1 TUPU 22 - Tuvalu Revised Bible

Ko Muna Fakapelofeta a Mikaio ki a Aapo(2NTupu 18.2-27)

1Ne filemu te va o Isalaelu mo Sulia i te lua tausaga,

2kae i te tolu o tausaga, ne fanatu ei a te Tupu o Iuta ko Iosefatu ki te Tupu ko Aapo o Isalaelu.

3A Aapo ne fesili atu ki ana ofisa penei, “Ai a e seki ai ei se mea kai fai ne tatou o taumafai o toe fakafoki mai a te fa'kai o Lamota i Kileata mai te tupu o Sulia? A Lamota e o tatou!”

4Ne sili atu a Aapo ki a Iosefatu penei, “E a, e vau koe i a au o taua atu ki Lamota?”

Ne tali atu Iosefatu, “Au e toka faeloa, pela foki mo aku sotia mo taku kau i solofanua.

5Kae ke muamua o fakafesili ne taua a te loto o te Aliki.”

6Tena ne kalaga atu ei a Aapo ki ana pelofeta, e tusa mo te faselau, kae sili atu ki a latou penei, “E a, e tau au o fano o taua atu ki te fa'kai o Lamota me ikai?” Ne tali mai latou penei, “Fano o taua atu ki ei. A te Aliki ka tuku atu ne ia a te manumalo ki a koe.”

7Kae ne fesili aka mo Iosefatu penei, “Koi isi aka se pelofeta e mafai o taku mai ne ia a te loto o te Aliki?”

8Ne tali mai Aapo penei, “E isi, ko Mikaio, te tama tagata a Imila Ka ko au e se fiafia ki ei, me e seai eiloa se mea ke valo ne ia e uiga ki a au ke 'lei; e ma'sei faeloa.”

Ne tali atu Iosefatu, “se tau mo koe o faipati pena!”

9Ne kalaga atu Aapo ki tena ofisa e tokotasi kae fai ki ei ke fano o fai ki a Mikaio ke fanatu nei eiloa.

10A te avā tupu kona, e pei ki o la gatu fakatupu, kae e nofo i luga i o la nofogaaliki i te koga solo saito i tua o mataloa o Samalia, ka ko pelofeta e fai olotou valoaga i o la mua.

11E tokotasi mai i pelofeta e igoa ki a Setekaia, te tama tagata a Kenaana, ne faite ne ia a sau fiti, kae fai atu ki a Aapo penei, “Konei a muna a te Aliki: ‘Ka fakaoga ne koutou a mea konei o taua atu ki tino Sulia, kae ka fakatakavale masei eiloa ne koutou.’ ”

12E pena foki eiloa a muna a nisi pelofeta katoa. Muna a latou, “A koutou ka olo o taua ki te fa'kai o Lamota, a koutou e manumalo eiloa. A te Aliki ka avatu ne ia a te manumalo ki a koutou.”

13I te taimi tena, a te ofisa tela ne fano ki a Mikaio ke fanatu, ne fai atu ki a Mikaio penei, “A pelofeta katoa ne valo ne latou i te tupu e manumalo. E tau foki koe o valo pena.”

14Ka ko Mikaio ne tali penei, “I te igoa o te Aliki ola, au e tauto me e faipati eiloa ne au a te mea e fai mai ne ia ke fai ne au!”

15I tena oko atuga ki mua o te tupu ko Aapo, ne sili atu ei a te tupu ki a ia penei, “Mikaio, e a, e tau maua mo Iosefatu o olo o taua atu ki te fa'kai o Lamota me ikai?”

Ne tali atu Mikaio, “Olo o taua! A koulua e manumalo eiloa. A te Aliki e aumai eiloa ne ia te manumalo.”

16Kae ne tali atu a Aapo, “Kafai e faipati mai koe ki a au i te igoa o te Aliki, faipati ki te mea tonu! E fakafia taimi e fai sale atu ei ne au te mea tena ki a koe?”

17 Nume 27.17; Mata 9.36; Male 6.34 Ne tali mai Mikaio, “E lavea ne au a te kautau a koe e salalau i luga i koga malugaluga e pela me ne mamoe ko seai se lotou takitaki; tuku atu ei latou ke 'foki ki olotou fale mo te filemu.”

