FAMASINO 7 - Tuvalu Revised Bible

Ko Fakatakavale ne Kitiona a Tino Mitiana

1I te aso e tasi, ne ala 'malu a Kitiona mo tena kau, tena olo atu ei o fakama'nava i tafa o te vaipuna o Halota. A te kau Mitiana e fakama'nava i te Vanu i te feitu ki matu o Kitiona mo tena kau, i te mauga foliki o Mole.

2Muna a te Aliki ki a Kitiona, “A tagata i tau kautau ko to tokouke, ko se tau o avatu ne au te manumalo ki a latou i tino Mitiana. Se taumate e iku o mafaufau latou pela i a latou e manumalo eiloa i a latou, kae ko seai soku igoa e taku i te manumalo.

3Teu 20.8 Folafola atu ki tino Isalaelu penei, ‘So se tino e mataku e tau o foki ki tena kaiga, ka ko matou e nofo i konei i te Mauga o Kileata.’ ” Tena, ne foki ei e tusa mo te luasefulu lua afe tagata, kae toe mai e sefulu afe.

4Tena ne fai mai ei te Aliki ki a Kitiona penei, “Koi tai tokouke eiloa tau kau. Avatu latou ki te vai, kae ka vae ne au i kona te kau e olo ki te taua mo te kau e nofo. Kafai e fai atu au i te tino tela e fano, e fano eiloa, kae kafai e fai atu au, te tino tela e nofo, e nofo eiloa.”

5Tena ne fakamaopoopo ne Kitiona tena kau i te vai, kae ne fai atu te Aliki ki a ia penei, “Onoono ki tino kola e inu pela me ne kuli, mo tino kola e punou ifo o inu faka'lei.”

6E tusa mo te toluselau tagata kola e asu aka ne latou te vai i olotou lima o inu pela me ne kuli; a te toega ne to'tuli ifo o inu.

7Muna a te Aliki ki a Kitiona, “Ka fakasao ne au a koe, kae tuku atu ne au te manumalo ki a koe mo te toluselau tagata kola ne inu seposepo. A te toega o tagata e tau o foki katoa ki olotou fale.”

8Tena, ne uga ei ne Kitiona a te toega o tena kautau ke foki ki olotou kaiga, kae toe mai te toluselau kola e nofo mo mea'kai katoa mo pu. A te koga e nofo ei te kau Mitiana e tu mai lalo o latou i te vanu.

9I te po tena, ne fakatonu atu te Aliki ki a Kitiona penei, “Tu ki luga o olo o taua ki te kau Mitiana i te koga tena e nofo ei latou; ko tuku atu nei ne au te manumalo ki a koutou.

10Kae kafai koe e mataku ma taua atu ki a latou, olo la mo tau tavini ko Pula ki te koga tena e nofo ei latou.

11Ka lagona ne koe olotou pati e fai, tena ka maua ei ne koe te loto toa o taua atu ki a latou.” Tena, ne olo ifo ei a Kitiona mo tena tavini ko Pula ki tafa o te koga e ma'nava ei te fili.

12A te kau Mitiana, te kau Amaleka mo te kau o te vao e nofo salalau i te vanu e pela me ne muimuiga se akelise, kae e se fakatau eiloa te uke o olotou kamela, e pela eiloa mo one o te matafaga i te uke.

13I te okoatuga o Kitiona, lagona ei ne ia te tagata e fakamatala tena miti ki te sua tino. Muna a ia, “Au ne moemiti me e isi se puta falaoa o kalite ne teka mai ki loto i te tou fa'kai kae poko atu ki te faleie. Ne siga te faleie tena, takato eiloa i te laukele.”

14Ne tali atu te tagata tela e fakalogologo penei, “A te mea tena ko te pelu a te tagata Isalaelu ko Kitiona, te tama a Ioasa! E seai aka foki eiloa se uiga fakaatea o te mea tena! Ko oti ne tuku ne te Atua te manumalo ki a ia te kau Mitiana mo te tou kautau katoa!”

15I te lagonaga ne Kitiona te moemiti tena mo tena uiga, ne totuli ifo ei a ia kae tapuaki atu ki te Atua. Ne fanatu a ia ki te koga e manava ei tino Isalaelu kae fai atu penei, “Tu ki luga! Ko tuku mai nei ne te Aliki te manumalo ki a tatou i te kautau a Mitiana!”

16Ne vaevae ne ia tena toluselau tagata ki vaega e tolu, kae tuku atu ki tino taki tokotasi se pu mo se tiā e isi se moli i loto i ei.

17Muna a ia ki a latou, “Kafai ko oko au ki kautafa o te koga e nofo ei latou, kilo fakalei mai ki a au, kae fakaakoako ki te mea e fai ne au.

18I te taimi e fakatagi ei a pu a taku potukau, masaua o fakatagi foki otou pu, kae fakatamilo i te koga e ma'nava latou i ei, kae ka'laga penei, ‘Mo te Aliki, mō Kitiona!’ ”

19Ne oko atu Kitiona mo tena toko selau tagata ki kautafa o te koga e ma'nava ei te fili, ka ko pili ki te valuapo, ka ko fatoa oti eiloa ne sui a tino tu. Tena, ne faka'tagi olotou pu, kae foa a tia kola e pukepuke i olotou lima,

20ka ko te sua ava potukau ne fai foki pena. Ne tofu latou mo moli i olotou lima fakamaui, ka ko pu i olotou lima fakaatamai, kae ka'laga penei, “Ko te pelu a te Aliki mo Kitiona!”

21Ne tulaki a te kau a Kitiona i olotou tulaga fakatamilo te koga e nofo ei te fili, tena ne fakatau tele ei a te kautau a te fili kae ka'laga.

22I te taimi e fakatagi ei a pu a te kau a Kitiona, ka ko te Aliki ne fai ne ia a potukau a te fili ke fakatau taua valevale ki olotou pelu. Ne tele latou ki Saletana, ke oko eiloa ki Peta Sita, ke oko atu foki eiloa ki te fa'kai foliki o Apelu Meola i tafa o Tafata.

23Tena, ne fanatu te ka'laga ki tagata o matakaiga o Nafatali, Asela mo feitu e lua o Manase, tela ne olo atu latou o afuli a te kau Mitiana.

24Ne uga a avefekau a Kitiona ki kogā koga katoa i te fenua maugā o Efalaima mo te fekau tenei, “O'mai o taua ki tino Mitiana. Pono te Vaitafe o Iolitana mo vaitafe foliki ke oko eiloa ki Petapala, ke se to atu te kau Mitiana ki te sua feitu.” Ne fakamaopoopo a tino Efalaima, tena ne pono ne latou te Vaitafe o Iolitana mo vaitafe foliki ke oko eiloa ki Petapala.

25Ne puke ne latou a te tokolua aliki o Mitiana ko Olepa mo Seepa; ne tamate ne latou a Olepa i te kaupapa o Olepa, ka ko Seepa i te koga fai uaina o Seepa. Ne afuli atu eiloa ne latou a te kau Mitiana kae aumai ne latou a ulu o Olepa mo Seepa ki a Kitiona, tela ko oko atu ki te feitu ki te saegala o te Iolitana.