GALUEGA 5 - Tuvalu Revised Bible

Ko Anania mo Safaila

1E isi se tagata e igoa ki a Anania, ka ko Safaila te igoa o tena avaga. Ne 'togi atu ne Anania te la potu manafa,

2ne 'funa ne ia te sua vaega o te tupe, kae iloa 'lei eiloa ne tena avaga, kae tuku atu te toega ki apositolo.

3Muna a Petelu, “Anania, ai a ko tuku atu ei tou loto ke pule ne Satani, o fakaloiloi ne koe te Agaga Tapu, kae taofi ne koe te sua vaega o te tupe ne maua i te 'togiatuga o tou manafa?

4Ka koi tuai o 'togi atu ne koe a tou manafa, e o koe eiloa te manafa. I te otiga foki ne 'togi atu ne koe, e a koe foki eiloa a tupe ne maua mai i ei. Se a tau fakatau ne fai ei ne koe a te mea nei? E seki loi koe ki tino, ka ko loi koe ki te Atua!”

5I te taimi ne lagona ei ne Anania te pati tenei, ne siga ki lalo, mate eiloa. Ko oko eiloa i te ma'taku o latou katoa kola ne 'logo i te tala tenei.

6Ne ulu mai a tamatane ki loto i te fale, teu ei ne latou a tona foitino, ave ei ki tua o tanu.

7Kāti e tolu itula mai tua ifo i te tupuga o te mea nei, kae oko mai Safaila ki te fale, kae se iloa ne ia a te mea ko oti ne tupu.

8Muna a Petelu ki a ia, “Taku mai ki a au me tenei eiloa te aofaki o te tupe katoa ne maua ne koulua mo tau avaga, i te otiga ne 'togi atu te olua manafa?” Muna a Safaila, “E tonu, tena eiloa.”

9Muna a Petelu ki a ia, “Ai a ne loto ma'lie ei koulua o tofotofo ki te Agaga o te Aliki? Fakalogo mai, a tamatane kola ne tanu ne latou a tau avaga, konei e 'tu mai i te mataloa, ka ave foki ne latou a koe ki tua.”

10I kona foki eiloa, siga ki lalo, ko te mea eiloa ko mate. Ne ulu mai a tamatane ki loto, matea ei ne latou a ia ko mate; tela ave ei ne latou a ia ki tua o tanu i tafa o tena avaga.

11Ko oko eiloa i te ma'taku o tino o te Ekalesia, pela foki mo tino katoa ne lagona ne latou a te tala tenei.

Ko Vavega mo Mea Fakaofoofogina

12E uke a vavega mo mea fakaofoofogina ne fai ne apositolo ki tino. Ne maopoopo katoa a tino talitonu i te Fale fakaoso o Solomona.

13E ui eiloa i te tavaegina o latou ne tino, kae e seai eiloa se tino mai tua e fia kau atu ki a latou,

14ka ko gasolo eiloa o tokouke a tino e fakaopoopo atu ki a latou, ne tagata mo fafine kola ko talitonu ki te Aliki.

15Ona ko te 'lei o galuega a te kau apositolo, ne aumai ei ne latou a tino ma'saki, kae fakata'kato i luga i moega mo lopa, ko te mea ke pa'tele fua a nisi o latou ki te ata o Petelu, manafai e sasale ake i olotou tafa.

16Ko ualolo mai a tino mai fa'kai pili ki Ielusalema; ko aumai ne latou a tino ma'saki mo tino ne pukea ne agaga ma'sei, kae ne ma'losi katoa latou.

Ko Fakasauagina Apositolo

17Ka ko te Faitaulaga Pule mo tino katoa kola e 'kau fakatasi mo ia, ko te vaega tena o Satukaio. Ne 'tu ake latou ki luga mo te loto masei ki apositolo,

18o puke fakapagota ne latou apositolo, kae pei ki loto i te falepuipui.

19Kae i te po eiloa tena, ne 'tala ne te agelu a te Aliki a te falepuipui, takitaki ei ne ia ki tua apositolo, kae fai atu ki a latou,

20“Olo o 'tu i te Fale Tapu, kae taku atu ki tino e uiga ki te ola fou tenei.”

21Ne talia ne apositolo te fakatonuga tena, kae i te vaveao, ulu atu ei latou ki loto i te Fale Tapu, kamata eiloa o akoako atu.

Ne fakatonu ne te Faitaulaga Pule mo tena kau pulepule ke maopoopo te Fono Maluga mo te fono a toeaina Isalaelu; avatu ei foki mo te lotou fakatonuga ki te falepuipui ke aumai apositolo ki mua o te Fono Maluga.

