FAATAOTO 4 - Tuvalu Revised Bible

Ko te Aogā o te Poto

1Aku tama, fakalogo ki akoakoga a te otou tamana ki a koutou. Saga tonu ki ei kae ka maua ne koutou te malamalama.

2A mea konei e akoako atu ne au e lei, tela la, e tau o masaua fakalei ne koutou.

3I te taimi koi foliki ei au, au ko te tama tagata tokotasi a oku matua,

4au ne akoako ne toku tamana. E fai mai ki a au penei, “Masaua aku muna e fai sale, kae ke mo a eiloa e puli. Fai a mea kola e fai atu ne au, kae ka ola koe.

5Taumafai o sala te poto mo te atamai! Sa puli i a koe aku pati kona ne fai atu, io me fakaseaoga ne koe.

6Sa tiakina ne koe te poto, kae ka puipui ne ia koe; alofa ki ei kae ka tausi ne ia koe ke saogalemu.

7A te toe mea taua eiloa e tau o fai ne koe ko te salaga o te poto. Ke muamua foki o sala ne koe te atamai.

8Fiafia ki te poto, kae ka fai ne ia koe ke takutakua. Fakasilisili ne koe te poto, kae ka fai ne ia koe ke fakaaloalogina.

9A te poto ka fai pela me se kalauna malu i tou ulu.”

10Taku tama, fakalogo mai. Taofi mau kae saga tonu ki aku muna konei e fai atu, kae ka ola leva koe.

11Ko oti ne akoako atu ne au te poto ki a koe, pela foki te ala tonu o te olaga.

12Kafai koe e sasale kae fakaaoga tou mafaufau, kae ka seai eiloa se mea e pono mai i tou auala; ka se siga foki koe manafai e tele koe.

13Masaua faeloa a mea ko oti ne tauloto ne koe. A muna akoako e fai atu ki a koe, ko tou ola tena, tausi fakalei ki ei.

14Sa fano ki koga e olo ki ei a tagata amio masei. Sa tautali ki faiga a tino amio masei.

15Sa fai eiloa ne koe! Fakamao keatea mai i te masei! Sa saga ki ei, kae fano eiloa koe i tou auala.

16A tino amio masei e se mafai o moe, vagana ke oti ne fai ne latou ne amioga masei. E pula faeloa manafai e seki ta ne latou se tino.

17A te masei mo te fakasaua e pela me ne meakai mo meainu ki a latou.

18A te auala tela e sasale i ei a tino amiotonu e pela mo te la e kamata o fanake, e gasolosolo malie eiloa o vau te mainaga ke oko eiloa ki te taimi ko ao mai ei.

19A te auala o tino amio masei e pouli pela me se po. E siga latou, kae e se iloa ne latou me se a te mea ne siga ei latou.

20Taku tama, fakalogo mai ki aku muna konei e fai atu. Fakalogo mai ki aku muna.

21Ke moa eiloa e tiakina ne koe aku pati, ke masaua faeloa ne koe kae teu i tou loto.

22E aumai ne ia te ola mo te malosi ki so se tino e malamalama i ei.

23Fakaeteete ki mea e mafaufau koe ki ei me i tou ola e faite ne tou mafaufau.

24Ke mo a e fai ne koe ne muna se tonu. Sa tavini ki te loi mo muna se aoga.

25Kilo tonu ki mua mo te loto fakamaoni, kae sa punou tou ulu mo te masiasi.

26Epe 12.13 Fuafua faka'lei au mea e fai, kae ka tonu katoa au mea e fai.

27Kalo keatea mai i te masei kae sasale tonu ki mua. Sa 'maga eiloa keatea mai te ala tonu.