva ne maua ne koutou a mea katoa e ma'nako koutou ki ei! Ko leva ne mauko'loa koutou! Ne manatu koutou pela i a koutou ko fai mo tupu, ka ko matou e se ne tupu. Ko 'lei, aku muna eiloa i a koutou ne tupu, ko te mea ke mafai o fai mo tupu a tatou katoa.

9I toku manatu me i te Atua ne fai ne ia matou ko toe apositolo se taulia eiloa, e pela me ne tino ko tuku atu ke tamate i mua o tino, ke fai mo kilokiloga a te lalolagi o agelu mo tino.

10E tonu, ko fai matou mo vale ki manatu o nisi tino, ka ko koutou ne kelisiano 'poto kae malamalama. Ko vaivai matou, kae e malosi eiloa koutou. Ko fakatauemugina matou, kae taku'leia eiloa koutou.

11Ke oko mai eiloa ki mu taimi konei, a matou e fia 'kai kae fia inu. Ko pei matou ki gatu masaesae kae kini foki ne tino; ko takase'se foki matou me ko seai se koga e 'nofo mau i ei.

12Galu 18.3A matou e galue malosi mo te motou ola. Kafai ko fetugina matou, e fakamanuia atu matou ki ei; kae kafai foki ko fakasauagina matou, e kufaki matou.

13Kafai foki ko muna maseigina matou, kae tali atu matou ki muna 'lei. A matou e pau mo kaiga o te lalolagi. A matou ne lailai o kaiga o te lalolagi ke oko mai eiloa ki te taimi tenei!

14Ko tusi atu au penei ki a koutou, e se ko tona uiga i a au e loto o fakamasiasi koutou. Ko fai ne au penei o akoako atu ei koutou e pela eiloa mo ne aku tama fagasele.

15I te mea kafai e toko sefulu afe otou faiakoga i a Keliso, kae tokotasi eiloa te otou tamana. Me i te otou olaga i a Keliso Iesu, ko fai ei au mo otou tamana, i taku avatuga o te Tala 'Lei ki a koutou.

161Koli 11.1; Fili 3.17Tela la, au e fakamolemole atu ki a koutou, ke tau'tali mai koutou i oku ala.

17Ona ko te feitu tenei, ko uga atu ei ne au ki a koutou a Timoteo, ko taku tama fagasele mo te fakamaoni i te Aliki. Ka fakamasaua atu ne ia ki a koutou a faifaiga kola ne sasale ei au i te ola fou i a Keliso Iesu, kola e akoako atu ne au ki Ekalesia katoa.

18A nisi o koutou ko oko eiloa i te fiafia, mo te manatu pela i a au ko se oko atu.

19Kafai e tonu mo te loto o te Aliki, ka oko atu au ki a koutou i se taimi pili mai nei, tena la, e fia sukesuke ne au a pati a tino fakamatamata kona ne fai, pela foki mo olotou faiga!

20Me i te Malo o te Atua e se fakavae fua ki pati, ka ko tena 'mana foki.

21Tefea te mea e loto koutou ki ei? Ke fanatu au o sona fai koutou, io me ko toku fanatu i te agaga o te alofa mo te loto malalo?