22I te okoatuga o leoleo ki te falepuipui, matea ake ei ne latou me 'galo. 'Foki ei o taku atu ki te Fono Maluga,

23olotou muna, “Ne maua atu ne matou te falepuipui e 'pono mau eiloa, mo leoleo foki e 'tu i mataloa, kae i te motou 'talaga i mataloa, e seai eiloa se tino i loto.”

24I te lagonaga ne te takitaki o leoleo o te Fale Tapu mo faitaulaga sili a te tala tenei, ne ofo latou me se a te mea ne tupu ki apositolo.

25E isi se tino ne ulu mai ki loto i te Fono, kae fai atu ki a latou, “A tino kola ne 'pei ne koutou ki te fale puipui, kola e 'tu i loto i te Fale Tapu, e akoako ki tino!”

26Tela, olo ei a te takitaki mo tena kau sotia o puke mai apositolo ki te Fono. E seki puke malo ne latou apositolo, me ma'taku ma peipei latou ne tino.

27Ne takitaki mai ne latou a te kau apositolo ki loto kae faka'tu i mua o te Fono Maluga; fesili atu ei te Faitaulaga Pule ki a latou,

28Mata 27.25ana muna, “Ne fakatonu malosi ne matou a koutou ke se toe akoako atu ne koutou a te igoa o Iesu,” ana muna, kae “kiloke ki te mea ne fai ne koutou! Ko oti ne fakasalalau atu ne koutou te otou talaiga i Ielusalema katoa, kae mana'ko foki koutou o 'ti ki a matou me ne tamate ne matou a ia!”

29Ne tali atu a Petelu mo nisi apositolo, olotou muna, “E 'tau mo matou o faka'logo ki te Atua i lo te fakalogo ki tino.

30A te Atua o'tou tupuga, ko oti ne fakatu ake ne ia a Iesu mai te mate, i te otiga ne fakasataulo ne koutou.

31Kae ne avake ne te Atua ke nofo i tena feitu taua ko te feitu fakaatamai, ke fai mo Takitaki mo Fakaola, o tuku atu foki ki tino Isalaelu a te avanoa ke salamo latou ki olotou agasala, ka ke fakamagalo foki olotou agasala.

32A matou ne tino molimau ki mea konei. E pena foki te Agaga Tapu, tela ko te meaalofa a te Atua ki a latou kola e faka'logo ki a ia, e molimau foki ki mea konei.”

33I te lagonaga ne tino o te Fono olotou pati konei, ko oko eiloa i te lotou kaitaua, mafaufau ei latou o tamate apositolo.

34E tokotasi o te kau Fono se Falesaio e igoa ki a Kamalielu, se faiakoga o te Tulafono, kae fakaaloalogina ne tino katoa. Ne tu ake i mua o te Fono Maluga, kae fai atu ke tuku atu latou konei ke olo ki tua mai te Fono mo se taimi toetoe.

35Ana muna ki tino o te Fono, “Tagata Isalaelu, ke fakaeteete koutou ki otou mea ka fai ki tagata konei.

36I lua aso ne teka atu nei, ne sae ake te tino e igoa ki a Tiutasi, kae fai mai tena muna i a ia se tino sili. Kāti e tusa mo te fa selau tino ne tau'tali i a ia. Ne tamate a ia, maofa valevale ei tena kau, oti atu foki eiloa i kona mo tena potukau.

37Fakamuli ifo, ne sae ake a Iuta te Kalilaia i vaitaimi tonu eiloa o te lauga o tino; e tokouke foki a tino ne tau'tali i a ia, kae ne tamate foki a ia, mafuta valevale ei katoa ona taugasoa.

38Tela la, au e fai atu ki a koutou, ke faka'mao otou lima mai tagata konei, kae tuku malie eiloa latou, me kafai te lotou fuafuaga mo te lotou galuega ne mea ne fai ne se tino, e fakamalepegina;

39kae kafai ne fai ne te Atua, e se taitai lele eiloa o mafai ne koutou o fakatakavale. Kafai e fai ne koutou, ka iloa fakamuli ake ei ne koutou, ia koutou e fakasaga tau ki te Atua.” Ne talia ne te Fono te manatu o Kamalielu.

40Ne toe ami atu ki apositolo ke o'mai ki loto. Ne 'kini ne latou, kae fakatonu atu ke se toe fai'pati eiloa ki te igoa o Iesu. Oti, fakasaoloto atu ei ke olo.

41Ne olo keatea mai te Fono Maluga mo te fiafia lasi, me ko taku'leia latou ne te Atua ona ko te fakamaseigina mō te igoa o Iesu.

42Kae i aso katoa, e se mafai eiloa o gata te lotou akoako atu kae lauga atu ki tino e uiga ki a Iesu te Keliso, i loto i te Fale Tapu io me i loto i fale o tino.