LUKA 6 - Tuvalu Revised Bible

Ko te Fesili e uiga ki te Sapati(Mata 12.1-8; Male 2.23-28)

1 “Fola tou lima.” Ne fai eiloa ne ia pena, tela ne toe 'lei ei tena lima.

11Ko oko eiloa i te kaitaua o latou kae ne kamata o faipati i a latou eiloa, me se a te mea ka fai ne latou ki a Iesu.

Ko te Filifiliga ne Iesu a te Tinoagafulu mo te Tokolua Apositolo(Mata 10.1-4; Male 3.13-19)

12I te taimi tena, ne fano a Iesu ki luga i te mauga o 'talo, kae ne nofo i ei i te po katoa o 'talo ki te Atua.

13I te taeaoakega, ne kalaga atu a ia ki ona soko ke o'mai ki a ia, kae ne filifili ne ia te tinoagafulu mo te tokolua o latou, kae ne fakaigoa ne ia latou ki apositolo.

14Ko Simona tela ne fakaigoa foki ne ia ki a Petelu mo tena taina ko Anitelea, ko Iakopo mo Ioane, ko Filipo mo Patolomaio,

15ko Mata mo Toma, ko Iakopo te tama a Alefaio mo Simona tela ne fakaigoa ki a Selote, (ko tena uiga ko te tagata loto fenua),

16ko Iuta te tama a Iakopo mo Iuta te Isikaliota tela ko te fakalata.

Ko Akoako atu a Iesu kae Faka'lei Masaki(Mata 4.23-25)

17I te lotou oloifoga mai i te mauga, ne tu a Iesu i te koga laugatasi mo ona soko mo te vaitino. Ko oko eiloa i te tokouke o tino i te koga tena, ne o'mai i koga katoa o Iutaia mo Ielusalema, mo fa'kai i te feitu ki te tafatai o Tulo mo Saitonu;

18ne o'mai latou o fakalogo'logo ki a ia, kae ke fai foki ke 'lei latou.

19A tino katoa ne taumafai o fakapa'tele ki a ia, i te mana ko vau mai i a ia tela ko 'lei ei olotou masaki katoa.

Ko te Fiafia mo te Fanoanoa(Mata 5.1-12)

20Ne kilo atu a Iesu ki ona soko kae muna atu:

“Amutia koutou kola e ma'tiva:

me e o koutou te Malo o te Atua!

21“Amutia koutou kola e fia 'kai nei:

me e ma'kona koutou!

“Amutia koutou kola e 'tagi nei:

me e kata'kata koutou!

22 1Pete 4.14 “Amutia koutou i taimi e takalia'lia ei tino ki a koutou, kae se talia ne latou koutou, kae faimuna se 'tau ki a koutou, kae fai atu foki i a koutou ne tino masei, ona ko au te Tama a te Tagata!

232NTupu 36.16; Galu 7.52 Ke fia'fia koutou i te taimi e fakaoko ei te mea tena, kae 'saka mo te fiafia me i te otou manuia lasi tela i te lagi. Me i olotou tupuna ne fai foki ne latou a mea eiloa pena ki pelofeta.

24“Kae kalofa i a koutou kola e maumea nei:

ko oti ne maua ne koutou te olaga 'lei!

25“Kalofa i a koutou kola e ma'kona nei:

a koutou ka fia 'kai!

“Kalofa i a koutou kola e kata'kata nei:

a koutou ka fanoanoa kae 'tagi!

26“Kalofa i a koutou manafai a tino katoa e tavae e uiga mō koutou;

me i olotou tupuna ne faipati foki ne latou a mea foki eiloa kona ki pelofeta 'loi.”

Ko te Alofa ki Fili(Mata 5.38-48; 7.12a)

27“Kae fai atu au ki a koutou kola e fakalogo mai ki a au. Alofa ki otou fili, fai faka'lei ki tino kola e takalia'lia ki a koutou,

28fakamanuia atu ki tino kola e fetu ki a koutou, kae 'talo foki mo tino kola e fai mea se 'lei mo koutou.

29Kafai se tino e 'pa ne ia tou kalafau e tasi, toetuku atu te isi kalafau ke 'pa ne ia; kafai se tino e ave ne ia tou peleue, tuku atu foki mo ia se tilima.

30Tuku ki tino katoa kola e akai atu ki a koe ki ne mea, kae kafai e ave ne se tino sau mea, sa toe fai ki ei ke fakafoki mai.

31Mata 7.12 Pela mo te mea e ma'nako koutou ke fai atu ne nisi tino ki a koutou, ke fai foki eiloa ne koutou pena ki a latou.

32“Kafai e a'lofa koutou ki tino fua kola e a'lofa atu ki a koutou, ai a la e fakamoemoe ei koutou ki se fakamanuiaga? Me i tino agasala, e a'lofa foki ki tino kola e a'lofa ki a latou!

