1 PETELU 4 - Tuvalu Revised Bible

Ko te Olaga ko 'Fuli

1Ona ko Keliso ne puapuagatia faka te foitino, e 'tau foki mo koutou o fakamalosi ne te vaega mafaufauga e tasi; me ko so se tino e puapuagatia faka te foitino, e se toe kau ki te agasala.

2Kae mai te taimi nei o fano ki mua, e 'tau te otou olaga katoa faka te lalolagi, ke pulea ne te loto o te Atua, kae se ko manakoga faka te foitino.

3Me ne lasi eiloa te otou taimi ne maumau i aso ko teka, i te faiga o amioga a tino pouliuli. Ne maumau otou olaga i te fai o mea masei konei: ko te manako lasi, te inu kava, fiafiaga o te kona, mo te tapuaki ki tupua masei kola e se 'tau o tapuaki ki ei a tino.

4Kae nei ko ofo a tino pouliuli manafai ko se kau atu koutou ki a latou i te olaga masei mo te fai valevale, tela la, ka faifai muna atu latou ki a koutou.

5Kae e 'tau mo latou o avatu ki te Atua ne tala e uiga mo latou, me ko ia tena ko toka o fakamasino a tino ola mo tino 'mate.

6Tenei te pogai ne folafola atu ei foki a te Tala 'Lei ki tino 'mate, ko latou kona ko oti ne fakamasinogina ka koi ola i te olaga faka te foitino, e pela eiloa mo tino katoa e fakamasinogina; ne folafola atu ki a latou ko te mea ke ola e pela mo te Atua manafai ko ola latou i te olaga faka-te-agaga.

Ko Tino Fakamaoni i te Tausiga o Meaalofa a te Atua

7Ko pili mai te gataga o mea katoa. E 'tau mo koutou o kufaki kae ke toka foki otou loto, ko te mea ke mafai ne koutou o 'talo.

8Faata 10.12Kae sili i mea katoa, ke fakatau alofa fakamaoni koutou, me i te alofa e 'tao ne ia a te ukega o agasala.

9Ke talia ne koutou mo te fiafia so se tino i otou fale e aunoa mo te muimui.

10A meaalofa kesekese kola ne tuku atu ne te Atua ki a koutou, e 'tau o fakaaoga mō te lei o nisi tino, e fakaasi mai ei i a koutou ne tavini fakamaoni i te tausiga o meaalofa kesekese o te alofa tauanoa o te Atua.

11So se tino e lauga atu, e 'tau eiloa o lauga atu ne ia a te muna a te Atua; so se tino e tavini atu, e 'tau mo ia o tavini atu i te malosi ne tuku atu ne te Atua ki a ia, ko te mea ke vikia te Atua i mea katoa e alatu i a Iesu Keliso, tela e o ia te 'malu, te mana se gata mai, se gata mai eiloa! Amene.

Ko Puapuaga Faka Kelisiano

12Oku taugasoa pele, sa 'poi otou loto i te tofotofoga faigata tena ko fetaui mo koutou, e pela me se mea fou fatoa oko atu ki a koutou.

13Kae e 'tau mo koutou o fiafia i te mea e kau fakatasi koutou ki puapuaga o Keliso, ko te mea ke 'fonu koutou i te fiafia manafai e fakaasi mai tona 'malu.

14Amutia koutou manafai e muna maseigina koutou ona ko koutou e tautali i a Iesu; ko te uiga o te mea nei i te Agaga 'malu, tela ko te Agaga o te Atua, ko nofo i luga i a koutou.

15Ke mo a se tino o koutou e fakapuapuagatia ona ko te tatino, te kaisoa, te amio masei, me ko te fia pule fua ki mea a nisi tino kola e seai sena fekau i ei.

16Kae kafai e puapuagatia koutou ona ko koutou ne Kelisiano, sa tae'ma i ei, kae fakafetai fua ki te Atua i te mea e tauave sale ne koutou a te igoa o Keliso.

17Ko oko nei ki te taimi e kamata ei te Fakamasinoga, ka ko tino o te Atua ko latou kona e fakamasinogina muamua. Kafai e kamata i a tatou, kae ka pefea la manafai e fakaoti ki tino kola e se talitonu ki te Tala 'Lei mai i te Atua?

18Faata 11.31E pela mo muna a te Tusi,

“Kafai e faigata mo tino 'lei ke fakaolagina latou,

Se a la te mea ka tupu ki tino se talitonu ki te Atua mo tino agasala?”

19Tela la, ko tino kola ne puapuagatia ona ko te loto eiloa tenei o te Atua mo latou, e 'tau eiloa mo latou i olotou galuega 'lei o talitonu fakamaoni ki a ia tela ne Faite ne ia a mea katoa, tela e tausi faeloa ki tena folafolaga.