2 NOFOAIGA TUPU 8 - Tuvalu Revised Bible

Ko Mea ne Fai ne Solomona(1Tupu 9.10-28)

1E tusa mo te luasefulu tausaga ne faite ei ne Solomona a te Faletapu mo tena palesi.

2Ne toe fakafou ne ia a fa'kai kola ne aumai ne te Tupu ko Hilamo, kae uga ne ia a nisi tino Isalaelu ke olo o nofo i ei.

3Ne fakatakavale ne ia a te kogā laukele o Hamata mo Sopa,

4kae fai ne ia a te pui o te fa'kai ko Palamila i te vao. Ne toe faite faka'lei ne ia a fa'kai katoa i Hamata, kola ko koga e teu ei meakai.

5Ne toe fakafou foki ne Solomona a fa'kai konei: Peta Holono ki luga mo Peta Holono ki lalo, ne fa'kai ne fakaolo, kae e pui ki fiti,

6te fa'kai o Palata, fa'kai katoa kola e teu ei meakai, mo fa'kai e tuku i ei ana solofanua mo kaliota. Ne fakataunu eiloa ne ia a fuafuaga a ia ki mea e tau o faite ne ia i Ielusalema, Lepanona, mo te kogā fenua katoa tela e pule ne ia.

7-8Ne fakagalue fakapologa ne Solomona a tino i te gafa o tino Kanana kola e seki tamate ne te kau Isalaelu i te taimi ne puke ei ne latou a te fenua. E aofia i konei, ko tino Heti, Amoli, Pelise, Hivi, mo tino Iepuse, ko tino i olotou gafa koi tumau eiloa o fai mo pologa ke oko mai ki aso nei.

9A tino Isalaelu e se galue fakapologa, kae galue i tofiga sotia, ofisa o kautau, takitaki i kau kaliota, mo tino i solofanua.

10E tusa mo te lua lau mo te tinolima ofisa e pulepule ne latou a galuega a pologa, i mea kola e faite.

11Ne fakamasiki atu ne Solomona a tena avaga, te tama fafine a te tupu o Aikupito, mai i te Fa'kai o Tavita ki te fale ne faite ne Solomona mō ia. Muna a Solomona penei, “E se tau mo ia o nofo i te palesi o te Tupu o Isalaelu ko Tavita, me i so se koga ne tuku ei a te Pusa o te Feagaiga e tapu.”

12Ne ofo atu ne Solomona a taulaga ki te Aliki i luga i te fata-fai-taulaga tela ne faite ne ia i mua o te Faletapu.

13Nume 28.9,10; Nume 28.11-15; Eso 23.14-17; 34.22,23; Nume 28.16—29.39; Teu 16.16 Ne ofo atu ne ia a taulaga sunu e pela eiloa mo te mea e manakomia i te Tulafono a Mose mō aso fakamanatu takitasi: ko Sapati, ko Kaiga Fiafia o Masina Tu, mo kaiga fiafia ei kola e tolu i te tausaga — ko te Kaiga o Falaoa se Faka'fete, ko te Kaiga Fiafia o te Katiga o Lakau Kaina, te Kaiga Fiafia o Fale Fakamalumalu.

14Ne fakasoa foki ne Solomona a galuega fai a faitaulaga i aso takitasi, pela foki te kau sa Levi kola e fesoasoani ki faitaulaga, i te usuga o pese mo te faiga o olotou galuega. Ne fai ne ia a te mea tena, e pela eiloa mo tulafono ne fakamoe ne tena tamana ko Tavita. Ne fakasoa foki ne ia a sotia tiute o te Faletapu i vaega takitasi, e fakatau ki te faiga o olotou tiute i aso takitasi, i mataloa takitasi, e pela eiloa mo te fakatonuga a Tavita, te tagata o te Atua.

15A fakatonuga kola ne tuku atu ne Tavita ki faitaulaga mo te kau sa Levi, e uiga ki potu teu koloa, mo nisi mea ake foki, ne fakataunu faka'lei katoa.

16I te taimi tenei, a galuega katoa a Solomona ko palele katoa. A te faitega o te Faletapu, mai i te fakatakatoga o te fakavae ke oko ki te taimi ne palele katoatoa ei, ne fanofano lei mo te manuia.

17I te otiga o mea kona, ko Solomona eiloa ko fano ki Esionikepa mo Elata, ko taulaga o vaka i te matafaga o te Mataosoga o Akapa, i te fenua o Etoma.

18Ne avatu ne te Tupu ko Hilamo ki a Solomona a vakamutu e kapeni i ei ana ofisa, kae kauvaka ne ana kauvaka masani. Ne malaga latou mo ofisa a Solomona ki te fenua o Ofeila, kae aumai ne latou ki a Solomona e tusa mo te sefululima afe kilokalame o te aulo.