SALAMO 63 - Tuvalu Revised Bible

Ko te Loto Nau ki te Atua

1Te Atua, ko koe eiloa toku Atua, e 'nau toku loto ki a koe.

A toku loto katoatoa e manako ki a koe;

Ko fia inu toku agaga ki a koe,

E pela mo se laukele malo, se ola me seai ne vai e maua i ei.

2Fakaasi ke matea ne au tou malosi mo tou 'malu;

Fakaasi ke matea ne au a koe i te faletapu.

3A tou alofa tumau e silia atu tena lei i te ola,

Tela e viki atu ei au ki a koe.

4E fakafetai atu au ki a koe i aso e ola ei au;

Ka sisi oku lima o 'talo atu ki a koe.

5E fiafia toku loto o kai ki mea 'lei ke makona,

Kae usu pese fiafia foki au o tavae atu ki a koe.

6Kafai e takato au i toku moega e masaua ne au koe;

E mafaufau foki au ki a koe i te po katoa,

7Me i a koe e fesoasoani faeloa ki a au.

E usu pese au mo te fiafia i lalo o te maluga o ou kapakau.

8Ko tuku atu toku loto ki a koe,

Ka ko tou lima e ola ei au.

9A latou kola e taumafai o tamate au ka olo ifo latou ki lalo i te fenua o tino 'mate.

10Ka 'mate latou i te taua,

E kai foki olotou foitino ne kuli vao.

11Ka fiafia te tupu me tuku ne te Atua te manumalo ki a ia.

A latou kola e fai olotou tautoga i te igoa o te Atua ka fiafia eiloa latou,

Ka ko tino loi ka pono olotou gutu.