IOSUA 4 - Tuvalu Revised Bible

Ko Faka'tu a Fatu Fakamanatu

1I te taimi ko palele atu ei a te fenua o Isalaelu ki te sua feitu o te Iolitana, tena ne fai atu ei a te Aliki ki a Iosua penei,

2“Fili mai e tinogafulu mo te tokolua tagata mai matakaiga takitasi,

3kae fakatonu atu ke puke mai e sefulu lua fatu mai te kogaloto o te Vaitafe o Iolitana, mai te koga tela ne tu ei a faitaulaga. Fai atu ki a latou ke puke mai a fatu konei o tuku i te koga ka faka'tu ei otou faleie ma po nei.”

4Tena, ne kalaga atu a Iosua ki te tinogafulu mo te tokolua kola ko oti ne fili ne ia,

5kae fai atu penei ki a latou, “Olo atu i mua o te Pusa o te Feagaiga a te Aliki te otou Atua. Amo mai e takitasi fatu i te tino, e takitasi mō matakaiga takitasi o Isalaelu.

6A fatu konei ka fakamanatu ei ki tino a te mea ko oti ne fai ne te Aliki. I taimi fakamuli, kafai e fesili atu otou tamaliki me ne a uiga o fatu konei,

7kae ka tali atu koutou, i te vai o te Iolitana ne gata tena tafe i te taimi ne sopo ifo ei a faitaulaga mo te Pusa o te Feagaiga ki te Iolitana o olo ki te sua feitu. A fatu konei ka fakamasaua faeloa ki tino Isalaelu a te mea ne tupu i konei.”

8Tena, ne fai eiloa ne tagata kona a te fakatonuga a Iosua. E pela eiloa mo te fakatonuga a te Aliki ki a Iosua, ne puke mai eiloa ne te tinogafulu mo te tokolua kona a fatu e sefulu lua mai i te kogaloto o te Iolitana, e takitasi i matakaiga takitasi, tena ave ei ne latou ki te koga e nofo ei latou.

9Ne faka'tu foki ne Iosua a fatu e sefulu lua i te kogaloto o te Iolitana, i te koga ne tu ei a faitaulaga kola e amo ne latou a te Pusa o te Feagaiga. A fatu kona koi tu eiloa i kona.

10A faitaulaga ne tu eiloa i te kogaloto o te Iolitana ke palele katoa eiloa ne fai a mea ne fakatonu ne te Aliki ki a Iosua ke fai ne tino Isalaelu. Tena te mea ne fakatonu ne Mose.

Tena, ne fakavavave ei a tino o olo atu ki te sua feitu o te vaitafe.

11I te taimi ko palele katoa ei a tino ki te sua feitu o te vaitafe, ne toe olo atu a faitaulaga mo te Pusa o te Feagaiga a te Aliki o olo i mua o tino.

12A tagata i te matakaiga o Kato mo Leupena mo te afa o te matakaiga o Manase, kola ko toka mō te taua, ne olo i mua o te fenua katoa o Isalaelu, e pela mo te mea ne fai atu ne Mose ki a latou.

13E tusa mo te fasefulu afe tagata kola ko toka mo te taua, ne olo atu ki te sua feitu o te vaitafe ki te kogā koga laugatasi i tafa o Ieliko, i te takitakiga a te Aliki.

14A te mea ne fai ne te Aliki i te aso tena ko taku ei a Iosua se tagata takutakua ne tino Isalaelu. Ne fakaaloalo ne latou a ia i tena olaga katoa, e pela eiloa mo te fakaaloaloga sale ne latou a Mose.

15Tena ne fai atu ei a te Aliki ki a Iosua

16ke fakatonu atu ki faitaulaga kola e amo te Pusa o te Feagaiga ke olo aka ki luga mai i te vaitafe.

17Ne fai ne Iosua te fakatonuga tena,

18tela la, i te okoga o faitaulaga ki kaugutu o te vaitafe, ko te vai eiloa ko toe kamata o tafe tela ko toe lofia atu foki ei mo ona tafatafa.

19A tino Isalaelu ne olo atu ki te sua feitu o te Iolitana i te po sefulu o te masina muamua, tena ne fakamanava ei latou i Kilikala, i te feitu ki te saegala o Ieliko.

20I kona ne faka'tu ei ne Iosua a fatu e sefulu lua kola ne avaka mai te Iolitana.

21Muna a ia ki tino Isalaelu, “I aso fakamuli, kafai e fesili atu otou tamaliki me ne a uiga o fatu konei,

22kae ka fakamatala atu ne koutou ki a latou a te taimi ne ulu atu ei a tino Isalaelu i loto i te Iolitana i luga i te laukele malo.

23Fai atu ki a latou me ne faka'masa pakupaku ne te Aliki te otou Atua te Vaitafe o Iolitana ke ulu koutou i loto i ei ki te sua feitu, e pela mo te faka'masa pakupakuga ne ia o te Tai Kula.

24Mai i te mea tenei, ka iloa ei i te lalolagi katoa a te malosi o te mana o te Atua, tena ka fakaaloalo ei ne koutou a te Aliki te otou Atua ki te se gata mai.”