ESEKIELU 37 - Tuvalu Revised Bible

Ko te Vanu o Ivi Malo

1Ne lagona ne au ki toku foitino a te mana o te fakatasi mai o te Aliki, tena ne puke ake au ne tena agaga o ave o tuku i te vanu tela e fonu i ivi.

2Ne taki ne ia au i loto i te vanu tena, kae ne lavea ne au a ivi e uke kae ko oko eiloa i te malō.

3Ana muna ki a au, “Te tagata ola, e mafai o toe ola ake a ivi konei?”

Ne tali atu au penei, “Te Aliki Sili, ko koe fua e mafai o tali ne koe a te fesili tena!”

4Muna a ia penei, “Fai au muna fakapelofeta ki ivi kona. Fai ki ivi malō kona ke fakalogo mai ki muna a te Aliki.

5Fai ki ei i a au, te Aliki Sili, ko fai atu ki a latou penei: Ka tuku atu ne au a te manava ki a koutou kae toe fakaola mai kou.

6Ka tuku atu ne au a kano mo uaua, kae ufi atu mo te pakili mai i tua. Ka tuku atu ne au te manava ki a koutou kae toe fakaola mai koutou. Tena, ka iloa ei ne koutou i a au ko te Aliki.”

7Tena, ne fai ei aku muna fakapelofeta, e pela eiloa mo te fakatonuga ki a au. I te taimi ne faipati ei au, kae lagona ne au te leo o mea e gasuesue, tena la, ko ivi ko kamata o soko fakatasi.

8Ne onoono atu eiloa au i te pikiga o kano mo uaua ki ivi, kae ufi mai i tua ko te pakili. Kae e seki ai se manava kai oko ki foitino kona.

9Muna a te Atua ki a au, “Te tagata ola, fai au muna fakapelofeta ki te matagi. Fai ki te matagi i te Aliki Sili ko fakatonu atu ki ei ke agi mai i feitu katoa, ke manava ki loto i foitino mate kona, ke toe fakaola.

10 Faka 11.11 Tena, ne fai eiloa aku muna fakapelofeta e pela eiloa mo te fakatonuga ne fai mai ki a au. Ne ulu atu te manava ki loto i foitino kona, tena ne ola ei, ko te mea eiloa ko tu ki luga. A te tokouke o latou e lava eiloa i ei se kautau.

11Muna a te Atua ki a au, “Te tagata ola, a tino Isalaelu e penei mo ivi konei. E fai mai olotou muna i a latou ko mage valevale, ko seai se fakamoemoega o latou mo aso fakamuli.

12Tela la, faipati atu fakapelofeta ki toku fenua ko Isalaelu, kae fai ki ei i a au, te Aliki Sili, ka tala ne au a pono o olotou tanuga. Ka avake ne au latou o toe fakafoki mai ki te fenua o Isalaelu.

13Kafai ko tala ne au a tanuga kola e tanu ei oku tino, o aumai latou ki tua, ka iloa ei ne latou i a au ko te Aliki.

14Ka manava atu au ki a latou, o toe fakaola mai latou, kae tuku ke nofo i te lotou fenua tonu. Tena la, ka iloa ei ne latou i a au ko te Aliki. Au ne tauto me e fai ne au a te mea tenei — e fai eiloa ne au. Ko au, te Aliki, tena ne faipati atu.”

Iuta mo Isalaelu ko Fai mo Malo e Tasi

15A te Aliki ne toe faipati mai ki a au,

16ana muna, “Te tagata ola,” puke mai se potulakau kae tusi i luga i ei a muna konei, ‘Te malo o Iuta.’ Ka oti ko puke te sua potulakau, kae tusi i ei a muna konei, ‘Te malo o Isalaelu.’

17Tena la, ko taofi ei ne koe ki ou lima a lakau kona, mo o la mata e fepaki ki loto, tela la, e pela me se lakau e tasi.

18Kafai e fesili atu tou fenua ke fakaasi atu ki a latou a te uiga o te mea tena,

19fai ki ei i au, te Aliki Sili, ka puke mai ne au a te lakau tela e tusi i ei a te igoa o Isalaelu o tuku fakatasi mo te lakau tela e tusi i ei a te igoa o Iuta. Ka fai ne au a lakau kona e lua ke tasi, kae taofi ne au ki toku lima.

20“Taofi a lakau kona ki tou lima, ke lavea ne tino.

21Tena la, ko fai ei koe ki a latou i a au, te Aliki Sili, ka puke mai ne au a tino o toku fenua mai i malo kola ne olo ki ei latou, kae fakamaopoopo mai latou o fakafoki mai ki te lotou fenua tonu.

22Ka tuku fakatasi ne au latou ke fai mo malo e tasi i luga i te fenua, i luga i mauga o Isalaelu. Ka tasi te tupu e pule i a latou, kae ka se toe mavae latou o fai mo malo e lua.

23Ka se toe fakalailai olotou foitino i tupua mataga io me fakapuapuaga latou i agasala. Ka fakasao ne au latou mai i auala masei kola ne masani o agasala mai sale ei latou ki a au kae fulitua mai ki a au. Ka faka'ma ne au latou; ka fai latou mo oku tino ka ko au ka fai mo Atua o latou.

24Eseki 34.24 Ka fai mo tupu o latou se tupu pela eiloa mo taku tavini ko Tavita. Ka tasi latou i lalo o te pule e tokotasi, kae ka tausi fakamaoni ki aku tulafono.

25Ka nofo latou i te fenua tela ne tuku ne au ki taku tavini ko Iakopo, te fenua ne nofo ei olotou tupuga. Ka nofo tumau latou i kona, pena foki olotou tamaliki mo tino katoa e tupu mai i a latou. Ka pule latou ne se tupu pela mo taku tavini ko Tavita ki te se gata mai.

26Ka fai ne au se feagaiga mo latou tela ka puipui ei latou ke saogalemu ki te se gata mai. Ka fakamautu ne au latou kae fakatokouke, kae fakatu toku Faletapu i te lotou fenua, kae ka tu i kona ki te se gata mai.

272Koli 6.16; Faka 21.3 Ka nofo fakatasi au mo latou i kona; ka fai au mo Atua o latou, ka ko latou ka fai mo oku tino.

28Kafai ko fakatu ne au toku Faletapu i te lotou fenua ki te se gata mai, tena la, ko iloa ei ne malo i a au, te Aliki, ko oti ne filifili ne au a Isalaelu ke fai mo oku fenua tonu.”