ISAIA 55 - Tuvalu Revised Bible

Ko te Alofa o te Atua

1 Faka 21.6; 22.17 Muna a te Aliki,

“O'mai, koutou katoa kola e fiainu,

Tenei te vai!

O'mai, koutou kola e seai ne otou tupe,

Togi a saito o kai!

O'mai! Togi a uaina mo susu,

E seai se togi o mea kona!

2Ai a e fakamaumau ei otou tupe ki mea

Kola e seai se lei e maua mai i ei?

Ai a e fakamaumau ei otou peofuga kae

E fia'kai faeloa koutou?

Fakalogo mai, kae fai te mea tenei e fai atu ne au,

Kae ka kai fiafia koutou ki meakai gali eiloa.

3 Galu 13.34 “Toku fenua, fakalogo mai kae o'mai ki a au;

O'mai ki a au, kae ka maua ne koutou te ola!

Ka fai ne au se feagaiga tumau mo koutou,

Kae tuku atu ne au a fakamanuiaga

Kola ne tauto ne au ki a Tavita.

4Ne fai ne au a ia mo pule mo takitaki o malo,

Kae ne fakaasi ne au ki a latou a toku malosi e auala i a ia.

5Nei, ka kalaga koe ki malo fakaatea;

Ne seki iloa ne latou a koe i aso mua,

Kae nei, ka tele mai latou o kau atu ki a koe!

Ko au, te Aliki tou Atua, te Atua tapu o Isalaelu,

Ka fakataunu ne au a mea katoa kona;

Ka avatu ne au te tulaga malu kae fakaaloalogina.”

6Fuli atu ki te Aliki kae talo atu ki a Ia,

Me ko pili mai a Ia i te taimi nei.

7A tino amio masei ke tiaki olotou uiga masei

Kae fuli aka foki a olotou mafaufauga.

Fai ki ei ke fuli mai ki te Aliki te tou Atua;

A ia e alofa kae vave fakamagalo ne ia a agasala a tino.

8Muna a te Aliki, “A oku mafaufauga e se pau mo otou mafaufauga,

A oku ala e se pau foki mo otou ala.

9E pela mo lagi e nofo mai i luga o te lalolagi,

E pena te maluga o oku auala mo mafaufauga i lo otou auala mo mafaufauga.

10 2Koli 9.10 “Aku muna e pela mo te kiona mo te vaiua

Kola e to mai mai te lagi o fakasusu te lalolagi.

E fakaola ei a lakau kaina

Kae maua mai foki i ei a fuaga kola e toki ko maua ei te meakai mai i ei.

11E pena foki te muna tela e faipati ne au —

E se mafai o se fakataunu ne ia a te mea

Tela ne fakamoemoe au ke fai ne ia;

E fai eiloa ne ia a mea kola ne fai

Ne au ki ei ke fano o fai.

12“Ka tiakina ne koutou a Papelonia mo te fiafia;

Ka taki koutou ki tua mo te fa'kai mo te filemu.

A mauga ka usu pese, mo lakau ka kalaga mo te fiafia.

13A lakau ko pelosi ka ola ake i koga konei e ola ei a lakau makaikai;

A lakau ko metolo ka tupu ake i koga ne ola ei a vao talatala.

A te mea tenei se fakailoga tela e tumau ki te se gata mai,

Se fakamasauaga o te mea ne fai ne au te Aliki.”