1E isi se tino ne seki fakalogo ki te fakatonuga a te Aliki ke mo a e puke so se mea mai te fa'kai o Ieliko tela e tau o fakamasei. A te tagata tena ko Akana, ne teke ki te fakatonuga a te Aliki, tela la, ne kaitaua ei te Aliki ki tino Isalaelu. A Akana ko te tama tagata a Kami, kae ko te mokopuna o Sapeti, kae e nofo i te kaukaiga o Sela, se vaega o te matakaiga o Iuta.
2Ne uga ne Iosua ne tagata mai Ieliko ki Ai, se fa'kai i te feitu ki te saegala o Peteli, i tafa o Petavene, mo te fakatonuga ke sukesuke fakalei te fenua tena. I te otiga o te sukesukega a latou,
3ne fai ei te lotou lipoti ki a Iosua penei: “E se tau o olo te kautau katoa o puke a Ai. Uga fua e lua me tolu afe tagata. Sa avegina te kautau katoa o taua i kona, me e se se fa'kai lasi.”
4Tena, e tusa mo te tolu afe tagata Isalaelu ne olo o puke te fa'kai tena, kae ne afuli mai latou ne tino o Ai.
5Ne afuli mai latou ne tagata Ai mai te fa'kai, ke oko ki koga kola ne keli, kae tusa mo te tino tolu mo te toko ono tino Isalaelu ne tamate ne latou i te auala o latou ki lalo mai te mauga foliki tena. Tena, ne vaivai ei a loto o tino Isalaelu kae mataku.
6Tena ne saesae ei a gatu o Iosua mo takitaki o Isalaelu i te fanoanoa, kae fakasiga ki lalo i te laukele i mua o te Pusa o te Feagaiga a te Aliki, 'takato eiloa i kona ke oko ki te afiafi, mo pefu i olotou ulu o fakaasi te lotou fanoanoa.
7Tena ne fai atu ei a Iosua penei, “Te Aliki te Atua! Ai a ne aumai ei ne koe matou ki te feitu tenei o te Iolitana? O tuku matou ke ta ne tino Amoli? Ke 'ta fakapalele matou? Ai a seki na tuku mai ei matou ke nofo i te sua feitu o te Iolitana?
8Te Aliki, se a taku mea ka fai, a te kau Isalaelu nei ko oti ne atuli mai ne te fili?
9Ka logo a tino Kanana mo tino katoa i te fenua tenei i te mea tenei. Ka o'mai o nikoi matou, kae tamate matou! Se a tau mea ka fai o fakasao tou igoa malu?”
10Muna a te Aliki ki a Iosua, “Tu ki luga! Ai a e ta'kato ei koutou pena i luga i te laukele?
11A Isalaelu ko oti ne agasala! Ko oti ne ofa ne latou taku feagaiga ki a latou. Ko oti ne puke ne latou a mea kola ne tau o fakamasei. Ne kaisoa ne latou, kae fakaloiloi pela me e a latou, kae tuku fakatasi ne latou mo olotou mea.
12Tena te mea e se mafai ei ne tino Isalaelu o fakafeagai olotou fili. Ne tele latou mai olotou fili me i a latou nei ko fakamalaia ke ta fakapalele! Au ka se fakatasi atu ki a koutou, vagana ke fakama'sei mua ne koutou a mea kola ne fakatonu atu ke se puke ne koutou!
13Tu ki luga! Faka'ma a tino o Isalaelu, kae fai ki ei ke fakatoka o o'mai ki oku mua. Fai ki ei ke toka mō te aso taeao, me i te Aliki te Atua o Isalaelu e fia faipati atu ki a latou penei: ‘Isalaelu, e isi ne mea i a koutou kola ne fakatonu atu ne au ke se puke ne koutou, kae ke fakama'sei katoa! E se mafai eiloa o fakatakavale ne koutou otou fili, vagana ke fakama'sei mua a mea kona!’
14Tena la, fai atu ki a latou, i te tafataeao taeao, e tau latou o o'mai ki oku mua, i matakaiga takitasi. A te matakaiga tela e fakasino atu ne au e tau o o'mai ki oku mua i ona kaukaiga takitasi. A te kaukaiga tela e fakasino atu ne au e tau o o'mai ki mua i ona kaiga takitasi. A te kaiga tela e fakasino atu ne au e tau o o'mai ki mua i tagata taki tokotasi.
15A te tagata tela e fakasino atu ne au, kae maua atu i a ia a mea kola ne seki tau o puke ne ia, e tau o sunu fakatasi mo tena kaiga mo ana mea katoa, me ko oti ne fakamasiasi ne ia Isalaelu, kae ofa foki ne ia taku feagaiga.”
16I te tafataeao o te sua aso, ne aumai ei ne Iosua te fenua o Isalaelu, i ona matakaiga takitasi ki mua o te Aliki. Ko te matakaiga o Iuta ne fili ne te Aliki.
17Ne aumai ne Iosua te matakaiga o Iuta ki mua o te Aliki, i ona kaukaiga takitasi, ka ko te kaukaiga o Sela ne fili mai i ei. Tena ne aumai ei ne ia a kaiga takitasi i te kaukaiga o Sela ki mua, ka ko te kaiga o Sapeti ne fili mai i ei.
18Tena, ne aumai a tagata taki tokotasi i te kaiga tena o Sapeti ki mua, tena ne fili mai i ei a Akana, te tama tagata a Kami, kae ko te mokopuna o Sapeti.
19Muna a Iosua, “Taku tama, fakaasi mai te mea tonu i konei, i mua o te Aliki, te Atua o Isalaelu, i a koe ko oti ne agasala. Fakaasi mai te mea ko oti ne fai ne koe. Sa taumafai o funa mai i a au.”
20Tena ne tali atu ei Akana penei, “Au ko oti ne agasala ki te Aliki, te Atua o Isalaelu. Tenei te mea ne fai ne au.
21Mai mea kola ne puke ne matou, ne matea ne au se gatu Papelonia ko oko eiloa i te gali, e lua kilokalame o siliva mo te potu aulo e silia atu i te afā kilokalame i te mafa. Ne manako malosi ki ei toku loto tela ne puke ei ne au. Kona e tanu i loto i toku faleie, ko te siliva e tafa ki lalo.”
22Tena ne uga ei ne Iosua ne tagata ke olo o puke mai a mea kona, tena ne maua atu eiloa ne latou me e tanu eiloa i tena faleie mo te siliva e tafa ki lalo.
23Ne avatu ne latou a mea kona ki a Iosua mo tino Isalaelu katoa, fakatakato ei ne latou i mua o te Aliki.
24Tena ne puke ei ne Iosua mo tino Isalaelu katoa a Akana mo te siliva, te potu aulo mo te gatu Papelonia, fakatasi mo tama tagata mo tama fafine a ia, mo ana pulumakau mo mamoe mo asini mo tena faleie mo ana mea katoa, ave ei ki te Vanu o Fakalavelave.
25Muna a Iosua, “Ai a ne aumai ei ne koe te puapuaga tenei ki luga i a matou? Ka aumai nei ne te Aliki se puapuaga ki a koe!” Tena, ne peipei ei a Akana ne te fenua katoa ke mate; ne peipei foki kae sunu ne latou tena kaiga mo ana mea katoa.
26Ne fakaputu ne latou a fatu i luga i tena foitino, tenei eiloa e tu mai ki aso nei. Tena te mea koi fakaigoa ei te koga tena ko te Vanu o Fakalavelave.
Tena, gata eiloa te kaitaua o te Aliki.
Who We AreWhat We EelieveWhat We Do
2025 by iamachristian.org,Inc All rights reserved.
