2 TUPU 17 - Tuvalu Revised Bible

Ko Hosia, te Tupu o Isalaelu

1I te sefululua o tausaga o te nofoaiga a Aasa i Iuta, ne fai ei a Hosia te tama tagata a Ela mo tupu o Isalaelu, kae ne tupu a ia i Samalia i tausaga e iva.

2Ne agasala a ia ki te Aliki, kae e tai lei atu a ia i lo tupu kola ne pulepule ne latou Isalaelu i mua o ia.

3A te Tupu o Asulia ko Salamanesa ne faitaua ki a ia; ne takavale Hosia i a Salamanesa, tena ne togi lafoga sale a ia ki a Salamanesa i tausaga takitasi.

4I te tausaga e tasi, ne uga a avefekau a Hosia ki a So, te tupu o Aikupito, o fakamolemole ki ei ke fesoasoani atu ki a ia, tena kae fakagata foki ei tena togi lafoga ki Asulia. I te logoga o Salamanesa i te faiga tena, tena ne puke ei ne ia a Hosia o sai i te falepuipui.

Ko Takavale Samalia

5Tena, ne fanatu Salamanesa o taua ki Isalaelu, kae nikoi ne ia Samalia. I te tolu o tausaga mai te taimi ne taumafai ei te tupu o Asulia o puke Samalia,

6ko te iva o tausaga tena o te nofoaiga a Hosia, ne fakatakavale ei ne ia a te fa'kai o Samalia, kae ave fakapagota ne ia a tino Isalaelu ki Asulia, kae tuku atu ne ia a nisi o latou ke nofo i te fa'kai o Hala, nisi ke nofo i tafa o te Vaitafe o Hapola i te kogā fenua o Kosana, ka ko nisi i fa'kai o Metai.

7A Samalia ne takavale me i tino Isalaelu ne agasala ki te Aliki te lotou Atua, tela ne fakasao ne ia latou mai te tupu o Aikupito, kae taki atu foki latou keatea mai Aikupito.

8Ne tapuaki latou ki atua fakaatea, kae tau'tali i tu a tino kola ne afuli ne te Aliki keatea mai te fenua i te taimi ne o'mai ei tena fenua o nofo i ei. Ne fakaakoako foki latou ki amioga fou ne aumai ne tupu o Isalaelu.

9A tino Isalaelu ne fai ne latou a mea kola e se fiafia ki ei te Aliki te lotou Atua. Ne faite ne latou a koga tapuaki fapaupau i olotou fa'kai katoa, mai fa'kai foliki ke oko eiloa ki fa'kai lasi.

10 o sui a tino Isalaelu kola ne ave fakapagota. Ne puke mo latou a fa'kai kona, nofo eiloa i ei.

25I te kamataga o nofo a tino kona i fa'kai o Samalia, ne seki tapuaki latou ki te Aliki, tena ne uga mai ei ne te Aliki a leona kola ne 'ta ne latou a nisi o tino kona.

26Ne oko atu te fakailoaga ki te tupu o Asulia me i tino kola ne tuku ne ia ke nofo i fa'kai o Samalia, e se iloa ne latou a tulafono a te atua o te fenua tena, tena la, ne uga mai ne te Atua a leona ke 'ta a tino kona e nofo i fa'kai kona.

27Tena ne fai atu ei a te fakatonuga a te tupu penei: “Fakafoki atu se faitaulaga mai faitaulaga kola ne ave fakapagota ne tatou, ke fano o nofo i kona, ke akoako ne ia a tino i kona ki tulafono a te atua o te fenua tena.”

28Tena la, ne fano ei te faitaulaga e tokotasi, tela ne puke fakapagota mai i Samalia, o nofo i Peteli kae akoako ne ia a tino ke tapuaki atu ki te Aliki.

29Ka ko tino kola ne nofo i Samalia ne tumau faeloa o faite olotou tupua, kae tuku ne latou ki koga tapuaki kola ne faite ne te kau Isalaelu. A potukau takitasi e fakatau faite eiloa olotou tupua i fa'kai e nofo ei latou:

30a tino Papelonia e faite ne latou a tupua o te atua ko Sukota Penota; a tino Kuta e faite ne latou a tupua o te atua ko Nelekala; a tino o Hamata e faite ne latou a tupua o te atua ko Asima;

31a tino Iva e faite ne latou a tupua o te atua ko Nipasa mo Tataka; ka ko tino o Sefavaima e 'ta olotou tama mo fai taulaga ki te lotou atua ko Atameleko mo Anameleke.

32A tino konei e tapuaki foki ki te Aliki, kae e fili mai foki ne latou mai olotou tino, so se tino ke fai mo faitaulaga i koga tapuaki fapaupau kae ke ofo foki ne latou a taulaga a latou i koga kona.

33Tena la, e tapuaki latou ki te Aliki, kae e tapuaki foki ki olotou atua e pela eiloa mo tu o fenua kola ne o'mai ei latou.

34 Kene 32.28; 35.10 A tino kona, koi tauave mai eiloa a tu taumua a latou ke oko mai ki aso nei. E se tapuaki latou ki te Aliki, e se tausi foki ki tulafono mo fakatonuga kola ne tuku ne te Aliki ki tino o te gafa o Iakopo, tela ne fakaigoa ne ia ko Isalaelu.

35Eso 20.5; Teu 5.9 A te Aliki ne fai tena feagaiga ki tino Isalaelu kae fakatonu atu ki a latou penei: “Sa tapuaki ki atua fakaatea; sa ifo ki atua kona, io me tavini ki ei; sa ofo foki ne otou taulaga ki ei.

36Teu 6.13 A koutou e tau o faka'logo mai ki a au, ko te Aliki tela ne aumai ne ia koutou keatea mai Aikupito ki tena 'mana malosi; a koutou ke ifo mai ki a au kae ofo mai otou taulaga ki a au.

37E 'tau mo koutou o tausi ki tulafono mo fakatonuga kola ne tusi atu ne au mo koutou. E se 'tau koutou o tapuaki atu ki nisi atua,

38kae ke sa puli i a koutou a te feagaiga ne fai ne au mo koutou.

39E 'tau mo koutou o faka'logo mai ki a au, te Aliki otou Atua, kae ka faka'sao ne au koutou mai otou fili.”

40Ka ko tino kona e se fia faka'logo eiloa, kae e tumau faeloa o tau'tali i tū mua a latou.

41Tena la, a tino kona e tapuaki ki te Aliki, kae e tapuaki foki ki olotou tupua; a tino o olotou gafa i aso nei e tau'tali foki eiloa ki olotou faiga.