IOPU 8 - Tuvalu Revised Bible

Pilitati

1-2E a, ko gata eiloa tau faipatiga?

3E se mafai ne te Atua o fakatakapili te mea tonu; e se mafai o se fai ne ia a te mea tonu.

4E se taumate au tamaliki kāti ne agasala faeloa ki te Atua,

Tena ne fakasala ei ne ia latou e tusa eiloa mo olotou agasala ne fai.

5Fuli nei ki te Atua Malosi, o fakamolemole atu ki ei ke fesoasoani atu ki a koe;

6Kafai koe e fai mea tonu kae loto ma,

A te Atua e vau eiloa o fesoasoani atu ki a koe o toe fakaola tou kaiga,

E taui ei tou amiotonu.

7A tou maumea tela ne galo, ka se taitai eiloa o 'pau mo te mea tenei ka aumai ne te Atua ki a koe i te taimi nei.

8Onoono malie aka ki te poto taumua;

Kae mafaufau fakalei ki te poto ne tauloto ne 'tou tupuga.

9A te tou olaga e toetoe fua, e seai eiloa se mea e iloa ne tatou;

A tatou e pela fua me ne ata e faka'sili i te lalolagi.

10Ke talia ne koe te akoakoga a tagata poto taumua;

Fakalogo ki olotou muna;

11“A mouku o te vai e se mafai o ola aka i se koga e seai ne vai i ei;

E se mafai o maua ne mouku pena i se koga se suasua.

12Kafai e masa te vai, ko mouku kona e muamua o magemage,

Kae koi foliki e seki tau o kati ke fakaaoga.

13A tino se talitonu ki te Atua e pela eiloa mo mouku kona;

Kafai ko puli atu te Atua, ko galo atu foki te lotou fakamoemoega.

14E talitonu latou ki uka filo, ki leveleve o te pogaleveleve.

15Kafai e faka'pale latou ki te leveleve, e mata e mafai ne te leveleve o taofi aka latou?

Kafai e puke mau latou ki te uka filo, e mata e mafai ne te filo o taofi latou?”

16A tino masei e gasue aka, pela mo mouku e gasue manafai e kasa mai te la,

E pela mo mouku kola e ola valevale i se fatoaga.

17A aka o latou e mau ki fatu, e piki mau ki kaupapa.

18Kae kafai ko unu aka ki luga e seai eiloa se tino e iloa ne ia me ne ola aka i te koga tena.

19E tonu, tena eiloa te fiafiaga o tino masei;

Nisi ka o'mai o sui latou.

20Ka ko te Atua e se mafai o tiakina ne ia a tino talitonu;

E se mafai a ia o fesoasoani ki tino masei.

21Ka toe fai ne ia a koe ke toe katakata,

Kae toe pakalaga sale.

22Kae ka fakamasiasi a latou kola e ita ki a koe,

Ka ko fale o tino amio masei ka galo atu katoa.