2 NOFOAIGA TUPU 18 - Tuvalu Revised Bible

Mikaio te Pelofeta mo Aapo te Tupu(1Tupu 22.1-28)

1I te taimi ko maumea kae takutakua ei a te Tupu o Iuta ko Iosefatu, ne fakatoka ei ne ia se fakaipoipoga i te tino i tena kaiga mo te tino i te kaiga o Aapo, te Tupu o Isalaelu.

2I ne tausaga fakamuli ifo, ne fanatu a Iosefatu ki te fa'kai o Samalia o asiasi atu ki a Aapo. Ne ta ne Aapo ana mamoe mo pulumakau e uke mo fai te kaiga e fakaaloalo ei a Iosefatu mo tino kona ne o'mai mo ia. Ne taumafai a ia o futi mai a Iosefatu ke kau laua o taua atu ki te fa'kai o Lamota i Kileata.

3Ne fesili atu a ia penei, “E a, e talia ne koe ke olo taua o taua ki te fa'kai o Lamota?”

Ne tali atu a Iosefatu, “Au e toka, manafai ko toka koe, penei foki taku kautau. A matou e kau atu i a koe.”

4Kae ne toe fakaopoopo atu mo ana muna penei, “Kae ke muamua o fakafesili aka ne taua a te Aliki.”

5Tena la, ne uga te fekau a Aapo ki pelofeta, e tusa mo te faselau pelofeta, ke o'mai, kae fesili atu a ia ki a latou penei, “E tau mo au o fano o taua atu ki te fa'kai o Lamota me ikai?”

Ne tali mai latou, “Taua atu ki ei. E avatu ne te Atua ki a koe a te manumalo.”

6Kae ne fesili aka a Iosefatu penei, “Ko seai aka foki se pelofeta ke fesili tatou ki ei e uiga mo te loto o te Aliki?”

7Ne tali atu a Aapo, “E toe tokotasi nei te pelofeta, ko Mikaio, te tama tagata a Imila. Ka ko au e se fiafia ki a ia, me e seai eiloa se mea lei e uiga ki a au ke folafola ne ia, e folafola faeloa ne ia a mea se 'lei e uiga ki a au.”

Ne tali atu Iosefatu penei, “E se tau koe o faipati pena!”

8Tena la, ne kalaga atu a Aapo ki te ofisa o te fono e tokotasi, kae uga ne ia ke fano o puke mai a Mikaio.

9A te ava tupu kona, e pei ki o la gatu fakatupu, e sagasaga i o la nofogaaliki, i te koga solo saito, i tua faeloa o te pui o Samalia, ka ko pelofeta katoa e fai olotou muna fakapelofeta i o la mua.

10E tokotasi mai i te kau pelofeta, ko Setekaia, te tama tagata a Kenaana, ne faite ne ia ne sau fiti, kae fai atu ki a Aapo penei, “A te Aliki ne fai mai penei,‘Ka fakaaoga ne koutou a mea konei o taua atu ki te kau Sulia, kae ka fakatakavale masei eiloa ne koutou.”’

11A nisi pelofeta ne fai foki olotou pati pena. Muna a latou, “Olo atu o taua ki te fa'kai o Lamota, kae e manumalo eiloa koutou. Ka avatu ne te Aliki a te manumalo ki a koe.”

12I te taimi tena, a te ofisa tela ne fano ki a Mikaio ne fai atu ki a Mikaio penei, “A pelofeta katoa ne fai olotou muna fakapelofeta i te tupu e manumalo, e tau foki mo koe o fai pena.”

13Kae ne tali atu a Mikaio, “I te igoa o te Aliki ola, au e faipati eiloa ki muna e fai mai ne toku Atua!”

14I te fanatuga a ia ki mua o te Tupu ko Aapo, ne fesili atu ei te tupu ki a ia penei, “Mikaio, e a, e tau maua mo Iosefatu o olo atu o taua ki te fa'kai o Lamota me ikai?”

Ne tali atu Mikaio, “Taua atu! A koulua e manumalo eiloa. E avatu eiloa ne te Aliki a te manumalo.”

15Kae ne tali atu a Aapo penei, “Kafai e faipati mai koe ki a au i te igoa o te Aliki, faipati ki te mea tonu! Ko fakafia taimi ne fai sale atu ei au pena ki a koe?”

16 Nume 27.17; Eseki 34.5; Mata 9.36; Male 6.34 Ne tali atu a Mikaio, “E lavea ne au a te kautau a Isalaelu e salalau valevale i luga i mauga foliki, e pela me ne mamoe ko seai se lotou tausi mamoe. Kae ne fai mai a te Aliki penei, ‘A tagata konei ko seai se lotou takitaki; ke na foki atu latou ki olotou fale mo te filemu.”’