18Muna a Aapo ki a Iosefatu penei, “E a, kai fai atu au i a ia tena e valo faeloa ne ia a mea ma'sei e uiga ki a au? E seai eiloa se mea e valo ne ia e uiga ki a au ke 'lei!”

19 Iopu 1.6; Isa 6.1 Ne faipati eiloa Mikaio, muna a ia: “Fakalogo mai ki muna a te Aliki! E matea ne au a te Aliki e sagasaga i tena nofogaaliki i te lagi, mo ana agelu katoa e tu i ona tafa.

20Ne sili atu te Aliki ki a latou penei, ‘Ko oi te tino e mafai ne ia o fano o fakaloiloi a Aapo, ko te mea ke fano o mate i te fa'kai o Lamota?’ A nisi agelu e kese eiloa olotou manatu mo nisi agelu;

21tena, ko te agaga eiloa e tokotasi ko fanatu ki mua o te Aliki kae fai atu penei, ‘Ko au ka fano o fakaloiloi a Aapo.’

22Ne sili atu te Aliki penei, ‘E fakaloiloi pefea ne koe?’ Ne tali mai te agaga penei, ‘Au e fano o fai ki pelofeta katoa a Aapo ke 'loi katoa.’ Muna a te Aliki, ‘Fano o fakaloiloi Aapo, me e iku manuia tau mea tena e fai.’ ”

23Tena, muna a Mikaio penei; “Tenei te mea ko oti ne tupu. A te Aliki ko oti ne fai ne ia au pelofeta konei ke 'loi atu ki a koe. Ka ko te ikuga tonu eiloa a te Aliki, a koe e maua ne te fakalavelave!”

24Tena, ko te pelofeta eiloa ko Setekaia ko fanatu ki a Mikaio o 'pa ona mata kae fai atu penei, “I te taimi fea ne tiaki ei au ne te agaga o te Aliki kae faipati atu ki a koe?”

25Ne tali atu Mikaio, “Ka iloa ne koe manafai ko fano koe o muni i se potu ki tua o se fale.”

26Tena, ne fakatonu atu a Aapo ki tena ofisa e tokotasi penei, “Puke fakapagota a Mikaio o ave ki a Amoni, te kovana o te fa'kai, mo te Pelenise ko Ioasa.

27Fai ki a laua ke pei a ia tena ki te falepuipui kae ke fagai ki falaoa kae fainu ki vai ke oko eiloa ki te taimi e foki mai ei au mo te manuia.”

28Ne kalaga atu Mikaio, “Kafai koe e foki mai mo te manuia, ko tena uiga a te Aliki e seki faipati mai e auala i a au!” Ne toe fai atu ana muna penei, “Tino katoa, faka'logo ki aku muna kola ne fai!”

Ko te Mate o Aapo(2NTupu 18.28-34)

29Tena, ne olo eiloa a te Tupu ko Aapo o Isalaelu mo te Tupu ko Iosefatu o Iuta o taua atu ki te fa'kai o Lamota i Kileata.

30Muna a Aapo ki a Iosefatu penei, “I te taimi e olo ei tatou o taua, au ka funa oku foliga, ka ko koe e pei eiloa ki ou gatu fakatupu.” Tena, ne fano ei te tupu o Isalaelu ki te taua kae funa ona foliga.

31A te tupu o Sulia ko oti ne fakatonu ki ana takitaki o kaliota kola e tino tolu mo te toko lua ke se olo o taua ki se isi tino, na ko te tupu eiloa o Isalaelu.

32Tena, i te laveaga ne latou a te Tupu ko Iosefatu, ne leake eiloa nei latou me ko ia ko te tupu o Isalaelu, tena ne ma'fuli atu ei latou o taua ki ei. Kae i te kalagaga a Iosefatu,

33ne lavea aka ei ne latou me se ko te tupu o Isalaelu, tena ne seki taua atu ei latou ki ei.

34E isi se sotia Sulia ne sana atu tena matasana, poko eiloa i sokoga o gatu tau o te Tupu ko Aapo. Ne kalaga atu Aapo ki te tagata e fakatele sale tena kaliota penei, “Au ko pakia. Fuli o tele keatea mo te taua!”

