1A tino Filisitia ne taua mo tino Isalaelu i luga i te mauga o Kilipoa. E tokouke a tino Isalaelu ne mate i kona, ka ko te toega o latou, fakatasi mo te Tupu ko Saulo mo ana tama ne tele.
2Ne maua atu latou ne te kau Filisitia, tamate ei ne latou a tama tagata a Saulo e tokotolu: ko Ionatana, Apinatapu, mo Mikisua.
3Ko oko eiloa i te malosi o te taua i tafa o Saulo, tena ne tu ei a ia i matasana a te fili, pakia malosi eiloa a ia.
4Muna a ia ki te tamataene tela e pukepuke i ana meatau penei, “Tapale tau pelu o tamate au, ke mo a au e fakamasiasi ne te kau Filisitia fapaupau kona.” Ka ko te tamataene tena, e mataku ma fai te mea tena, tena la, ne puke aka Saulo ki tena pelu kae fakasiga ki ei.
5Ne lavea ne te tamataene tena i a Saulo ko mate, tena ne fakasiga foki ei a ia ki luga i tena pelu, mate atu foki a ia.
6Ne mate atu Saulo, fakatasi mo ana tama tagata e tokotolu, tena la, ko gata mai ei tena malo.
7I te logoga o tino Isalaelu kola e nofo i te Vanu o Ieseleelu i te kautau a latou ko 'tele, mo Saulo mo ana tama tagata ko mate, tena ne tiaki ei ne latou olotou fa'kai kae tele. Ne o'mai a te kau Filisitia, nofo ei i fa'kai kona.
8I te taeaoakega, ne olo atu te kau Filisitia o puke a mea taua i foitino mate o te kau Isalaelu, tena ne maua ei ne latou a te foitino o Saulo mo foitino o ana tama tagata e takato mai i luga i te Mauga o Kilipoa.
9Ne kati ne latou te ulu o Saulo, tapale keatea ana gatu tau, kae fakasalalau ne latou i Filisitia katoa a te tala 'lei ki olotou atua mo tino o te lotou fenua.
10Ne tuku ne latou ana meatau i te lotou faletapu kae fakatautau ne latou tena ulu i te faletapu o te lotou atua ko Takono.
11I te logoga o tino Iapese i Kileata i te mea tena ne fai ne tino Filisitia ki a Saulo,
12tena ne olo atu ei a tagata toa o te fa'kai tena o puke mai a foitino o Saulo mo ana tagata ki Iapese. Ne tanu ne latou olotou foitino i lalo o te lakau ko te oka, kae ne fakalikiliki latou i aso e fitu.
13 1Samu 13.8-14; 15.1-24; A Saulo ne mate me ne seki fakamaoni ki te Aliki. Ne teke ne ia a fakatonuga a te Aliki; ne taumafai a ia o sala sena fesoasoani mai agaga o tino mate,
14kae ne tau eiloa a ia o kalaga ki te Aliki kae se ko agaga o tino mate. Tena la, ne tamate a ia ne te Aliki kae tuku atu te malo ki lima o Tavita, te tama tagata a Iese.
Who We AreWhat We EelieveWhat We Do
2025 by iamachristian.org,Inc All rights reserved.
