IOPU Fakatomuaga - Tuvalu Revised Bible
FakatomuagaA te tusi o Iopu se tala o te tagata amio lei, tela ne puapuaga malosi — ne 'galo ana tamaliki mo ana kope katoa, kae ne pokotia foki ne se masaki masei. A te tino tusi tala i te tusi tenei, ne fakaasi mai ne ia a manatu o Iopu mo ona taugasoa e uiga ki mea kona ne tupu. Fakamuli eiloa, kae fakasae mai te Atua ki a Iopu.Ne fakamatala ne taugasoa o Iopu a tena puapuaga, e pela mo fakamatalaga masani faka‐te‐lotu. A te Atua, i olotou manatu, e aumai faeloa ne ia te taui lei ki tino amio lei, kae fakasala ne ia a tino amio masei. Tela la, a te puapuaga o Iopu e fakaasi mai i ei i a ia e agasala. Ka ko te manatu o Iopu, me e se tau o oko atu ki a ia se vaega fakasalaga pena, me i a ia e lei kae amiotonu. E se malamalama a ia, me ai a e fakapuapuaga ei penei a ia ne te Atua, tena la, ne fakafesili eiloa ne ia te Atua e uiga ki tena puapuaga. E seki vaivai eiloa te fakatuanaki o Iopu, kae ne taumafai eiloa a ia o fakatonu tena tulaga i mua o te Atua, i a ia se tagata e lei, ko te mea ke toe fakafoki mai ki a ia a tena tulaga fakaaloalogina.E seai se tali a te Atua ne fai ki fesili a Iopu, a tena tali, ko te fakaasiga fua o te ata o tena mana mo tena poto. Tena la, ne talia ne Iopu mo te loto maulalo a te poto mo te sili o te Atua, kae ko salamo foki a ia i ana pati se lei mo muna kaitaua kola ne faipati ne ia.A te tala fakaoti, e fakamatala mai a te toe fakafokiga o Iopu ki tena tulaga muamua, kae ko silia atu eiloa i te maumea i lo te taimi mua. Ne kote ne te Atua a taugasoa o Iopu me ne seki malamalama i te uiga o te puapuaga o Iopu. Ko Iopu fua e tai fakaataata ne ia i te Atua e silia atu tena iloa, i lo te manatu faka‐te‐lotu i taimi kona e uiga ki a ia.Ko Fakasologa o MataupuFakatomuaga 1.1—2.13Iopu mo ona taugasoa 3.1—31.40a. Fakatagi a Iopu 3.1-26e. Sautalaga muamua 4.1—14.22i. Sautalaga i te lua 15.1—21.34o. Sautalaga i te tolu 22.1—27.23u. Vikiga o te poto 28.1-28f. Takutonuga a Iopu 29.1—31.40Faipatiga a Eliu 32.1—37.24Tali a te Aliki ki a Iopu 38.1—42.6Fakaotiga 42.7-1
