ISAIA 25 - Tuvalu Revised Bible

Ko te Pese Tavae

1Te Aliki, a koe ko toku Atua;

Ka fakaaloalo koe ne au kae tavae ne au tou igoa.

Ko oti ne fai ne koe a mea fakaofoofogina;

Ne fakataunu eiloa ne koe mo te fakamaoni a fuafuaga kola ne fai ne koe i aso mua.

2Ko oti ne ofa valevale ne koe a fa'kai,

Pela foki a mea kola e puipui ki ei latou mai i te fili.

A palesi kola ne faite ne omotou fili ko galo atu eiloa.

3A tino o malo malosi eiloa ka tavae ne latou a koe;

A tino i fa'kai o malo fakasaua ka mataku i a koe.

4A tino mativa mo tino fakaalofa ne tele atu ki a koe

Kae ne saogalemu i taimi o fakalavelave.

E fakamalu ne koe latou mai afā,

Pela foki mai i te vela o te ao.

A te fili kaitaua e taua atu pela me se afā i te tau moko,

5Pela me se oge vai i se fenua seai ne vai i ei.

Ka ko koe te Aliki, ne fakafilemu ne koe omotou fili;

Ne fakagata ne koe te paka'laga o tagata amio masei,

Pela me se kaumana tela e fakamoko ne ia te vela o te aso.

Ko Fakatoka ne te Atua se 'Kaiga

6Ka fakatoka ne te Aliki Malosi se kaiga i konei, i luga i te Mauga o Siona, mo malo katoa o te lalolagi — se kaiga o meakai tafasili i te gali mo uaina tafasili foki i te gali.

7I konei, ka ave keatea ei ne Ia a te kaumana o te fanoanoa tela ne pulou i luga i malo katoa o te lalolagi.

81Koli 15.54; Faka 7.17; 21.4 A te Aliki Sili ka fakagata ne ia te mate ke se toe ai eiloa! Ka solo ne ia a loimata mai i mata o tino katoa, kae ave keatea te masiasi tela ne fakapuapuaga ei ona tino i te lalolagi katoa. Ko te Aliki eiloa tena ne faipati!

9Kafai ko tupu te mea tena, kae ka fai aka a tino katoa penei, “A ia ko te motou Atua! Ne talitonu matou ki a ia, kae ne fakaola eiloa ne ia matou. A ia ko te Aliki! Ne talitonu matou ki a ia, kae nei ko fiafia kae lifu matou me ne fakasao ne ia matou.”

Moapi ka Fakasala ne te Atua

10 Isa 15.1—16.14; Iele 48.1-47; Eseki 25.8-11; Amo 2.1-3; Sefa 2.8-11 A te Aliki ka puipui ne ia a te Mauga o Siona, ka ko tino o Moapi ka lakalakagina ki lalo, e pela mo kausaito kola e lakalakagina fakatasi mo kaiao i te laukele.

11Ka fola mai olotou lima e pela me e taumafai o 'kau, ka ko te Atua ka fakaseaoga ne ia latou, tena la, ka toe galo ifo eiloa olotou lima ki lalo, seai se lotou mea e mafai o fai.

12Ka ofa fakapalele ne ia a fa'kai malosi o Moapi, mo olotou pui maluga ka futi ifo ke siga valevale ki lalo i te pefu.