ISAIA 24 - Tuvalu Revised Bible

Te Aliki ka Fakasala ne ia a te Lalolagi

1A te Aliki ka fakamalaia ne ia te lalolagi kae tiakina ke lavaki. Ka mio ne ia a te feitu ki luga o te lalolagi, kae tuku atu ona tino ke salalau valevale.

2A tino katoa e iku katoa ki te ikuga e tasi — ko faitaulaga mo tino o te fenua, ko pologa mo matai, ko tino togi mo tino fai mea togi, tino fai mea kaitalafu mo tino e kaitalafu, tino maumea mo tino mativa.

3A te lalolagi ka masei valevale kae maofa valevale. A te Aliki ko oti ne faipati, tela la, e taunu eiloa.

4A te lalolagi ka malaia, ka ma'lo te laukele kae gasolo o māge; a te lalolagi katoa ka gasolo eiloa o vaivai; a te lalolagi mo te lagi ka 'pala katoa.

5A tino ko oti ne fakalailai ne latou a te lalolagi me ne ofa ne latou a tulafono a te Atua kae fakaseaoga foki ne latou a te feagaiga tela ne fai ne ia ke tumau ki te se gata mai.

6Tela la, ko oti ne fakamalaia ne te Atua a te lalolagi. Kae maua ne ona tino a te taui o olotou mea ne fai. E gasolosolo ifo eiloa o mutana a tino e ola i ei.

7A vine ka mage, mo uaina ka gasolo o se uke. A tino kola ne masani o fiafia ko fanoanoa nei,

8mo te leo malie o olotou kitala mo tulamu ka seai.

9Ko se toe ai ne tino e usu pese fiafia kae inu i uaina; ko se toe ai se tino e toe tami ki te gali o te uaina.

10A mea katoa i te fa'kai ko se aoga katoa, mo tino ko 'loka olotou fale kae nofo i loto ke sao latou.

11A tino ko kalaga sale fua i te auala me ko seai ne uaina. A te fiafia ko se toe ai eiloa, ko oti ne ave keatea mai i te fenua.

12A te fa'kai ko maofa valevale, mo mataloa o te fa'kai ko maofa valevale ki lalo.

13Tena te mea ka tupu ki malo katoa o te lalolagi. Ka pela mo te aso e oti ei te tauga o te taukai, te taimi tela ko oti ne kini keatea a te fuagā olive mai i lakau ko olive katoa, pela foki a fuagā vine fakaotioti ko oti ne tau katoa mai i lakau ko vine.

14A tino kola e toe mai ka usu pese mo te fiafia. A latou i te togala ka taku mai ne latou te takutakua o te Aliki,

15ka ko latou i te saegala ka tavae atu ki a ia. A tino kola e nofo pili ki te tai ka tavae atu ki te Aliki, te Atua o Isalaelu.

16Mai i koga mao eiloa o te lalolagi, ka lagona ne tatou a pese o tavaega o Isalaelu, te malo amiotonu.

Ka ko au, ko seai se fakamoemoega lei mo oku! Au ko gasolo eiloa o seai! A tino amio masei e tumau eiloa i te fai o amioga masei, mo olotou uiga fai togafiti e gasolo ake eiloa o fai malosi.

17Tino katoa, fakalogo mai ki a au! E uke a mea fakamataku, mo lua, mo malei kona e fakatalitali mai ki a koutou.

18So se tino e taumafai o tele ke sao a ia mai i te mea fakamataku, kae ka to ki loto i te lua, kae kafai e sao mai i te lua kae ka lave i te malei. A te vaiua lotu eiloa ka to mai i te lagi, ka ko fakavae o te lalolagi ka polepole.

19A te lalolagi ka mafā kae maofa valevale, kae mavae lua.

20A te lalolagi ka takasese pela me se tino ko'na kae gasuesue pela me se fale i te taimi o te afā. A te lalolagi ko 'mafa i ana agasala; ka pakū ki lalo, se toetu ake eiloa.

21I se aso mai mua nei, kae ka fakasala ne te Aliki a mea malosi faka‐te‐lagi, mo pule o te lalolagi.

22Ka tuku fakatasi ne te Atua a tupu e pela me ne pagota i lalo i se lua. Ka sai ne ia latou i te falepuipui ke oko ki te taimi e fakasala ei latou.

23A te masina ka gasolo o pouli, mo te la ka se toe maina, me i te Aliki Malosi ka fai mo tupu. Ka pulepule ne ia a Ielusalema i luga i te Mauga o Siona, ka ko takitaki o te fenua ka lavea ne latou tena malu.