EPELU 10 - Tuvalu Revised Bible

1A te Tulafono faka-Iutaia, e se ko te ata katoa io me se tina fakatusa o mea tonu. Se ata 'nefu fua o mea 'lei ka oko mai. Ko taulaga mau eiloa kona e ofo atu ki te se gata mai, mai te sua tausaga ki te sua tausaga. Tela la, e mafai pefea ne te Tulafono o faka'ma ne ia a tino kola e o'mai ki te Atua e auala i taulaga konei?

2Kafai ko tino e tapuaki ki te Atua ko faka'magina katoatoa mai olotou agasala, e se toe agasala latou, ko se toe fakaaoga foki a taulaga.

3Kae tonu, a taulaga e fakamasaua ki tino i olotou agasala, mai te sua tausaga ki te sua tausaga.

4Me i te toto o pulumakau mo kouti, e se mafai lele ne latou o fakamagalo agasala.

5Sala 40.6-8Tenei te pogai ne fai atu ei a Keliso ki te Atua, ka ko pili o vau a ia ki te lalolagi, ana muna:

“E se manako a koe ki se taulaga io me se taulaga o manu ne 'ta,

Ko oti ne fakatoka ne koe se foitino mo oku.

6E se fiafia foki koe ki te taulaga e fai ki manu e 'sunu katoa i luga o te fata faitaulaga,

Pela foki mo te taulaga mō agasala,

7Tela, fai atu ei au, ‘Tenei au e te Atua,

O fai a te mea e loto koe ki ei,

E pela eiloa mo muna ne tusi e uiga ki a au i te tusi o te Tulafono.”’

8Ne fai mai muamua a ia penei: “E se manako koe ki taulaga, e se fiafia foki koe ki taulaga o manu ne 'ta, io me ko te taulaga o manu 'sunu i luga o te fata faitaulaga io me ko taulaga mō agasala.” Konei a taulaga e fai e tusa mo te Tulafono.

9Ne fai mai foki penei: “Tenei au e te Atua, o fai te mea e loto koe ki ei.” Tela, ave ei keatea ne te Atua a taulaga mua, kae sui atu ne ia ki te taulaga ko Keliso.

10Tela la, ne fai eiloa ne Iesu Keliso te mea tela ne loto ki ei te Atua ke fai ne ia, ko fakamagalogina ei o'tou agasala, e alatu i te taulaga ne fai ne ia, ko tona foitino, tela ne ofo atu fakatasi mō tino katoa.

11 Eso 29.38 A faitaulaga Iutaia e fai sale olotou tiute fakafaitaulaga i aso katoa, kae fai faeloa ne latou a vaega taulaga e masani ei latou. Kae se mafai eiloa o magalo agasala i ei.

12Sala 110.1Ka ko Keliso ne ofo atu ne ia e tasi faeloa te taulaga mō agasala, ko te taulaga e tumau tona 'lei ki te se gata mai; nofo ei a ia i te koga taua ko te feitu fakaatamai o te Atua.

13Ko fakatali nei i kona ke oko ki te taimi e tuku ei ne te Atua ona fili ke fai mo mea e tuku ei ona vae.

14Tela la, mai te taulaga e tasi tenei, ko faka katoatoa ne ia ki te se gata mai a latou kola ko oti ne faka'magina mai i olotou agasala.

15Me i te Agaga Tapu ne molimau mai muamua ki a tatou penei:

16 Iele 31.33 “Tenei te feagaiga e fai ne au mo latou

Mai tua o aso kona, muna a te Aliki:

E tuku ne au i olotou loto aku tulafono,

Kae tusi foki ne au i olotou mafaufau.”

17 Iele 31.34 Ne toe fai mai foki, “E se toe mafaufau foki au ki olotou agasala mo olotou amio masei.”

18Tela la, kafai ko fakamagalogina a agasala konei, ko se toe manakogina a te taulaga mō agasala.

Ke Fakapilipili Tatou ki te Atua

19Taina, ko maua ne tatou te saolotoga katoatoa o ulu atu ki loto i te Potu e Sili i te Tapu, e alatu i te mate o Iesu.

