1I te taeao malu eiloa o te sua aso, ne ma'taga aka Iosua mo te kau Isalaelu, tiakina ei ne latou te koga ne ma'nava ei latou tela ko Akasia, kae olo atu ki te Vaitafe o Iolitana, o fakama'nava i ona tafa, o fakatalitali o sopo atu i ei ki te sua feitu.
2E tolu aso mai tua ifo, ne olo atu a takitaki i loto i te fa'kai
3kae fai atu ki tino penei, “Kafai ko lavea ne koutou a faitaulaga ko amo ne latou a te Pusa o te Feagaiga a te Aliki te otou Atua, na tu eiloa o tala otou faleie o tautali i ei.
4A koutou e seki oko mai eiloa ki koga konei muamua, tela la, ko latou e fakasino ne latou te auala. Sa fakapilipili ki te Pusa o te Feagaiga; a te mao o koutou mai i ei e tusa mo te kilomita e tasi mai ona tua.”
5Muna a Iosua ki tino Isalaelu, “Faka'ma otou foitino, me i te aso taeao ka fai ei ne te Aliki ne mea fakaofoofogia.”
6Tena, ne fai atu ei a ia ki faitaulaga ke puke a te Pusa o te Feagaiga o olo i mua o tino. Tena, ne fai eiloa ne latou e pela mo tena fakatonuga.
7Muna a te Aliki ki a Iosua, “A te mea e fai ne au i te aso nei, ka fai ne ia koe ke takutakua i mua o tino Isalaelu katoa, kae ka iloa foki ne latou i a au e fakatasi atu ki a koe e pela mo au e fakatasi sale ki a Mose.
8Fai ki faitaulaga kola e amo i te Pusa o te Feagaiga me kafai e oko atu latou ki te vaitafe, e tau latou o olo i loto i te vai o tu i kaugutu o te vaitafe.”
9Tena, ne fai atu ei a Iosua ki tino Isalaelu penei, “O'mai ki konei o fakalogologo ki muna a te Aliki te otou Atua e fai atu ki a koutou.
10I te taimi e mati atu ei koutou, e afuli keatea eiloa ne ia a tino Kanana, tino Heti, tino Hivi, tino Pelise, tino Kilikase, tino Amoli mo tino Iepuse. Ka iloa ne koutou i te Atua ola e fakatasi atu ki a koutou
11mafai ko mua atu a te Pusa o te Feagaiga a te Aliki o te lalolagi katoa ki te sua feitu o te Iolitana.
12Fili mai nei e tinogafulu mo te tokolua tagata, e taki tokotasi mai matakaiga takitasi o Isalaelu.
13I te taimi eiloa e laka ifo ei a vae o faitaulaga kola e amo te Pusa o te Feagaiga ki te vaitafe, ko te vai eiloa o te Iolitana ka se tafe, ka ko te vai tela e tafe mai i luga i mauga ka akutu ki se koga e tasi.”
14-15A te taimi tenei ko te taimi e kati ei a te taukai, ka ko te vaitafe e lofia i te vai. I te taimi ne tiakina ei ne tino Isalaelu a te koga ne ma'nava ei latou o olo atu ki te sua feitu o te Iolitana, ka ko faitaulaga ne olo i olotou mua mo te Pusa o te Feagaiga. I te taimi ne sopo ifo ei a faitaulaga ki te vaitafe,
16ko te vai eiloa o te vaitafe ko se tafe, kae ko akutu katoa i te koga e tasi, i te fa'kai o Atamu i tafa o Saletana. A te vai tela e tafe sale ki lalo i te Tai Mate ko se tafe eiloa, tela la, ko mafai ei ne tino Isalaelu o olo i loto i ei ki tafa o Ieliko.
17I te taimi ne sasale atu ei a te fenua i loto i te Iolitana, i luga i te laukele malo, ka ko faitaulaga kola e amo i te Pusa o te Feagaiga e tu i luga i te laukele malo, i te kogaloto o te Iolitana ke oko eiloa ki te taimi ne palele atu ei a te fenua ki te sua feitu.
Who We AreWhat We EelieveWhat We Do
2025 by iamachristian.org,Inc All rights reserved.
