NEEMIA 8 - Tuvalu Revised Bible

Ko Faitau ne Esela a te Tulafono ki te Fenua

1I te fitu o masina, a tino Isalaelu ko nofo katoa i olotou fa'kai. I te po muamua o te masina tena, ne maopoopo katoa latou i Ielusalema, i te koga fono i mua faeloa o te Mataloa o Vai. Ne fai latou ki a Esela, te faitaulaga, kae se tagata poto i te Tulafono a te Aliki tela ne tuku ne ia ki te fenua o Isalaelu e auala i a Mose, ke puke mai te tusi o te Tulafono.

2Tena ne puke mai ei ne Esela te tusi tena ki te koga e maopoopo mai ei a tino o te fenua — ko tagata, fafine mo tamaliki kola ko matua ko mafai o malamalama.

3Tena ne faitau atu ei ne ia a te Tulafono ki a latou i te koga fono tena i mua o te mataloa o te fa'kai, mai i te tafataeao ke oko eiloa ki te tutonu, kae ne fakalogo'logo faka'lei katoa latou.

4A Esela e tu i luga i te tulaga laupapa tena ne faite ke faitau mai i ei a te Tulafono. Konei a igoa o tino kola e tu i tena feitu fakaatamai: ko Matitia, Sema, Anaia, Ulia, Hilikia mo Maseia; ka ko tino e tu mai i tena feitu fakamaui ko Petaia, Misaeli, Malakita, Hasuma, Hasapatana, Sakalia mo Mesulama.

5I te taimi ne tu mai ei a Esela i luga i te tulaga laupapa mai i luga o tino, ka ko tino ne kilo atu katoa ki a ia. I te taimi ne suke ei ne ia a te tusi, ko tino eiloa ko tu ki luga.

6Muna a Esela, “Viki atu ki te Aliki, te Atua Maluga!”

Ne sisi aka katoa a lima o tino kae tali atu penei, “Amene! Amene!” Ne to'tuli latou kae talo, mo olotou mata e patele ki te laukele.

7Tena ne tu aka latou ki luga, kae tu eiloa i olotou tulaga, kae ne fakamalamalama ki a latou a te Tulafono ne te kau sa Levi: ko Iesua, Pani, Selepaia, Iamina, Akupa, Sapetai, Hotia, Maseia, Kelita, Asalia, Iosapata Hananu mo Pelaia.

8Ne faitau atu ne latou a te Tulafono a te Atua, o te Tulafono a te Atua kae fakamaina kae fuli foki eiloa i te gana e malamalama ei a tino, kae fakamalamalama atu foki ki a latou ke malama'lama latou.

9I te lagonaga ne tino a te mea e manakogia i te Tulafono, tena ne tagi ei latou me ko oko eiloa i te otia o olotou loto. Tena ne faipati atu ei a te kovana ko Neemia mo Esela te faitaulaga kae se tagata poto i te Tulafono, mo te kau sa Levi kola e fakamatala ne latou a te Tulafono, ki tino o te fenua penei, “A te aso tenei se aso e 'malu ki te Aliki te otou Atua, tela la, e se tau koutou o tagi fanoanoa.

10Foki nei ki otou fa'kai o fai otou 'kaiga. Tufatufa atu otou meakai mo uaina ki tino e se lava olotou mea. A te aso nei se aso e 'malu ki te 'tou Aliki, tela la, sa fanoanoa. A te fiafia tela ka aumai ne te Aliki ki a koutou, ka fai ne ia koutou ke malosi.”

11A te kau sa Levi ne olo sale o fakamafanafana a tino kae fai ki ei ke se fanoa'noa, i te aso se aso e 'malu.

12Tena la, ne foki atu a tino ki olotou fa'kai o kai kae inu mo te fia'fia, kae tufatufa atu olotou meakai ki nisi tino, me ko malama'lama faka'lei latou i te Tulafono tela ne faitau mai ki a latou.

Ko te 'Kaiga Fiafia o Fakamalumalu

13I te aso e tasi, ne olo atu a matai o kaukaiga, fakatasi mo faitaulaga mo te kau sa Levi ki a Esela o tauloto te Tulafono.

14Levi 23.33-36,39-43; Teu 16.13-15 Ne iloa ake ne latou i te Tulafono tela ne tuku mai ne te Aliki ki tino Isalaelu e auala i a Mose, e fai mai i tino Isalaelu e tau o nofo i fakamalumalu i te taimi o te 'Kaiga Fiafia o Fakamalumalu.

15Tena ne tuku atu ei ne latou te fakatonuga tenei, kae fakatonu atu ke fakasalalau atu i luga i Ielusalema mo nisi fa'kai lasi mo fa'kai foliki. Tenei te fakatonuga: “Olo atu ki te vao o puke mai ne kaula o lakau ko pelosi mo olive mo alasi mo lau pama mo nisi kaula o nisi lakau mo fai a fakamalumalu, pela eiloa mo te mea e tusi i te Tulafono.”

16Tena, ne puke mai ne tino a kaula o lakau, kae faite olotou fakamalumalu i luga i tuafale o olotou fale, pela foki i tafatafa o olotou fale, mo te koga ateatea o te Faletapu mo koga sautala i tafa o te Mataloa o Vai pela foki i tafa o te Mataloa o Efalaima.

17A tino katoa kola ne foki mai i te tafeaga ne faite olotou fakamalumalu mo nofo latou. Tenei te taimi muamua ko fatoa fai ei a te 'kaiga fiafia tenei, talu mai aso o Iosua te tama tagata a Nuno, tela la, a tino ko oko eiloa i te fia'fia.

18Ne faitau ne latou a vaega o te Tulafono a te Atua i aso takitasi, mai i te aso muamua o te kaiga fiafia ke oko eiloa ki te toe aso. Ne fakamanatu ne latou a te kaiga fiafia tena i aso e fitu, kae i te valu o aso ne fai ei a te fakafiafiaga fakaoti, e pela eiloa mo te mea e manakogia i te Tulafono.