ISAIA 47 - Tuvalu Revised Bible

Ko te Fakamasinoga o Papelonia

1

3Ka lavea koe ne tino i a koe e nofo fuafua;

Ka lavea ne latou a koe e fakamasiasigina.

Ka taui atu ne au te amioga masei a latou ne fai,

Kae e seai eiloa se tino e mafai o taofi ne ia au.”

4A te Atua tapu o Isalaelu ne fakasao ne ia tatou,

A tena igoa ko te Aliki Malosi.

5Muna a te Aliki ki a Papelonia,

“Sagasaga i te pouliga kae sa ua;

Ka se toe taku koe ko te tupu fafine o malo!

6Au ne kaitaua ki toku fenua;

Ne fai ne au latou pela me se ko oku tino:

Ne tuku atu ne au latou ki tou malosi,

Kae ne seki alofa eiloa koe ki a latou;

Ke oko foki eiloa ki tino matua e seki fai fakalei foki ne koe.

7A koe e leake eiloa nei i a koe ka fai faeloa mo tupu fafine o malo;

E seki mafaufau eiloa koe ki feitu kona

E seki mafaufau foki koe me se a te ikuga o mea kona.

8 Faka 18.7,8 “Fakalogo mai, koe tena e naunau ki fiafiaga,

Koe tena e manatu pela i a koe e saogalemu tou olaga.

E fai ake koe pela i a koe e takutakua pela mo te Atua,

Kae e seai foki se tino e pau mo koe.

E mafaufau foki koe i a koe e se mafai

O fai pela me se fafine ko mate tena avaga,

E fai mai foki koe i a koe e se mafai o fanoanoa me ko galo otou fanau.

9Kae ka taunu eiloa a mea kona i se taimi toetoe, i se aso e tasi.

E ui eiloa e fakaaoga ne koe a togafiti fakataulaitu,

Kae ka mate eiloa tau avaga mo tau fanau.

10“A koutou e fakatuaga eiloa ki otou amioga masei;

E leake eiloa nei koutou me e seai se tino

E lavea ne ia koutou.

A te otou poto mo te atamai ko fakase ne ia koutou.

E fai ake koutou ki a koutou eiloa penei,

‘Au ko te Atua — e seai se tino e pau mo au.’

11Ka oko mai te malaia ki a koutou,

Kae e se mafai ne otou taulaitu o fakagata te malaia tena.

Ka oko fakavave mai te fakamaseiga ki a koutou,

Ko te fakamaseiga tela e seki moe'miti eiloa koutou ki ei!

12Tausi fakalei otou togafiti fakataulaitu;

Ne fakaaoga sale eiloa ne koutou talu mai aso koi foliki ei koutou.

E se taumate ka maua se fesoasoani o koutou mai i ei;

E se taumate ka mafai o fakamatakutaku ei ne koutou otou fili.

13E ui eiloa i manatu fakatonutonu e maua ne koutou,

Ka ko koutou ko seai eiloa se otou malosi,

Fai ki otou tino poto i fetu ke o'mai o fakasao koutou,

Ko latou kona e tauloto ne latou a fetu,

Ko latou e lomi ne latou a fafanua o lagi,

Kae e fakaasi atu foki a mea e tupu i masina takitasi.

14“Ka pela latou me ne potumea o kausaito,

Kae ka sunu latou i te afi!

Ka se mafai foki ne latou o fakasao a latou eiloa;

A te ulaga afi ka to vela ki a latou,

E se se afi mo fakamafanafana latou.

15Tena eiloa te mea lei e mafai o fai ne te kau poto

i fetu mo koutou, ko latou kona kola ne

Olo sale koutou o fesili ki ei e uiga ki mea ka tupu,

Talu mai aso ne ola ei koutou.

Ka tiakina ne latou a koutou kae olo ki te koga e olo i ei,

E seai eiloa se tino e nofo mai o fakasao koutou.”