17Muna a Aapo ki a Iosefatu, “Au ne fai atu ki a koe, me e seai eiloa se mea lei e uiga ki a au kai faipati ne ia; ana valoaga e uiga ki a au e masei faeloa!”

18Ne faipati eiloa Mikaio, ana muna: “Fakalogo mai nei ki muna a te Aliki konei! E lavea ne au a te Aliki e sagasaga i tena nofogaaliki i te lagi, mo ana agelu katoa e tu i ona tafa.

19Ne fesili atu te Aliki penei, ‘Ko oi te tino ka fano o fakaloiloi a Aapo, ko te mea ke fano o mate i Lamota?’ A nisi agelu e faipati ki se mea fakaatea, a nisi agelu foki e kese foki a mea e faipati ki ei,

20tena la, kae vau te agaga e tokotasi ki mua o te Aliki, kae fai atu penei, ‘Ko au ka fano o fakaloiloi a Aapo. ’Ne fesili atu a te Aliki penei, ‘E fakaloiloi pefea ne koe?’

21Ne tali mai te agaga penei, ‘Au e fano o fai a pelofeta katoa a Aapo ke loi. ’Muna a te Aliki,‘Fano o fakaloiloi a Aapo, me e taunu eiloa tau mea e fai.”’

22Ne fakaoti atu a muna a Mikaio penei: “Tenei te mea ko oti ne tupu. A te Aliki ko oti ne fai ne ia au pelofeta kona ke loi atu ki a koe. A te ikuga ko oti ne tonu i a ia, i a koe ka maua ne te puapuaga!”

23Tena, kae fanatu te pelofeta ko Setekaia o pa a mata o Mikaio, kae fai atu penei, “I te taimi fea ne tiaki ei au ne te agaga o te Aliki, kae faipati atu ki a koe?”

24Ne tali atu a Mikaio, “Ka iloa ne koe manafai ko fano koe o muni i se potu ki tua o se fale.”

25Tena, ne fakatonu atu a Aapo ki tena ofisa e tokotasi penei, “Puke fakapagota a Mikaio o ave ki a Amoni, te kovana o te fa'kai, mo te pelenise ko Ioasa

26Fai ki a laua ke 'pei a ia tena ki te falepuipui, kae ke fagai ki falaoa kae fainu ki vai, ke oko eiloa ki te taimi e foki mai ei au mo te manuia.”

27Ne kalaga atu a Mikaio, “Kafai koe e foki mai mo te manuia, ko tena uiga, a te Aliki e seki faipati mai e auala i a au!” Ne toe fai atu ana muna penei, “Tino katoa, fakalogo ki aku muna kola ne fai!”

Ko te Mate o Aapo(1Tupu 22.29-35)

28Tena, ne olo eiloa a te Tupu ko Aapo o Isalaelu mo te Tupu ko Iosefatu o Iuta, o taua atu ki te fa'kai o Lamota i Kileata.

29Muna a Aapo ki a Iosefatu penei, “I te taimi e olo ei tatou o taua, au ka funa oku foliga, ka ko koe e pei eiloa ki ou gatu fakatupu.” Tena, ne fano ei te tupu o Isalaelu ki te taua kae funa ona foliga.

30A te tupu o Sulia ko oti ne fakatonu ki ana takitaki o kaliota, ke se olo o taua ki se isi tino, na ko te tupu eiloa o Isalaelu.

31Tena, i te laveaga ne latou a te Tupu ko Iosefatu, ne leake eiloa nei latou me ko ia ko te tupu o Isalaelu, tena ne mafuli atu ei latou o taua ki ei. Ne kalaga ki luga Iosefatu, tena ne fakasao ei a ia ne te Aliki te Atua, o fakasaga keatea te taua mai i a ia.

32Ne lavea ne takitaki o kaliota i a Iosefatu e se ko te tupu o Isalaelu, tena ne seki toe olo ei latou o afuli a Iosefatu.

33E isi se sotia Sulia ne sana atu tena matasana, poko eiloa i sokoga o gatu tau o te Tupu ko Aapo. Ne kalaga atu a Aapo ki te tagata e fakatele sale tena kaliota penei, “Au ko pakia! Fuli o tele keatea mo te taua!”

34I te taimi koi fai ei te taua, ka ko te Tupu ko Aapo e tu eiloa i luga i tena kaliota, kae fakasaga ki te kau Sulia. I te afiafi, ko Aapo eiloa ko mate.