IOPU 7 - Tuvalu Revised Bible

1A te olaga o te tagata e pela me se olaga o sotia i se kautau,

Pela me se olaga o tino galue fi'ta,

2Pela me se pologa tela ko oko eiloa i te manako ki se malūga moko;

E pela me se tino galue e fakatalitali ki tena togi.

3I masina takitasi, e lavea ne au me e seai eiloa se pogai e 'tau ei au o ola i te olaga nei;

I po katoa, au e fanoanoa faeloa.

4Kafai e takato au o moe, kae gasolo o tuai te itula;

E moe fita au i te po, mo te manako ke na oko mai te vaveao.

5A toku foitino ko fonu i ilo, ko fonu i fakafoa;

A te aukau ko sali mai fua i oku mea pala.

6Au ko ola fua seai se fakamoemoega,

A oku aso ko makini eiloa pela mo te makini o te mea laga laugatu.

7Te Atua, masaua i toku ola se manava fua;

A toku fiafia ko leva eiloa ne gata mai.

8E lavea nei ne koe au, ka se toe lavea ne koe au.

Kafai e sala koe ki a au, ka ko au ka galo atu.

9-10A te tagata e mate kae se toe foki mai eiloa;

E pela eiloa mo te kaumana tela e matafi atu, galo eiloa,

E se toe manatua a ia ne tino kola ne masani mo ia.

11Ikai! Au se mafai o filemu! Au e kaitaua kae fita.

Au e tau o faipati.

12Ai a e leoleo ei ne koutou a au? A koutou e manatu pela i a au se manu fekai o te tai?

13E takato ifo au o taumafai o fai saku malologa;

Ke tai feoloolo toku mae.

14Ka ko koe — e fakamatakutaku ne koe au ki moemiti;

E aumai ne koe a fakaasiga mo moemiti masei,

15Ke oko ki te taimi ko talia ei ne au ke kumi au ke mate,

I lo te ola i te lalolagi faigata tenei.

16Au ko fiu; au ko fi'ta i te olaga nei.

Tuku mai au ke filemu. A toku olaga e seai se aoga.

17 Sala 8.4; 144.3 Ai a e tāua ei te tagata ki a koe?

Ai a e saga ei koe ki ana mea e fai?

18E sukesuke ne koe a ia i taeao katoa, e tofotofo ne koe a ia i minute katoa.

19Kilo fakaatea ke tai leva, ko te mea ke maua soku avanoa o folo oku suavale.

20Tino tausi pagota, e a, e pakia koe i taku agasala? Ai a e fakaaoga ei ne koe a au ke fai mo mea taketi a koe?

E a, ko to fakalavelave atu au ki a koe?

21E a, e se mafai ne koe o fakamagalo aku agasala?

E a, e se mafai ne koe o fakamagalo mai taku mea se ne fai?

E se leva nei, ka ko i lalo au i toku tanuga,

Ka sala koe ki a au, ka ko leva au ne fano.