1Ne gasolo eiloa o fai masei te oge i Kanana,
2tela la, i te palelega o saito a te kaiga o Iakopo, kola ne aumai mai Aikupito, ne fai atu ei a Iakopo ki ana tama penei, “Toe olo o togi mai ne mu meakai ma tatou.”
3Muna a Iuta ki a Iakopo, “A te kovana o Aikupito ne faipati malosi mai eiloa ki a matou me e se mafai eiloa matou o olo atu ki ona mua kae galo Peniamina.
4Kafai e talia ne koe ke olo matou mo Peniamina, ko olo ei matou o togi mai ne meakai.
5Kafai e se talia ne koe, e se olo foki matou, me i te tagata tela ne fai mai ke mo a eiloa matou e sae atu i ona mua kae galo Peniamina.”
6Muna Iakopo, “Ai a ne fakapuapuaga ei ne koutou au, o taku atu ki te tagata tena me e isi aka foki se otou taina?”
7Ne tali mai latou penei, “I te mea la e fesilisili faeloa ki te tou kaiga; muna ia, ‘E a koi ola te otou tamana? E isi aka foki se otou taina aka?’ E tau la mo matou o tali a fesili kona. E iloa foki la pefea ne matou me ka fai mai ke olo atu matou mo te motou taina?”
8Muna a Iuta ki tena tamana, “Tuku mai Peniamina ke olo matou, ke na olo matou; ke mo a e mate tatou i te fiakai.
9Ka tausi fakalei ne au a ia, ka ko au foki ka fakasala mafai e isi se mea e tupu ki a ia. Kafai e isi se mea e tupu ki a ia, a te sala e paku eiloa ki a au.
10Moi ne seki faka'lave matou ne te mea tena, penei ko leva eiloa matou ne foki fakalua mai Aikupito.”
11Muna te lotou tamana, “Kafai se mea e tau ke fai pena, ke ave la ne koutou ne mea taua eiloa o te tou fenua mo fai meaalofa ki te kovana, ne mu pulukau, mu hani, mu mea fakamanogi, mu fuaga o te niu piu mo ne alamoni.
12Ave ke uke otou tupe, me e tau o toe fakafoki ne koutou a tupe kola ne maua ne koutou i loto i otou taga. E se taumate kaati se mea 'se mai i a latou.
13Puke te otou taina kae na olo.
14A te Atua Malosi ke fai ne ia te tagata tena ke alofa atu ki a koutou, ko te mea ke tuku atu ne ia ki a koutou a Peniamina mo Simeona. Ka ko au, kafai se mea eiloa ko fai ke galo aku tama, seai foki la se mea e mafai ne tatou o fai.”
15Tena, puke aka ne tautaina a meaalofa mo tupe e faluaina i te uke, kamata ei te malaga a latou ki Aikupito, fakatasi mo Peniamina. I kona, ne olo atu ei latou ki mua o Iosefa.
16I te mateaga ne Iosefa i a Peniamina e o'mai mo latou, tela ne fai atu ei a ia ki te tavini pule i tena fale penei, “Taki atu a tagata konei ki toku fale, me ka kai fakatasi mo au i te tutonu nei; tela la, ta mai se manu kae fakatoka fakalei.”
17Ne fai eiloa ne te tavini te fakatonuga a Iosefa, tela ave ei ne ia a tautaina kona ki te fale o Iosefa.
18I te taimi ne ave ei latou ki te fale, ne mataku latou kae mafaufau aka penei. “A tatou ko aumai ki konei ona ko tupe kola ne fakafoki mai i tou taga i te taimi muamua. E iku o puke ne latou a tatou, fao tou asini kae fai tatou mo ana pologa.”
19Tena, i te okoatuga o latou ki te mataloa o te fale, ne fai atu ei latou ki te tavini pule penei,
20“Tou malu eiloa, a matou nei ne o'mai foki ki konei muamua o togi meakai.
21I te motou auala o foki, ne manava matou i se koga e tasi o moe i ei i te po, kae i te talaga o motou taga saito, ne maua atu ne matou a motou tupe e tuku mai i omotou taga ko te katoaga eiloa o omotou tupe takitokotasi. Tenei la ko toe aumai ne matou o toetuku atu ki a koe.
22E isi aka foki ne tupe ne au'mai mo matou ke toe togi aka ne omotou meakai. E seiloa ne matou me ko oi te tino ne toetuku ne ia a omotou tupe ki omotou taga.”
23Muna a te tavini tena penei, “Sa manavase. Sa mataku. E se taumate, ko te otou Atua, te Atua o te otou tamana ne fakafoki atu ne ia otou tupe ki loto i otou taga. A te togi o otou meakai ne maua eiloa ne au.” Oti aka, aumai ei ne ia a Simeona ki a latou.
24Ne taki atu ne te tavini tena a tautaina kona ki loto i te fale, tuku atu ne ia ne vai mo fulu olotou vae, kae fano ei a ia o fagai olotou asini.
25Ne fakatoka olotou meaalofa, ke tuku ki a Iosefa mafai e oko mai i te tutonu, me ko oti ne iloa ne latou i a latou e kai mo Iosefa.
26I te okomaiga o Iosefa, ne olo atu latou mo olotou meaalofa ki loto i te fale, o tuku atu ki a Iosefa. Tena, ne ifo atu ei latou i ona mua.
27Ne fesili atu a Iosefa me e a latou, kae fai atu penei, “A koutou ne fai mai i te otou tamana ko matua, e a la nei a ia, koi ola mo te malosi me ikai?”
28Ne tali atu latou penei, “A tau tavini tena ko te motou tamana, e malosi faeloa.” Tena ne totuli ei latou o ifo i ona mua.
29I te mateaga ne Iosefa a Peniamina, ne fai atu ei a ia penei, “Io, tenei te otou taina tela ne fai mai ei koutou ki a au. Ke fakamanuia atu te Atua ki a koe, taku tama.”
30Tena, ne fano fakavave a Iosefa keatea mo latou, me ko oko atu ki a ia te loto alofa ki tena taina. Toe itiiti eiloa kae tagi a Iosefa i olotou mua, tela ne fano ei ki tena potu o tagi i ei.
31I te otiga ne mulu fakalei o ona mata, ne ulu mai ei a ia ki tua ki ona taina. Ne taumafai eiloa a Iosefa o fa'ki tena tagi, kae fakatonu atu ki ana tavini ke na laulau aka a meakai.
32A Iosefa e kai i te taipola e tasi, ka ko ana taina e kai i te isi taipola. A tino Aikupito i kona e kai foki i te taipola fakaatea, me i olotou mafaufauga, e se tau latou o kai fakatasi mo tino Epelu me ne tino se aoga fua.
33A taina o Iosefa e sagasaga i te taipola tela e fakafesagai ki a Iosefa, kae e nofo eiloa latou, e fakasolo fakalei eiloa mai te tino matua ke oko ki te tino foliki. I te mateaga ne latou i a latou e fakanofo pena, ne fakatau kilokilo aka latou mo te ofo me ko oi ne fakanofo ne ia latou pena.
34A meakai ne laulau mai ki a latou mai te taipola a Iosefa, ka ko Peniamina ne laulau ki ei e lima taimi te uke o meakai kola e laulau ki ona taina. Tena, ne kai kae inu ei latou mo Iosefa ko te mea eiloa ko konā.
Who We AreWhat We EelieveWhat We Do
2025 by iamachristian.org,Inc All rights reserved.
