FAATAOTO 7 - Tuvalu Revised Bible

1Taku tama, masaua aku muna ne fai kae sa puli a mea ne fai atu ne au ke fai ne koe.

2Fai a mea ne fai atu ne au kae ka ola koe. Tautali ki aku fakatonuga mo te fakaeteete e pela mo tou fakaeteete o puipui ou mata.

3Tausi ki aku akoakoga i taimi katoa; tusi ki tou loto.

4A te poto ke fai ne koe pela me se tuagaene o koe, ka ko te atamai ke fai mo taugasoa pili eiloa o koe.

5A te poto mo te atamai ka fesoasoani atu o fakamao koe keatea mai i avaga a nisi tagata, mai i fafine gutu molemole.

Ko te Fafine Masei

6I te aso e tasi, au ne kilokilo ki tua mai i te fakamalama o toku fale,

7kae ne lavea ne au a tamataene e tokouke kola koi foliki, kae e tokotasi ne matea atu ne au se tino valea.

8A ia tena e sasale i te auala i tafa o te matulimanu tela e tu ei te fale o te fafine e tokotasi. A te tamataene tena e fakasili aka i tafa o te fale o te fafine tena,

9i te afiafi ka ko pouli eiloa.

10Ne fakafetaui atu te fafine tena ki te tamataene, kae e pei ki gatu pela mo gatu o fafine tali tagata kae fai togafiti.

11A te fafine tena se fafine matafatu kae e se ma, kae e fanofano sale eiloa i auala

12io me e tu fakatalitali i matulimanu, i auala io me i maketi.

13Ne sai atu ana lima ki te tamataene, sogi atu ki ei, kilo tonu atu ki ona mata kae fai atu penei,

14“Ne fai aku taulaga i te aso nei, a kano o aku taulaga kola i toku fale.

15Tena te mea ne vau ei au o sala koe. Au ne manako ki a koe, kae tenei ko maua ne au koe!

16Ko oti ne ufi ne au toku moega ki sulukafu lino mai Aikupito.

17Ne fakamanogi ne au ki mulo, aloe mo kinamoni.

18Vau! Taua ka olo o moe i te po katoa tenei. Ka fiafia taua o moe fakatasi.

19A taku avaga e galo i te fale. Ne fano i se malaga leva.

20E uke ana tupe ne fano mo ia, tela la, e lua vaiaso tupu te leva o ia.”

21Tena, ne takolekole eiloa ne ia te tamataene, ko te tamataene eiloa ko talia ne ia ana muna takolekole.

22I te taimi tena a te tamataene ko fanatu i te fafine tena e pela me se pulumakau ko ave o ta, pela me se tia ko fano ki loto i te malei,

23te koga ka tui ei tena fatu ne se matasana. Ko pela a ia me se manu ko fano ki loto i te tili — e se iloa ne ia i tena ola ko pili o galo atu.

24Tela la, aku tama tagata, fakalogo mai ki a au. Saga tonu mai ki aku muna e fai atu.

25Sa taliagina se fafine pena ke ave ne ia otou loto; sa olo o tautali i ana tua.

26Ko tokouke tagata ne pakia i vaega fafine pena, ko tokouke foki tagata ne mate i fafine pena.

27Kafai koe e fano ki tena fale, a koe ko fano ki te lalolagi o tino mate. A te mea tena se auala toetoe ki te mate.