ISAIA 51 - Tuvalu Revised Bible

Ko Muna Fakamafanafana ki a Ielusalema

1Muna a te Aliki,

“Fakalogo mai ki a au, koutou kona e manako ke fakasao koutou,

Koutou kona e o'mai ki a au mo se fesoasoani.

Mafaufau ki te kaupapa ne o'mai ei koutou,

Ki te koga ne keli mai ei koutou.

2Mafaufau ki te otou tupuga ko Apelaamo,

Pela foki a Sala tela ne tupu mai ei koutou.

I te taimi ne kalagagina ei ne au a Apelaamo,

Kae e seki ai ei sena tamaliki.

Ne fakamanuia ne au a ia,

Tuku atu ei ne au se fanau ki a ia;

Ne fakatokouke ne au a tena gafa.

3“Ka fakaasi toku alofa ki a Ielusalema,

Pela foki ki a latou katoa kola e nofo i ona koga ne maofa.

E ui eiloa ne masei valevale tena fenua,

Kae nei ka fai ne au mo fatoaga,

E pela mo te fatoaga tela ne toki ne au i Etena.

Ka iai te lifu mo te fiafia i kona,

Pela foki a pese o tavaega mo fakafetai ki a au.

4“Toku fenua, fakalogo mai ki a au,

Fakalogo mai ki aku muna:

Ne avatu ne au aku poloakiga ki malo;

Ko aku tulafono ka aumai ei latou ki te mainaga.

5Au ka vau fakavave o fakasao latou;

A te taimi o toku manumalo ko pili mai.

Au ka pule i malo.

A fenua mao e fakatali mai ke fanatu au;

E fakatalitali mo te fakamoemoega ke fakasao latou ne au.

6Kilo aka ki lagi; kilo atu ki te lalolagi!

A lagi ka galo atu e pela me se au;

A te lalolagi ka pala pela me se laugatu ko leva,

Ka ko tino katoa i ei ka mate e pela me ne lago.

Ka ko te fakaolataga tenei ka aumai ne au,

Ka tumau ki te se gata mai;

A toku manumalo ka tumau ki te se gata mai.

7Fakalogo mai, koutou kola e iloa ne koutou te mea tonu,

Kola e taofi mau ki aku akoakoga.

Sa ma'taku manafai e fakalili koutou ne tino kae faka'itaita ki a koutou;

8Ka galo atu latou e pela me ne laugatu ne kai ne mogamoga!

Ka ko te fakaolataga tenei ka aumai ne au

Ka tumau ki te se gata mai;

A toku manumalo ka tumau ki te se gata mai.”

9Te Aliki, ala ake o fesoasoani mai ki a matou!

Fakaaoga tou mana o fakasao matou;

E pela mo te fakaaogaga sale ne koe i aso taumua.

Ko koe ne katikati ne koe a Lahapa,

Te manu fakamataku o te tai.

10Ko koe foki ne faka'masa pakupaku ne koe a te tai

Kae fai te auala i loto i ei, ko te mea

Ke mafai o olo i loto a latou kola e fakasao ne koe.

11A latou kola ne fakasao ne koe

Ka oko atu ki Ielusalema mo te fiafia,

E usu pese kae kalaga mo te fiafia.

Ka fiafia latou ki te se gata mai,

Me ko sao ki te se gata mai, mai i te nofo fanoanoa.

12Muna a te Aliki,

“Ko au ne fai ne au koe ke malosi.

Ai a e mataku ei koe ki te tagata ola,

Tela e se tumau pela fua me se mouku?

13Ko puli i a koe a te Aliki tela ne faite ne ia a koe,

Tela ne fola ne ia a lagi

Kae fakavae ne ia a te fakavae o te lalolagi?

Ai a ka nofo mataku faeloa ei koe

Ki te kaitaua o latou kola e pule fakasaua ki a koe,

Pela foki ki a latou kola e fakatoka o ta fakamasei a koe?

A te lotou kaitaua e se toe mafai o oko atu ki a koe.

14A latou kola e nofo fakapagota ko pili nei o fakasaoloto;

Ka ola latou i se olaga leva

Kae uke olotou meakai e maua.

15“Au ko te Aliki te otou Atua;

E fakagasue ne au te tai

Kae fai ne au ona galu ke pa'ku.

A toku igoa ko te Aliki Malosi!

16Ne fola ne au a lagi,

Kae fakatakato ne au a te fakavae o te lalolagi.

Ne fai au ki a Ielusalema penei,

‘A koe ko toku fenua!

Ko oti ne avatu ne au ki a koe aku akoakoga,

Kae ne puipui ne au a koe ki toku lima.”’

Ko Gata te Puapuaga o Ielusalema

17 Faka 14.10; 16.19 Ielusalema, ala mai!

Ala mai kae tu mai ki luga!

Ko oti koe ne inu i te ipu o te fakasalaga tela

Ne avatu ne te Aliki i tena kaitaua ke inu koe ki ei;

Ne inu koe ki ei, kae ne takasese ei koe.

18E seai se tino e taki ne ia koe,

E seai se tino mai i tino o tou fenua ke puke mai ki tou lima o taki koe.

19E lua mea faigata ne oko atu ki a koe:

Tou fenua ne fakamaseigina i te taua,

Mo ou tino ne mate fia'kai.

E seai se tino ke alofa atu ki a koe.

20I feitu o auala katoa

A ou tino ko siga valevale fua i te vaivai;

Ko pela me ne 'tia kola e lave i te tili a te tagata afuli manu.

Ko oti ne lagona ne latou a te malosi o te kaitaua o te Atua.

21Koutou tino Ielusalema kona e puapuaga,

Koutou kona e takasese pela me ne tino kona,

22A te Aliki te otou Atua e pulu ne ia koutou kae fai mai penei,

“Ka ave nei ne au keatea a te ipu tela ne avatu ne au i toku kaitaua.

Ka se toe inu koutou i te uaina tela e fai ne ia koutou ke takase'se.

23Ka tuku atu ne au ki a latou kola ne pule fakasaua ki a koutou,

Kola ne fai ne latou koutou ke takato i auala

Kae lakalaka ne latou koutou,

E pela koutou me ne pefu.”