IOSUA 9 - Tuvalu Revised Bible

Iosua ko Fakaloiloi ne Tino Kipeona

1A te manumalo o Isalaelu ko logo katoa ei a tupu i te feitu ki te togala o te Iolitana — ko tupu i fenua maluga, i lalo o mauga, pela foki i te matafaga o te Tai Metitilani, ke oko eiloa ki Lepanona i matu; a tupu kona ko tupu o tino Heti, tino Amoli, tino Kanana, tino Pelise, tino Hivi, mo tino Iepuse.

2Ne kau fakatasi a tupu katoa kona o taua atu ki a Iosua mo te kau Isalaelu.

3Ka ko tino Kipeona, kola ne tino Hivi, ne logo i te mea ne fai ne Iosua ki fa'kai o Ieliko mo Ai,

4tela ne mafaufau ei latou o fakaloiloi a Iosua. Ne olo atu latou o fakauta olotou asini ki meakai e fao i taga masaesae mo uaina e fao i taga ko Leva.

5Ne pei latou ki gatu masaesae mo taka masei. A falaoa ne olo mo latou ko mata leva kae se 'lei.

6Tena, ne olo atu latou ki te koga e nofo ei tino Isalaelu, i Kilikala, kae fai atu penei ki a Iosua mo tino Isalaelu, “A matou ne o'mai mai fenua mao. A matou e ma'nako ke fai se fakataugasoa i te va o tatou.

7 Eso 23.32; 34.12; Teu 7.2 Kae ne fai atu a tino Isalaelu, “Ai a ka fai ei se fakataugasoa i te va o tatou? A koutou kaati e nofo fua i se koga pili mai.”

8Muna a latou ki a Iosua, “A matou ko toka o fakalogo ki te mea e manako koe ke fai ne matou.”

Ne fesili atu a Iosua ki a latou penei, “Ko oi koutou? A koutou ne o'mai mai fea?”

9Tena ne fakamatala atu ei ne latou te tala tenei: “Tou malu, matou nei ne o'mai mai se fenua mao, me i matou ko oti ne logo i te Aliki te otou Atua. A matou ko oti ne logo i mea katoa ne fai ne ia i Aikupito

10Nume 21.21-35 pela foki mo te mea ne fai ne ia ki tupu e tokolua o Amoli i te feitu ki te saegala o te Iolitana: ko te Tupu ko Sekono o Hesepono mo te Tupu ko Oko o Pasana, kola e nofo i Asatalota.

11A omotou takitaki, pela foki mo tino katoa i te motou fenua ne fai mai ki a matou ke fakatoka ne meakai mo te malaga, ke olo atu matou o fakafetaui ki a koutou. A matou ne fakatonu mai ke tavini atu ki a koutou, kae ke fai atu ki a koutou ke fai se feagaiga i te va o tatou.

12Kiloke ki omotou falaoa. I te taimi ne tiakina ei ne matou te motou fa'kai, a falaoa konei koi velavela faeloa. Kae kilo mai, ko malo faka eiloa kae ko taelagoa foki.

13I te taimi ne utu ei omotou taga uaina konei, koi fou faeloa, kae kilo mai, ko masaesae valevale. A omotou gatu mo taka ko masaesae faka eiloa i te loa o te motou malaga.”

14Ne puke ne tino Isalaelu ne meakai mai i a latou, kae e seki ka'laga mua ki te Aliki me se a te mea e tau o fai ne latou.

15Ne fai ne Iosua te feagaiga fakataugasoa mo tino kona o Kipeona, tena, talia ei ne ia ke se tamate. Ne tauto faka'lei a takitaki o Isalaelu ke tausi ne latou te lotou feagaiga.

16E tolu aso mai tua o te faiga o te feagaiga kae logo tino Isalaelu i tino kona e nofo fua i se koga pili mai.

17Tena, ne malaga atu ei a tino Isalaelu i aso e tolu, oko atu ei ki fa'kai e nofo ei a tino kona: ko te fa'kai o Kipeona, Kafila, Pelota, mo Kiliata Iealima.

18Ko se mafai la nei ne tino Isalaelu o tamate tino kona, me i te feagaiga tela ne fai ne olotou takitaki mo tino kona, ne fai i te igoa o te Aliki, te Atua o Isalaelu. Ne muimui a tino ki olotou takitaki e uiga ki te mea tena,

19kae ne tali mai latou penei, “A te motou feagaiga ne fai mo latou i te igoa o te Aliki, te Atua o Isalaelu. E se mafai eiloa ne tatou o fai se mea ki a latou.

20E tau eiloa o faka'sao ne tatou; kafai e se faka'sao ne tatou, ko tatou ka fakasala ne te Atua.

21Tuku ei latou ke sao, kae ka kati sale ne latou a fafie ma tatou, kae asu foki ne latou o 'tou vai.” Tena te taofi o takitaki.

22Ne fai te fakatonuga a Iosua ke puke mai a tino Kipeona ki ona mua, tena ne fesili atu ei a ia ki a latou penei, “Ai a ne o'mai ei koutou o fakaloiloi matou i a koutou e nofo i te fenua mao, kae tenei koutou e nofo fua i te koga pili mai?

23A koutou ko fakamalaia ne te Aliki me ne fai ne koutou te mea tena. A koutou ka fai faeloa mo pologa, o kati fafie kae tali vai mō te tausiga o te faletapu o te motou Atua.”

24Ne tali mai latou penei, “Tou malu, ne fai ne matou te mea tena, me i matou ne logo me se mea tonu eiloa i a Mose ne fakatonu ne te Aliki te otou Atua ke tuku atu mo koutou te fenua katoa tenei, kae ke tamate foki a tino katoa e pono i otou mua. Ne fai ne matou te mea tena i a matou ko oko eiloa i te ma'taku i a koutou. Matou e ma'taku i a matou ma mate.

25Matou nei ko i lalo i tau pulega; fai te mea e loto koe o fai ki a matou.”

26Tena la, ne puipui ne Iosua latou, kae fai ki tino Isalaelu ke se ta ne latou a tino kona.

27Ne fai ne Iosua latou mo pologa, ke kati fafie kae asu vai mō tino Isalaelu pela foki mo te fata-fai-taulaga a te Aliki. Ke oko mai ki aso nei, e tumau eiloa te lotou galuega tena i te koga tela ne filifili ne te Aliki ke tapuaki atu ei a tino ki a ia.