2 SAMUELU 13 - Tuvalu Revised Bible

Ko Amanono mo Tamala

1A te tama tagata a Tavita ko Apisaloma, e isi sena tuagaene taulekaleka kae seki avaga e igoa ki a Tamala. A Amanono, te sua tama tagata a Tavita ne fiafai ki a Tamala.

2Ko oko eiloa i tena fiafai ki a Tamala tela ko masaki ei a ia, me ko oko eiloa te mata faigata o maua ne ia a Tamala. A Tamala se taupou, tela la, e tausi fakamao eiloa a ia mai i tagata.

3Kae e isi se taugasoa o Amanono e igoa ki a Ionatana, te tama a Sama te taina o Tavita.

4Muna a Ionatana ki a Amanono, “A koe ko te tama a te tupu, kae e matea faeloa koe ne au e mata fanoanoa i aso takitasi. Se a te mea e fanoanoa ei koe?”

Ne tali atu a ia, “Au e fiafai ki a Tamala, te tuagaene tonu o toku afa taina ko Apisaloma.”

5Muna a Ionatana ki a ia penei, “Fakaloiloi pela i a koe e masaki, kae fano o moe. Kafai e fanatu tou tamana o asi atu ki a koe, fai ki ei penei, ‘Fakamolemole, fai aka ki toku tuagaene ko Tamala ke vau o fagai a au. Au e manako ke vau o fakatoka te meakai i konei, ke lavea atu a ia ne au, ko laulau mai foki ei ne ia a meakai ki a au.’ ”

6Tena, ne fai aka ei a Amanono i a ia ko masaki, fano eiloa o moe.

Ne fanatu te Tupu ko Tavita o asi atu ki a ia, kae fai mai a Amanono ki a Tavita, “Fakamolemole, fai ki a Tamala ke vau o fai ne mu keke i konei, ke lavea atu a ia ne au, kae ke laulau mai foki ne ia ki a au.”

7Tena ne uga ei te fekau a Tavita ki a Tamala i te palesi, muna a ia: “Fano ki te fale o Amanono o fakatoka ne meakai ma ia.”

8Ne fanatu Tamala, maua atu ne ia e moe mai i tena moega. Ne puke mai ne ia ne mu falaoa, faite ei ne ia ne keke i kona, ke matea mai a ia ne Amanono. Ne tao ne ia a keke, oti aka,

9tapale ei ne ia ki tua, kae avatu ke kai a Amanono, kae seki kai ne ia. Muna a Amanono, “Uga a tino katoa ke olo keatea,” tena ne olo katoa ei a tino mai i kona.

10Tena, fai atu ei a Amanono ki a Tamala penei, “Aumai a keke ki konei, ki toku moega, o fagai au ne koe.” Ne puke aka ne ia a keke, avatu ei ne ia ki a Amanono.

11I te tukuatuga ne Tamala a keke ki a Amanono, kae puke mai Amanono ki a ia kae fai mai penei, “Vau ke moe taua!”

12Ne fai atu Tamala, “Ikai, sa fai malogina au ke fai se mea tafalalo pena! Ko oko eiloa i te masei o tau mea tenei ka taumafai o fai!

13Ka fai te mea tenei mo mea e fakalumalumagina ei au i te fenua nei. Ka ko koe, a koe ka masiasi masei eiloa i luga i Isalaelu. Fakamolemole, faipati ki te tupu, kae talitonu au me e tuku mai eiloa ne ia a au ki a koe.”

14Ka ko Amanono e se fia fakalogo eiloa ki a Tamala; tena ne puke mālo eiloa ne ia a Tamala me e malosi atu la a ia i a Tamala.

15Tena, ko Amanono eiloa ko poko te takalialia i a Tamala; ko lasi atu tena takalialia ki a Tamala i te taimi nei, i lo tena alofa ki ei i te taimi muamua. Muna a Amanono ki ei, “Fano keatea!”

16Ne tali atu Tamala, “ikai.” “E sili atu te masei ma uga mai ne koe au penei i lo tau mea tenei ne fatoa fai atu nei!”

Ka ko Amanono e se fia fakalogo eiloa ki ei;

17ne kalaga atu a ia ki tena tavini kae fai ki ei penei, “Ave keatea te fafine tenei mai oku mua! Pei atu ki tua kae loka mai te mataloa!”

18Ne puke atu te tavini ki te fafine tena, pei atu ki tua kae loka te mataloa.

A Tamala e pei ki te gatu 'loa kae lima 'loa foki, te gatu eiloa e masani o pei sale ki ei a pulinisese kola e seki avaga i aso kona.

19Ne faka matu'tutu ne ia a lefu ki tena ulu, saesae tena gatu 'loa, kae tagi o fano, mo ana lima e pono i ona mata.

