FAILAUGA 7 - Tuvalu Revised Bible

Ko Mafaufauga e Uiga ki te Olaga

1

15A toku olaga se olaga e se aoga, kae e tasi te mea ne maua ne au mai i ei, me ne lavea kae iloa ne au a mea katoa. I nisi taimi, e mate te tagata 'lei ka ko te tagata masei e ola faeloa.

16Tela la, sa manako ke to lei koe, io me manako ke to poto koe, ai a ka sona fai fua ei koe ke mate?

17Kae sa to amio masei foki io me to valea — ai a ka sona fai fua koe ke mate kae seki oko mai tou taimi?

18Taumafai o kalo keatea mai feitu kona e lua. Kafai koe se tino lotu a koe e manuia eiloa.

19E lasi atu te aoga e maua ne te tagata mafai a ia e poto, i lo te aoga e mafai ne te tinogafulu takitaki o fai ki se fa'kai.

20E seai se tino i te lalolagi e fai faeloa ne ia te mea tonu kae se mafai o 'se.

21Se saga sale ki mea katoa e faipatigia ne tino — i se taimi, ka lagona ne koe tau tavini e fai muna se 'lei e uiga ki a koe,

22kae e iloa faka'lei foki ne koe me ko oti foki koe ne fai muna se 'lei ki nisi tino i taimi e uke.

23Ne fakaaoga ne au toku poto o tofotofo katoa a mea kona. Au ne fakamalosi eiloa ko au ke poto, kae ko to faigata ki a au.

24E mafai pefea ne se tino o iloa te uiga o te olaga tenei e ola tatou i ei? Ko to loto te feitu tena ki a tatou, ko to faigata o malamalama tatou i ei.

25Ka ko au ne saga malosi o tauloto; au ne fakamalosi eiloa o sala te poto, mo tali ki aku fesili, kae sukesuke foki te masei o te valea.

26Ne maua aka ne au te mea e tafasili atu i te kona i lo te mate — ko te fafine. A te alofa tela e tuku atu ne ia ki a koe ka lave ei koe pela me se tino e lave i se malei io me se tili; a lima o ia kola e puke atu ki a koe ka sai ne ia koe e pela me se filifili. A te tagata e fiafia ki ei te Atua e mafai o sao, ka ko te tino agasala e maua gofie ne te fafine.

27Muna a te failauga, e tonu, ne maua ne au te mea tena i te taimi ne sukesuke ei au ki tali o aku fesili.

28Ne sukesuke foki au ki nisi tali o nisi fesili kae e seki maua eiloa ne au. E tokotasi te tagata i se toko afe ne maua ne au e mafai o fakaaloalo au ki ei, kae e seai eiloa se fafine e mafai o fakaaloalo au ki ei.

29Tenei fua te mea ko oti ne iloa ne au: tatou ne faite ne te Atua ne tino fatauva ka ko tatou ko fai eiloa ne tatou a tatou ke pela me ne tino ko se atafaia eiloa.