35I te taimi koi fai ei te taua, ka ko te Tupu ko Aapo e tu eiloa i luga i tena kaliota, kae fakasaga ki te kau Sulia. A te toto mai i tena pakiaga ne sali ifo tela ko ufi katoa ei te fola o te kaliota i te afiafi, ko Aapo eiloa ko mate.

36Ko pili o to te la, kae vau te fakatonuga ki tino Isalaelu penei: “Foki atu ki otou fa'kai!”

37Tena, ne mate atu eiloa a te Tupu ko Aapo. A tena foitino ne ave ki Samalia, o tanu i ei.

38A tena kaliota ne ave o fulu i te vai o Samalia, te koga tena ne sepo ei ona toto ne kuli, mo fafine tali tagata e kou'kou sale i kona, ko taunu ei a muna a te Aliki ne fai.

39A nisi tala e uiga ki te Tupu ko Aapo, pela mo te tala o tena palesi tela e teu ki nifo o elefane, mo fa'kai katoa kola ne faite ne ia, e fakamau katoa i te tusi o Te Tala Tuku Fakasolo o Tupu o Isalaelu.

40Ne mate atu Aapo, kae sui ne tena tama tagata ko Asaia, o fai mo tupu.

Ko Iosefatu, te Tupu o Iuta(2NTupu 20.31—21.1)

41I te fa o tausaga o te nofoaiga a te Tupu ko Aapo o Isalaelu, ne fai ei a Iosefatu te tama tagata a Asa mo tupu o Iuta,

42kae ko tusa ei mo te tolusefulu lima ona tausaga. Ne fai a ia mo tupu i Ielusalema i tausaga e luasefulu lima. A tena matua ko Asupa, te tama fafine a Sili.

43A Iosefatu ne fai eiloa ne ia a te mea tonu i mua o te Aliki, e pela eiloa mo tena tamana ko Asa; ka ko koga tapuaki fapau'pau e seki ofa, tela la, a tino e tumau faeloa te olo o ofo olotou taulaga kae sunu mea manogi i kona.

44A Iosefatu ne fai te va fakataugasoa o ia mo te tupu o Isalaelu.

45A nisi tala e uiga ki a Iosefatu, pela mo taua ne tau a ia i ei, mo ana mea ne fai e iloga ei tena loto toa, e fakamau katoa i te tusi o Te Tala Tuku Fakasolo o Tupu o luta.

46Ne ta katoa ne ia a tagata tali fafine mo fafine tali tagata katoa kola e tavini i fata-fai-taulaga fapau'pau kola koi toe mai mai aso o tena tamana ko Asa.

47A te fenua o Etoma e seai sena tupu; kae e takitaki fua ne te sui tupu tela ne tofi ne te tupu o Iuta.

48Ne faite ne te Tupu ko Iosefatu a fuavaka kola e olo sale o aumai te aulo i Ofeila. Ne 'kasa a vaka kona i Esionikepa, seki toe olo sale eiloa.

49Tena, ne aumai ei a te fesoasoani a te Tupu o Isalaelu ko Asaia, ke o'mai a tagata a Iosefatu ke olo mo ana kauvaka i ana vaka, kae e seki talia ne Iosefatu te fesoasoani tena a Asaia.

50Ne mate atu Iosefatu kae ne tanu i te tanuga fakatupu i te Fa'kai o Tavita, kae ne sui a ia ne tena tama tagata ko Ieolamo o fai mo tupu.

Ko Asaia te Tupu o Isalaelu

51I te sefulufitu o tausaga o te nofoaiga a Iosefatu, te tupu o Iuta, ne fai ei a Asaia, te tama tagata a Aapo mo tupu o Isalaelu, kae ne tupu a ia i Samalia i tausaga e lua.

52Ne agasala a ia ki te Aliki, me ne tautali atu eiloa a ia i uiga ma'sei o tena tamana ko Aapo, mo tena matua ko Iesepela, mo te Tupu ko Ielopoamo, kola ne taki ne latou Isalaelu ki te agasala.

53Ne tapuaki atu a ia ki a Paala kae tavini atu foki ki ei. Ne fakaoso foki ne ia te kaitaua o te Aliki, te Atua o Isalaelu, e pela eiloa mo tena tamana.