TITO 2 - Tuvalu Revised Bible

Ko Akoakoga Tonu

1Kae pela mo koe, e 'tau o akoako atu a akoakoga tonu kola e maua tonu i ei a te ola.

2Fakatonu atu ki toeaina ke matapula latou, ke mafaufau 'lei, ke loto pulea, ke fai mea tonu i te fakatuanaki, ke alofa kae kufaki foki.

3Ke pena foki eiloa tau fakatonuga ki loma'tua ke amio fakaaloalo, ke se fai mo tino gutu fatufatu io me ne pologa a te kava; ke akoako atu ne latou a te mea 'lei,

4kae akoako atu foki tamafine ke a'lofa ki olotou avaga mo tamaliki,

5ke loto pulea kae amio 'lei, ke fai latou mo fafine 'lei o te kaiga, e a'lofa kae faka'logo foki ki olotou avaga, ko te mea ke se fakamasei ne latou a te muna a te Atua.

6Ke fakamalosi foki pena ne koe a tamataene, ke maua ne latou a te loto pulea.

7Ke fai koe mo fakaakoakoga 'lei i mea katoa, ke iloa ei i a koe ko te fakatusa o galuega 'lei, fakamaoni kae taofi mau ki ei,

8fakaaoga ne koe a lauga gali kola e faigata o fai pona ki ei a tino, ko te mea ke masiasi ei ou fili, me ko seai ne olotou manatu ma'sei e toe mafai o fai mai ki a tatou.

9Fakatonu atu ki pologa ke faka'logo ki olotou pule i mea katoa, kae fakafiafia foki ki a latou i feitu katoa; e se 'tau foki mo latou o 'teke ki pule,

10io me kaisoa mai se mea i a latou. Ke 'tau o fakaasi atu latou me ne tino e 'lei kae fakamaoni, ko te mea ke tavaea akoakoga a te Atua te tou Fakaola i olotou mea katoa e fai.

11Me ko oti ne fakaasi ne te Atua tena alofa tauanoa mō te fakaolataga o tino katoa.

12A te alofa tauanoa, e akoako mai ne ia ki a tatou ke tiakina te olaga masei mo te kaimanako, ka ke ola i te loto pulea, te mea tonu, mo te olaga faka Atua i te lalolagi nei.

13E pela eiloa mo te motou fakatalitali mō te Aso Manuia tela e fakamoemoe matou ki ei, i te fakaasi mai o te 'malu o te tou Atua sili mo te tou Fakaola ko Iesu Keliso.

14Sala 130.8; Eso 19.5; Teu 4.20; 7.6; 14.2; 1Pete 2.9Ne tuku atu tona foitino mō tatou, o fakaola ei tatou mai amioga ma'sei katoa, kae fai foki ne ia tatou ne tino fou, kae e a ia ake foki eiloa tatou, kae finafinau foki o fai te 'lei.

15Akoako atu a mea konei, kae fakaaoga foki tau pule katoatoa, i tou fakamalosi atu kae polopoloki atu a tino fakalogo'logo. Ke seai se tino e manatu māmā ki a koe.