33Kae kafai e fai faka'lei koutou ki tino kola e fai faka'lei atu ki a koutou, ai a la e fakamoemoe ei koutou ki se fakamanuiaga? Me i tino agasala, e fai foki ne latou pena!

34Kae kafai e tuku atu fua ne koutou tupe ki tino kola e o'mai o kaitalafu mo te fakamoemoe ke toe maua mai, ai a la e fakamoemoe ei koutou ki se fakamanuiaga? Me i tino agasala, e tuku foki ne latou a tupe ke kaitalafu ne tino agasala, kae ke toe maua mai te aofaki eiloa tena!

35Ikai! Alofa ki otou fili, kae fai faka'lei ki a latou; avatu tupe ke kaitalafu kae sa fakamoemoe ke toe fakafoki mai. Ka maua ne koutou se taui lasi, kae kafai koutou mo fanau a te Atua Tafasili i te Maluga, i te mea i a ia e alofa ki tino kola e galo i a latou te loto fakafetai, pela foki mo tino ma'sei.

36Ke a'lofa atu koutou, e pela eiloa mo te otou Tamana e alofa.”

Ko te Fia Fakamasino ki Nisi Tino(Mata 7.1-5)

37“Sa fakamasino ki nisi tino, ko se fakamasino ei koutou ne te Atua; sa fakamasei ki nisi tino, ko se fakamasei ei koutou ne te Atua; fakamagalo atu ki nisi tino, ko fakamagalo ei koutou ne te Atua.

38Tuku atu fua a mea a koutou ki nisi tino, ka ko te Atua ka tuku atu ne ia a mea ki a koutou; ka maua ne koutou se fua katoatoa, se manuia lasi, ka 'ligi atu ki otou lima a mea katoa e mafai ne koutou o puke. Ko te fua e fakaaoga ne koutou ki nisi tino, ko te fua foki eiloa tena ka fakaaoga ne te Atua ki a koutou.”

39 Mata 15.14 Kae ne fai atu ne Iesu ki a latou a te muna fakatusa tenei: “A te tino kivi e se mafai ne ia o takitaki te isi tino kivi; kafai e takitaki ne ia, ko laua ka 'to ki loto i te lua.

40Mata 10.24-25; Ioa 13.16; 15.20E se sili atu te tamaliki akoga i tena faiakoga; kae kafai te tamaliki akoga ko palele ana akoakoga, ko pau ei mo tena faiakoga.

41“Ai a e onoono ei koe ki te potu lakau i te mata o tou taina, kae seai sau mea e fai ki te potu lakau i loto i tou mata?

42E mafai pefea ne koe o muna atu ki tou taina, ‘Taina, fakamolemole tuku mai ke seu ne au keatea te potu lakau i tou mata,’ kae se lavea ne koe te potu lakau i tou mata? A koe se tino loi. Seu muamua keatea te potu lakau i tou mata, ka palele, ko mafai ei ne koe o lavea kae seu keatea te potu lakau mai i te mata o tou taina.”

Ko te Lakau mo ona Fua(Mata 7.16-20; 12.33-35)

43“A te lakau ola 'lei e se fua mai ne ia ne fuataga ma'sei, pela foki te lakau ola masei, e se fua mai ne ia ne fuataga 'lei.

44Mata 12.33 A lakau katoa e iloa i olotou fuataga; e se mafai ne koutou o tau mai ne fuataga o mati mai lakau makai'kai, e se mafai foki ne koutou o tau mai ne kaufui vine i se lakau talatala.

45Mata 12.34 A te tagata 'lei, e fakaasi mai ne ia a mea 'lei mai i te fakaputuga o mea 'lei kola e tausi i tena loto; ka ko te tino masei, e fakaasi mai ne ia mea ma'sei mai fakaputuga o mea ma'sei i tena loto, a te gutu o te tino e faipati mai i ei a mea kola e fonu i tena loto.”

Ko te Tokolua Fai Fale(Mata 7.24-27)

46“Ai a e fai sale mai ei koutou ki a au, ‘Te Aliki, te Aliki,’ kae se fai ne koutou a mea kola e fai atu ei au?

47Ko te tino e vau ki a au kae fakalogo ki aku muna, kae fai ne ia, ka fakaasi atu ne au te tino e pau mo ia.

48E pau a ia mo se tagata ne faite se fale: ne keli ki lalo i te papa, kae ne faite te fakavae i luga i te papa. Ne lofia te vaitafe, kae ne oko te vai ki te fale tena; kae ne seki mafai o gasue te fale, me i te fale ko nofoga malie tena faitega.

49Ka ko te tino tela e lagona ne ia aku muna kae se fai ne ia, e pau a ia mo se tino ne faite se fale i luga o te laukele, kae seai se fakavae ne fai; kae i te okoatuga o te tafega o te vai ki te fale tena, ne siga fakavave kae maofa valevale!”