20I te laveaga a ia ne tena tuagaene ko Apisaloma, ne sili atu ei penei, “A koe ne fai ne Amanono? Tuagaene, fakamolemole, sa saga malosi ki ei. A ia se tuagaene foki o koe, e tamana tasi koulua kae matua kesekese, tela la, sa faipati ki se tino e uiga ki te mea tena.” Tena, ne nofo eiloa a Tamala i te fale o Apisaloma, mo te fanoanoa.

21I te logoga a Tavita i te mea ne tupu, ko oko eiloa i ana kaitaua.

22A Apisaloma ko oko eiloa i te takalialia i a Amanono ona ko te puke malōga ne ia o tena tuagaene ko Tamala, tela la, ko se toe faipati eiloa a ia ki a Amanono.

Amanono ko Tamate ne Apisaloma

23E lua tausaga mai tua ifo, kae fai te velega o fulufulu o mamoe a Apisaloma i Pala Hasola, i tafa o te fa'kai foliki o Efalaima, tela ne kami ei ne ia a tama tagata katoa a te tupu ke olo atu ki kona.

24Ne fanatu a ia ki te Tupu ko Tavita, kae fai atu penei, “Tou Malu, aku mamoe nei ka vele olotou fulufulu. E talia ne koe ke o'mai koutou mo au ofisa ki te fakafiafiaga o te velega o fulufulu o aku mamoe?”

25Ne tali atu te tupu, “Taku tama, kāti ka to lasi tau fakatokatokaga manafai e olo atu katoa matou.” Ne finau atu eiloa Apisaloma, kae makeke eiloa te tupu i a latou se olo, tena ne fai atu ei a ia ki a Apisaloma ke na fano.

26Kae ne fai atu Apisaloma, “Kae a, e talia ne koe ke tuku mai toku taina ko Amanono ke vau?”

Ne fesili atu te tupu, “Ai a e fanatu ei a ia?”

27Ka ko Apisaloma e finau eiloa, tena ne tuku atu ei ne Tavita a Amanono mo ana tama tagata katoa ke olo mo Apisaloma.

Ne fakatoka ne Apisaloma se 'kaiga lasi pela me se 'kaiga a te tupu.

28Kae fakatonu atu ki ana tavini penei: “Kilo'kilo faka'lei ki a Amanono manafai ko to kona, ko tamate ei manafai e fai atu ne au te fakatonuga ke tamate. Sa ma'taku. A te 'se e i luga eiloa i a au. Ke 'toa otou loto, kae sa fakatalave!”

29Tena, ne faka'logo eiloa a tavini kona ki te fakatonuga a Apisaloma, tamate ei ne latou a Amanono. Ne fakatau sopo a tama tagata katoa a Tavita ki olotou miula, te mea eiloa ko 'tele.

30I te lotou auala ki olotou fale, ne oko atu te tala ki a Tavita penei: “A au tama tagata katoa ko palele ne 'ta ne Apisaloma, e seai eiloa se tino ne sao!”

31Ne tu aka te tupu, saesae ona gatu i te fanoanoa, kae fakasiga ifo ki te laukele. A tavini kona e 'nofo mo ia i kona, ne sae'sae foki olotou gatu.

32Kae ne fai atu mo Ionatana, te tama tagata a Sama te taina o Tavita penei, “Tou Malu, e seki tamate ne latou au tama tagata katoa. Ko Amanono fua ne tamate. E tau o lavea ne koe i mata o Apisaloma, me ko leva ne mafaufau o fai te mea tena, talu mai te taimi ne puke mālo ei ne Amanono tena tuagaene ko Tamala.

33Tela la, sa talitonu ki te tala i au tama tagata katoa ko mate; ko Amanono fua ne tamate.”

34I te taimi tena, a Apisaloma i ei ko oti ne sola.

I te taimi foki eiloa tena, ko te sotia tu eiloa ko lavea ne ia se potukau e o'mai mai te koga maluga i te auala mai Holonaima. Ne fano a ia ki te tupu, fakaasi ei ne ia a te mea ne lavea ne ia.

35Muna a Ionatana ki a Tavita, “Ko au tama tagata kona ko o'mai, e pela eiloa mo aku muna me e o'mai eiloa.”

36I te otiga o ana pati kona, ko tama tagata eiloa a Tavita ko ulu atu ki loto; ne 'tagi latou i kona, pela foki Tavita mo ana ofisa.

37-38Apisaloma ne sola ki te tupu o Kesula ko Talamai, te tama tagata a Amiuta, nofo eiloa a ia i kona i tausaga e tolu. Ne tagi fanoanoa eiloa Tavita mō tena tama ko Amanono i se taimi leva eiloa;

39kae i te 'tokaga o te loto o te tupu i te mate o Amanono, kae oko atu ki a ia te alofa ki tena tama ko Apisaloma tela ne sola.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help