IOPU 35 - Tuvalu Revised Bible

1-2Iopu, e se tonu tau faipatiga

tela e fai pela i a koe e mā i mua o te Atua,

3E se tonu foki tau fesili ki te Atua penei,

“Se a tou lagona i aku agasala? Se a te lei e maua ne au manafai e se agasala au?”

4Ka tali atu au ki tau faipatiga, pena foki te faipatiga a ou taugasoa.

5Kilo aka ki te lagi! E lavea ne koe te maluga o kaumana!

6 Iopu 22.2,3 Kafai koe e agasala, e seai eiloa se mea e afaina ei te Atua.

Kafai e uke a taimi e agasala ei koe,

E mata e afaina ei te Atua?

7I tau fakatau, e isi se fesoasoani e fai ne koe ki te Atua manafai e amiotonu koe?

E seai se mea e manako ki ei te Atua mai i a koe.

8Ko tagata foki eiloa e puapuaga i au agasala,

A te lei e fai ne koe, e fesoasoani ki a latou.

9Kafai ko fakasauagina a tagata, kae e 'tagi;

E 'tagi fua ki se tino ke vau o fakasao latou.

10E se 'tagi ki te Atua tela ne faite ne ia latou,

Tela ne aumai ne ia se fakamoemoega lei ki a latou i te taimi ne puapuaga malosi ei latou.

11E se 'tagi atu latou ki te Atua, tela ne fai ne ia tatou ke 'poto,

Ke 'poto atu i manu o te laukele mo manu eva.

12E 'tagi atu latou mō se fesoasoani, ka ko te Atua e se tali mai eiloa ki a latou,

Me i a latou ne tino fakamatamata kae amio ma'sei.

13E seai se aoga e kalaga atu ei latou;

A te Atua Malosi e se matea ne ia latou,

Se lagona foki ne ia olotou 'tagi.

14Iopu, a koe ne fai mai me e se mafai ne koe o lavea te Atua;

Fakatali mo te loto kufaki, a tau mataupu tena ko i ona mua.

15I tau faka'tau, a te Atua e se ti fakasala ne ia a tino,

Kae se saga malosi ki tino fai agasala?

16E seai se aoga e faipati faeloa mai ei koe;

Ko lavea atu me i a koe e sona faipati fua se iloa ne koe au pati e fai.