SALAMO 10 - Tuvalu Revised Bible

Ko te Talo mō te fai Mea Tonu

1Te Aliki, ai a ko faka'mao ei koe keatea?

Ai a e fakagalo ei koe i taimi e puapuagatia ei matou?

2A tino amio ma'sei ko fakamata'mata kae fakasaua ki tino ma'tiva;

Faka'lave aka latou i olotou malei ne tao.

3E fakamatamata te tino amio masei ki ona manakoga ma'sei;

A te tino kaimanako e faifai muna kae teke ki te Aliki.

4A te tagata amio masei e se saga ki te Aliki;

Ona ko tena loto fia maluga tela e mafaufau aka ia pela i te Atua e se aoga.

5E taunu a mea katoa e fai ne ia.

E se mafai a ia o malamalama i fakamasinoga a te Atua;

Ka ko ia e fakatauemu ki ona fili.

6E faipati ifo a ia ki tena loto penei,

“E se mafai o se taunu aku mea e fai;

E seai se mea e mafai o tupu ki a au.”

7 Loma 3.14 E fonu tena gutu i muna'tuku, mo pati loi, mo pati fakatupu taua,

E vave foki a ia o faipati ki pati fakaitaita mo pati masei.

8E muni sale a ia i fa'kai;

O fakatalitali o tamate ne ia a tino e seai ne agasala.

E alamati ne ia a tino kae fakatupu ne ia ki ei a te fakalavelave;

9E fakatalitali a ia i tena koga 'muni pela me se leona.

E takatokato o fakatalitali ki tino ma'tiva;

E 'po ne ia latou ki tena malei ko soso ei keatea.

10A latou kola e pakia ko logofiofio eiloa;

Ko taka'vale latou i tena malosi.

11Ko fai ake pela te tino amio masei i tena loto,

“A te Atua ko se saga mai! E moe ona mata, e se taitai o matea ne ia au!”

12Te Aliki, fakasala a tino amio ma'sei kona!

Kae sa puli i a koe a tino puapuagatia!

13E mafai pefea o manatu mama a te tino amio masei ki te Atua,

Kae fai ifo i tena loto penei, “A te Atua ka se fakasala ne ia au”?

14E iloa kae matea ne koe a puapuaga mo fi'taga,

Kae toka faeloa koe o fesoasoani.

A te tino puapuagatia ko tuku katoatoa a ia ki a koe;

Me fesoasoani sale koe ki te tino e fia maua se fesoasoani.

15Fatifatigina te malosi o tino amio masei;

Fakasala atu ki a latou e tusa mo olotou amioga ma'sei,

Ke oko eiloa ki te ikuga.

16A te Aliki ko te tupu ki te se gata mai, se gata mai eiloa.

A latou kola e tapuaki ki atua fakaatea ka se toe matea latou i tena fenua.

17Te Aliki, ke fakalogo koe ki te talo a tino loto malalo;

Kae ke fakamalosi ne koe latou.

18Ka lagona ne koe a leo o tino puapuagatia, mo tamaliki ko mate olotou matua,

Kae fakamasino ne koe latou mo te alofa,

Ko te mea ke se toe iai ne tino o te lalolagi nei e fakamatakutaku atu ki a latou.