2 SAMUELU 17 - Tuvalu Revised Bible

Apisaloma ko faka'se ne Husai

1E seki leva mai tua ifo, ko toe fai atu a Aitofele ki a Apisaloma penei, “Tuku mai ke fili ne au e sefululua afe tagata, kae i te po nei ka olo matou o afuli Tavita.

2Ka taua atu matou ki tena kau i te taimi tenei koi fita kae vai'vai ei latou, ka mataku a ia, kae ka tele keatea foki tena kau. Ka tamate fua ne au a te tupu

3kae aumai katoa tena kau katoa ki a koe, e pela me se fafine fatoa avaga ko foki mai ki tena avaga. E tokotasi fua te tino e manako koe o tamate; a te toega e fakasao katoa.”

4A te manatu tena ko oko eiloa i te logomalie ki taliga o Apisaloma mo takitaki katoa o Isalaelu.

5Muna a Apisaloma, “Kalaga atu ki a Husai me ne a ona manatu.”

6I te okoatuga o Husai, ne fai atu Apisaloma ki a ia, “Tenei te manatu o Aitofele ne fai mai ki a matou; mata e tautali tatou ki ei? Kafai e se loto koe ki ei, taku mai la me se a te mea e tau o fai ne tatou.”

7Ne tali atu a Husai, “A te manatu o Aitofele i te taimi tenei e se 'lei.

8E iloa ne koe i tou tamana ko Tavita mo tena kau ne tino malosi i te taua, kae nei ko oko eiloa i te fakamataku e pela eiloa me se ulosa fafine ko galo ana tama. A tou tamana se sotia ko masani, kae se ti nofo tasi sale foki mo tena kau i po.

9I te taimi nei, kaati e muni i se ana io me i se isi koga fakaatea. Kafai foki la ko taua atu Tavita mo tena kau ki tau kau, a tino kola e logo i te mea tena ka fai aka pela i tau kau ko takavale.

10Tena la, se mea vave eiloa o mataku a tagata 'toa eiloa pela me ne leona i tau kau, me e iloa katoa ne tino katoa i luga i Isalaelu, i tou tamana se sotia takutakua, mo tena kau foki ko latou eiloa ko 'toa.

11A toku manatu, ke fakamaopoopo mai ne koe a tino Isalaelu katoa mai te sua mata ki te sua mata, ke pela mo one i te matafaga i te uke, kae ke 'taki eiloa ne koe ki te taua.

12Ka maua atu ne tatou Tavita, ko taua atu ei tatou ki a ia mo tena kau, koi tuai o iloa ne ia i a tatou ko oko atu. Ko tena uiga, ka seai eiloa se tino o latou e sao.

13Kafai e tele atu a ia ki loto i se fa'kai, ka olo atu fua o'tou kau mo lopu o futi te fa'kai tena ke to ki loto i te vanu. Ka seai eiloa se fatu e 'toe mai i luga i te koga maluga tena.”

14Muna a Apisaloma mo tino Isalaelu katoa penei, “E lei atu te manatu o Husai i te manatu o Aitofele.” Ko te Aliki ne fai ne ia ke se taulia te manatu 'lei o Aitofele, ko te mea ke malaia a Apisaloma.

Tavita ko Sola

15Tena, ne fakailoa atu ne Husai ki faitaulaga ko Satoka mo Apiata a tena taofi ne fai ki a Apisaloma mo takitaki o Isalaelu, pela foki mo te taofi o Aitofele ne fai.

16Muna a Husai, “Ave fakavave se fekau ki a Tavita ke sa nofo i te po nei i te auala ki te sua feitu o te vaitafe i te vao, kae ke na olo atu ki te sua feitu o te Iolitana, ke se maua a ia mo tena kau.”

17A Ionatana te tama tagata a Apiata, mo Aimaasu, te tama tagata a Satoka, e fakatalitali mai i te vai o Enelokelo, i tua o Ielusalema me e ma'taku ma ulu ki loto i te fa'kai i a laua ma lavea. E isi se tavini fafine e masani o fanatu mo te fekau ki a laua e uiga ki mea e tupu, tena ko olo ei laua o folafola ki te Tupu ko Tavita.

18Kae i te aso e tasi, ne lavea laua ne te tamaliki tagata foliki, tela ne fano o folafola ki a Apisaloma. Ne tele atu laua kona o muni i te fale o te tagata tokotasi i Paulima. E isi se vaikeli i tua o tena fale, tena ne 'muni ei laua i loto i ei.

19Ne puke atu a te avaga a te tagata tena ki se laugatu, fola ei ne ia i luga i te gutu o te vaikeli, kae lakulaku atu ne ia a fuagā saito ki luga i te laugatu, tela e faigata eiloa o iloa ne se tino me e isi ne tino i lalo.

20Ne o'mai a ofisa a Apisaloma ki te fale kae fesili atu ki te fafine, “Ko fea a Aimaasu mo Ionatana?”

Ne tali atu te fafine, “Ko oti ne olo ki te sua feitu o te vaitafe.”

Ne sala ne ofisa kona, a Aimaasu mo Ionatana i kona, kae seki maua eiloa ne latou, tena, foki atu ei latou ki Ielusalema

21i te ologa o latou kona, kae olo ake a Ionatana mo Aimaasu mai te vaikeli, olo eiloa o folafola ki te Tupu ko Tavita. Ne fakaasi atu ne laua a te fuafuaga a Aitofele o fakatakavale a ia, tena ne fai atu ei laua ki a Tavita penei, “Fakavave o olo ki te sua feitu o te vaitafe.”

22Tena ne solo atu ei Tavita mo tena kau ki te sua feitu o te Iolitana, kae i te vaveao ka ko palele katoa eiloa latou ki te sua feitu.

23I te iloaga ne Aitofele i a Apisaloma seki tautali atu i tena taofi, ne sopo a ia ki tena asini, foki atu eiloa ki tena fa'kai. I te otiga ne fakatoka ana mea, ko ia eiloa ko noaua ne ia eiloa. Ne tanu a ia i te tanuga eiloa o tena kaiga.

24I te taimi ne sopo atu ei a Apisaloma mo te kau Isalaelu ki te sua feitu o te Iolitana, ka ko Tavita mo tena kau ko oti ei ne oko ki te fa'kai foliki o Manaima.

25A Amasa ko fai ne Apisaloma mo takitaki o te kautau e sui i a Ioapo. A Amasa ko te tama tagata a Ietela, te tagata Isamaeli a tena matua ko Apikaila, te tama fafine a Nahasa tela ko te taina o Seluia, te matua o Ioapo.

26Ne fakamanava a Apisaloma mo tena kau i te fenua o Kileata.

27I te okoatuga o Tavita ki Manaima, ne fakafetaui atu ki a ia a Sopi, te tama tagata a Nahasa, mai te fa'kai o Lāpa i Amoni, pela foki a Makila te tama tagata a Amielu, mai Lotepa, pela foki mo Pasilai mai Lokelima i Kileata.

28-29Ne aumai ne latou a pōla mo ulo kele mo mea 'moe, mo meakai foki ma Tavita mo tena kau: ko saito, ko kalite, ko saito tao, ko pini mo pīsi, hani, ko susu makeke, susu vaivai mo ne mamoe. E iloa ne latou i a Tavita mo tena kau ko fia'kai, fiainu kae ko fi'ta foki i te vao.