FAKAASIGA 1 - Tuvalu Revised Bible

1Ko tusi i te tusi nei a mea kola ne fakaasi ne Iesu Keliso. Ne tuku atu ki a ia a mea konei ne te Atua, ko te mea ke fakaasi ne ia ki tavini a te Atua a mea ka 'tupu fakavave i se taimi pili mai. Ne fakaasi atu ne Keliso a mea konei ki tena tavini ko Ioane e alatu i tena agelu ne uga mai ne ia ki a ia.

2Ne tusi katoa ne Ioane a mea ne matea ne ia. Tenei la tena fakamatalaga e uiga ki te fekau mai i te Atua mo te mea tonu ne fakaasi ne Iesu Keliso.

3Amutia a te tino tela e faitau ki te tusi nei, amutia foki a latou kola e faka'logo ki te talaiga fakapelofeta, kae e tautali foki i mea e tusi i te tusi nei! Me ko pili mai a te taimi e taunu ei a fakaasiga konei.

Alofaaga ki Ekalesia e Fitu

4 Eso 3.14; Faka 4.5 A mea konei ne tusi ne Ioane ki Ekalesia e fitu i te fenua ko Asia:

Ke fai mō koutou a te alofa tauanoa mo te filemu mai i te Atua, tela e ola nei, ne ola mai mua eiloa, tela ko ia foki ka oko mai. Ke fai foki mo koutou te alofa tauanoa mo te filemu mai i agaga e fitu i mua o tona nofogaaliki.

5Isa 55.4; Sala 89.27Ke fai foki mo koutou te alofa tauanoa mo te filemu mai i a Iesu Keliso, tela ko te tino molimau fakamaoni, ko te Toekimua tela ne fakatu ake mai te mate, ko ia foki ko te pule o tupu o te lalolagi.

A Iesu Keliso e alofa mai ki a tatou, ko oti foki ne fakasaoloto ne ia a tatou mai i o'tou agasala e alatu i tona mate,

6Eso 19.6; Faka 5.10kae fai foki ne ia tatou ke fai mo malo o faitaulaga, o tavini atu ki te Atua te Tamana. Ke i a Iesu Keliso te 'malu mo te 'mana ki te se gata mai, ki te se gata mai eiloa! Amene.

7 Tani 7.13; Mata 24.30; Male 13.26; Luka 21.27; 1Tesa 4.17; Saka 12.10; Ioa 19.34,37; Saka 12.10; Mata 24.30 Kiloke, a Iesu tenei e vau i kaumana! Ka matea a ia ne tino katoa, fakatasi foki mo latou kola ne velo ne latou a ia. A tino katoa o te lalolagi, ka fanoa'noa ona ko ia. E tonu eiloa! Amene.

8 Faka 22.13; Eso 3.14 Muna a te Aliki te Atua tela e o ia te Malosi Katoatoa, “Au ko te Alefa mo te Omeka.” Ko tona uiga a te Aliki ko ia tela ne ola mai mua, e ola nei, ko ia foki tela ka oko mai.

Ko te Fakaasiga a Keliso

9Au ko Ioane tenei e tusi atu, ko te otou taina kelisiano, kae i te 'soko tasi mo Iesu, ko kau fakatasi atu ei au ki a koutou i puapuaga, i tona Malo, mo te kufaki. Au ne tuku ke nofo i te motu ko Patamo, i te mea ne folafola ne au a te muna a te Atua mo mea tonu ne fakaasi ne Iesu.

10Me ne takitaki au ne te Agaga i te Aso o te Aliki, kae ne lagona ne au a te leo maluga, pela mo te tagi o te pu, e faipati mai i oku tua penei,

11ana muna: “Tusi ki lalo a mea e matea ne koe, kae avatu a te tusi tenei ki Ekalesia e fitu: Efeso, Semulana, Pelekamo, Tuatila, Salataisa, Filatelefia mo Laotikaia.”

12Ne mafuli atu au ke matea ne au me ko oi tenei e faipati mai ki a au. Tela, matea ei ne au i kona a tulaga moli aulo e fitu.

13Tani 7.13; Tani 10.5Mai tulaga moli kona e 'tu mai, matea atu ei foki ne au se mea e foliga mai ki se tino, e pei mai ki te gatu e oko eiloa ki ona vae a te 'loa, kae 'sai a te kafanoa aulo i tona fatafata.

14Tani 7.9

Tani 10.6A tona laulu, e kena eiloa e pela mo fulufulu mamoe, io me e pela eiloa mo te kena o te kiona, ka ko ona mata e pela eiloa mo se afi ka ulaula;

15Esela 1.24; 43.2a ona vae e malapulapu eiloa e pela mo ne palasi e tunu i te mea tunu fiti, kae ne fakamalapulapu faka'lei foki ona vae, a tona leo e pela eiloa mo te 'gulu o te malosi o te vai e tafe ifo ki koga ma'lalo.

16E puke ne ia a fetu e fitu i tona lima fakaatamai, kae sae mai i tona gutu a te pelu e 'kai feitu lua. A ona foliga e malapulapu eiloa e pela mo te 'pula o te la i te tutonu.

17Isa 44.6; 48.12; Faka 2.8; 22.13I te mateaga ne au a ia, siga ifo ei au i ona vae e pela mo se tino ko mate. Ne puke mai ki a au a tona lima fakaatamai kae fai mai penei: “Sa mataku! Au ko te tino muamua mo te tino fakamuli.

18Au ko ia tenei e ola nei! Au ne mate, kae kiloke, au e ola ki te se gata mai, ki te se gata mai eiloa. Au e pule i te mate pela foki mo Seoli tela ko te koga o tino 'mate.

19Tela la, tusi ake a mea ko matea ne koe, ko mea e iai nei mo mea ka 'tupu i aso fakamuli.

20Tenei a te uiga 'funa o fetu e fitu kola ne matea ne koe i toku lima fakaatamai, pela foki mo tulaga moli aulo e fitu: a fetu e fitu ko agelu e tokofitu o Ekalesia e fitu, ka ko tulaga moli e fitu ko Ekalesia kona e fitu.”