IOPU 23 - Tuvalu Revised Bible

1-2Au koi 'teke eiloa kae muimui ki te Atua;

E se mafai ne au o taofi toku tagi.

3Aku muna eiloa ke iloa ne au te koga e nofo ei te Atua;

Kae iloa foki ne au te auala ki te koga tena.

4Ka fakaasi ne au i ona mua a mea e mafa i toku loto

Kae fakaasi atu foki ki a ia a mea e iloa ne au e sao au i ei.

5E fia iloa ne au me ne a ana muna ka fai, me ka tali mai pefea a ia ki a au.

6E a, e mata ka fakaaoga ne te Atua a tena malosi katoa o teke au?

Ikai, ka fakalogo mai eiloa a ia i te taimi e faipati atu ei au.

7Au e amiotonu; e mafai ne au ke faipati fakalei maua mo te Atua;

Ka folafola atu ne ia i a au e se 'se.

8Ne sala au ki te Atua i te saegala, kae e galo i ei;

E seki maua foki ne au a ia i taku salaga ki ei i te togala.

9A te Atua ne galue i matū mo saute, kae e seki lavea eiloa ne au a ia ke oko mai ki te taimi nei.

10E iloa lei ne te Atua oku auala katoa;

Kafai e tofotofo ne ia a au, ka iloa aka ne ia i a au e ma faeloa.

11Au e tautali fakamaoni eiloa ki te auala tela ne filifili ne ia,

E se mafai ne au o fano ki tafatafa o te auala.

12E fai faeloa ne au a fakatonuga a te Atua;

E fai ne au te loto o te Atua, kae se ko mea e manako au ki ei.

13E se mafai eiloa a ia o fuli. E seai se tino e mafai ne ia o 'teke te Atua,

Io me taofi ke se fai ne ia a te mea tela e fakamoemoe a ia o fai.

14Ka fakataunu eiloa ne ia a tena fuafuaga e uiga ki a au;

A te fuafuaga a ia tena, se fuafuaga fua e tasi mai i ana fuafuaga e uke;

15Au e polepole i te mataku i ona mua.

16-17Ne fakatukaki ne te Atua Maluga a toku loto toa.

Ko te Atua e mataku ei au, kae se ko te pouliga,

Ka ko te pouliga ne fai ne ia a au ke kivi.