1 TUPU 17 - Tuvalu Revised Bible

Te Oge Vai i Aso o Elia

1 Iako 5.17 E isi se pelofeta e igoa ki a Elia mai te fa'kai o Tisepi i Kileata, ne fano o faipati ki te Tupu ko Aapo penei, “Ko fakailoa atu nei ne au i te igoa o te Aliki, te Atua ola o Isalaelu, tenei e tavini au ki ei, me ka se toe ai ne vaiua io me ne vai i se lua io me se tolu tausaga, ke oko eiloa ki te taimi e toe fai ei ne au ke isi ne vaiua.”

2Tena, ne fai mai ei te Aliki ki a Elia penei,

3“Tiaki te koga tenei, kae fano ki te saegala o muni i tafa o te vai o Kilita, i te feitu ki te saegala o te Iolitana

4A koe e inu i te vai tena, kae ko oti ne fakatonu ne au a manu eva ko oleva ke aumai sale ne latou au meakai.”

5Ne fakalogo Elia ki te fakatonuga a te Aliki, tena ne fano ei a ia o nofo i tafa o te vai o Kilita.

6E inu eiloa a ia i te vai tena, ka ko ana falaoa mo kano manu e aumai sale eiloa ne manu eva ko oleva i taeao mo afiafi takitasi.

7E seki leva foki, ko te vai eiloa tena ko masa pakupaku, me ko leva seki ai eiloa ne vaiua.

Ko Elia mo te Fafine ko Mate tena Avaga i Salefata

8Tena ne fai atu ei te Aliki ki a Elia penei,

9Luka 4.25,26 “Fano nei ki te fa'kai o Salefata i tafa o Saitonu o nofo i ei. Ko oti ne fakatonu ne au te fafine ko mate tena avaga i kona ke fagai ne ia a koe.”

10Tena ne fano eiloa a Elia ki Salefata, kae i tena okoatuga ki te mataloa o te fa'kai ne matea ei ne ia te fafine ko mate tena avaga e tae fafie. Muna a Elia ki te fafine tena, “Fakamolemole aumai aka ne vai ke inu au.”

11I te fanoga o te fafine o aumai ne vai, kae ne toe kalaga atu foki a Elia ki ei ke fakamolemole ke aumai foki ne mu falaoa.

12Ne tali atu te fafine tena penei, “Au e tauto atu i te igoa o tou Aliki ola, me e seai ne aku falaoa. E isi la ne mu falaoa mata a aku i loto i te pōla, mo ne mu sinu olive ei i loto i te tiā. Au ne vau o fai fafie i konei ke fano mo au ki toku fale, ke tunu ki ei a mu falaoa kona ma maua mo taku tama tagata. Kaati tena eiloa te 'toe 'kaiga a maua, ko 'nofo ei maua pela ke mate i te fia'kai.”

13Muna a Elia ki te fafine tena, “Sa manavase. Fano koe o fakatoka te meakai a koulua. Masaua o faite mai mua se tamā puta falaoa i lua falaoa kona, ka oti ko faite ei a mea a koulua kona e 'toe ma koulua mo tau tama.

14Me konei a muna a te Aliki, te Atua o Isalaelu: ‘A te falaoa i loto i te pōla tena ka se mafai o palele, pena foki te sinu olive tena i loto i te tiā, ke oko eiloa ki te aso tela e fakato ei ne au a te vaiua.’ ”

15Ne fano eiloa te fafine tena o fai te mea tela ne fai atu ne Elia, tena ne kai makona eiloa latou kona i aso e uke.

16E pela eiloa mo muna a te Aliki ki a Elia, a te falaoa i te pola mo te sinu olive i te tia e seki palele eiloa.

17I se taimi fakamuli, ne masaki malosi te tama tagata a te fafine tena, mate eiloa.

18Muna a te fafine tena ki a Elia, “Tagata o te Atua, ai a ko fai ei ne koe te mea tenei ki a au? A koe na ne vau fua ke masaua ne te Atua aku agasala, ko tamate ei taku tama tagata?”

19Muna a Elia penei, “Tuku mai te tamaliki ki a au.” Ne puke aka ne ia a te tamaliki mai lima o te fafine tena, ave ne ia ki luga i tena potu, fakatakato ei ne ia ki luga i te moega.

20Tena ne 'talo ei a ia penei, “Te Aliki toku Atua, ai a ko fai ei ne koe a te mea tenei ki te fafine tenei? A ia ne alofa mai ki a au o tausi fakalei au, kae tenei ko oti ne tamate ne koe a tena tama tagata!”

212Tupu 4.34,35 Ne takato fakafaō a Elia i luga i te tamaliki e fakatolu taimi, kae talo, muna a ia, “Te Aliki toku Atua, fakaola aka te tamaliki tenei!”

22Ne talia ne te Aliki te talo a Elia, tena, ko te tamaliki eiloa ko toe manava aka, te mea eiloa ko ola.

23Ne puke ifo ne Elia te tamaliki ki lalo i tena matua, kae fai atu ki ei penei, “Kiloke, ko ola tau tama!”

24Muna a te fafine tena penei, “Ko iloa nei ne au i a koe se pelofeta a te Atua, ka ko te Aliki e faipati mai sale e auala i a koe!”