20Ko 'tala ne ia te auala fou mō tatou, ko te auala ola tela e ui atu ei i te 'pui; ko tona uiga ko tona foitino tena.

21E isi se tou faitaulaga maluga e pule i te fale o te Atua.

22Levi 8.30; Eseki 36.25Ke fakapilipili tatou ki te Atua, i te loto talitonu fakamaoni mo te fakatuanaki, mo loto foki ko faka'magina mai te agasala o te mafaufau, mo foitino foki ko fakakoukougina ki te vai 'ma.

23Ke puke mautakitaki tatou ki te fakamoemoega e folafola atu ne tatou, me mafai ne tatou o talitonu i te Atua e tausi ki tena folafolaga.

24Ke mafaufau te sua tino ki te sua tino, ke fakatau fesoasoani foki koutou o fakaasi te alofa mo te fai mea 'lei.

25Ke tumau faeloa te maopoopo sale o tatou, e pela eiloa mo te mea e masani ei a nisi tino o koutou. A te mea sili ke fakatau fakamalosi eiloa ne tatou otou loto; i te mea ko iloa ne koutou i te Aso o te Aliki ko pili mai.

26Kafai e fakamoemoe tonu faeloa tatou o fai te agasala ka ko oti ne talia ne tatou te munatonu, ko tena uiga, ko se toe iai se isi taulaga e mafai o fakamagalo ei otou agasala.

27Isa 26.11A tino e 'tau o mataku ki mea ka 'tupu; tela ko te fakamasinoga mo te afi fakamataku, me fakamalaia ei a tino kola e 'teke ki te Atua!

28Teu 17.6; 19.15So se tino e ofa ne ia te Tulafono a Mose e tamate e aunoa mo te alofagina, manafai e fakamasinogina a ia mai te molimau a se tokolua io me se tokotolu.

29Eso 24.8Se a te mea e fai ki te tino e fakaseaoga ne ia a te Tama a te Atua? Io me ko te tino e manatu māmā ki te toto o te feagaiga a te Atua ne faka'ma ei a ia? Io me faifai muna foki ki te Agaga o te alofa tauanoa? Mafaufau faka'lei i te sili atu o te fakasalaga e maua ne ia!

30Teu 32.35; Teu 32.36E iloa ne tatou a ia tela ne fai mai penei: “E aku te taui mo sui, e toe taui atu foki ne au,” ne toe fai mai foki, “A te Aliki e fakamasino ne ia ona tino.”

31Se mea fakamataku mana maua koe ne te fakasalaga a te Atua ola!

32Ke masaua a mea ne 'tupu ki a koutou i aso ko teka. I aso kona, i te otiga ne 'sulu atu te mainaga o te Atua ki a koutou, e uke a puapuaga ne fepaki mo koutou, kae ne seki takavale koutou i ei.

33E isi ne taimi ne muna maseigina kae fai maseigina koutou i mata o tino, ka ko nisi taimi ko toka foki koutou o kau fakatasi mo latou kola ne fai pena.

34Ne kau fakatasi foki koutou ki puapuaga o pagota, kae i te otiga ne puke malo otou koloa, ne kufaki mo te fiafia ne koutou a te mea tena, i te mea e iloa ne koutou me isi se mea e sili atu e fakamoemoe koutou ki ei, tela e tumau ki te se gata mai.

35Loto ma'losi me maua ei te taui sili.

36E 'tau koutou o kufaki, ko te mea ke fai ne koutou a te loto o te Atua, ke maua a te mea ne folafola mai ne ia.

37E pela mo muna a te Tusi:

“E se leva eiloa nei,

Kae oko mai a ia tela e vau;

E se fakatuatuai eiloa.

38E ola a tino amiotonu i te fakatuanaki;

Kae kafai se tino o latou e toe foki ki tua, e se fiafia toku loto ki a ia.”

39A tatou e se ne tino e 'tau o toe 'foki ki tua ki te malaia. Kae nei, ko iai te tou fakatuanaki e ola ei tatou.