NUMELA 1 - Tuvalu Revised Bible

Ko te Lauga Muamua o Tino Isalaelu

1 Nume 26.1-51 I te po muamua o te lua o masina, ka ko tusa ei mo te lua tausaga ne tiakina ei ne tino Isalaelu a te fenua o Aikupito, ne faipati mai ei a te Aliki ki a Mose i te Faleie, i te Vao o Sinai. Muna a ia,

2“E tau o fai ne koulua mo Alona se lauga o tino Isalaelu i olotou kaukaiga mo kaiga. Fakamau katoa ki lalo a igoa o tagata

3kola ko luasefulu tausaga o fano ki luga, kola ko tau o kau i kautau.

4Fai atu ki pule taki tokotasi mai kaukaiga takitasi ke fesoasoani atu ki a koe.”

5-16Konei a igoa o tagata, kola ko takitaki i olotou matakaiga takitokotasi, kola ne filifilia mo te galuega tenei:

Te Matakaiga

Pule O Kaukaiga

Leupena

Elisula, te tama tagata a Setulo

Simeona

Selumielu, te tama tagata a Sulisatai

Iuta

Nasona, te tama tagata a Aminatapu

Isakala

Netanelu, te tama tagata a Sualo

Sepulona

Eliapo, te tama tagata a Helona

Efalaima

Elisama, te tama tagata a Amiuta

Manase

Kamalielu, te tama tagata a Petasula

Peniamina

Apitano, te tama tagata a Kiteoni

Tanu

Aiesa, te tama tagata a Amisatai

Asela

Pagielu te tama tagata a Okilani

Kato

Eliasafo, te tama tagata a Teuelu

Nafatali

Aila, te tama tagata a Enanu

17Mai luga i te fesoasoani o te tinogafulu mo te tokolua tagata konei,

18tena ne fakamaopoopo ei ne Mose mo Alona a te fenua katoa i te po muamua o te lua o masina kae fakamau a igoa o tino katoa i olotou kaukaiga mo kaiga. A tagata katoa kola ko luasefulu tausaga o fano ki luga, ko oti katoa ne lau kae fakamau olotou igoa,

19e pela eiloa mo te fakatonuga a te Aliki. I te koga lavaki o Sinai ne fakamau ei ne Mose a igoa o tino.

20-46A tagata mai te luasefulu tausaga o fano ki luga, kola ko tau o kau i kautau, ka fakamau katoa olotou igoa i olotou matakaiga mo kaiga, kae kamata i te matakaiga o Leupena, te ulumatua a Iakopo. Te aofaki katoa penei:

Te Matakaiga

Te Aofaki

Leupena

46,500

Simeona

59,300

Kato

45,650

Iuta

74,600

Isakala

54,400

Sepulona

57,400

Efalaima

40,500

Manase

32,200

Peniamina

35,400

Tanu

62,700

Asela

41,500

Nafatali

53,400

Te aofaki katoa e tusa mo te:

603,550

47A te kau sa Levi e seki fakamau fakatasi olotou igoa mo matakaiga kona,

48me i te Aliki ko oti ne faipati ki a Mose penei,

49“Kafai ko lau ne koe a tagata e tau o kau i kautau, masaua i te kau sa Levi e se aofia i te lauga tena.

50Tuku atu latou ke pule i toku Faleie mo mea katoa i ei. E amo ne latou i taimi e malaga sale ei latou, pela foki mo mea katoa i ei; e tavini latou i loto i ei, ka ko olotou faleie e fakatu fakatamilo i ei.

51I so se taimi e malaga ei koutou, ko te kau sa Levi e tuku ifo ne latou toku Faleie, kae e fakatu foki ne latou i te koga e toe manava ei koutou. So se tino fakaatea aka e fakapilipili mai ki tafa o toku Faleie e tamate.

52A te toega o tino Isalaelu e tau o fakatu olotou faleie i olotou potukau. Ko te takitaki mo tena potukau mo te fuka o latou.

53Ka ko te kau sa Levi e fakatu olotou faleie i tafa o toku Faleie o leoleo ne latou, ko te mea ke seai se tino e fakapilipili ki ei i a au ma kaitaua kae fakaoko toku ita ki te fenua o Isalaelu.”

54Tena ne fai eiloa ne tino Isalaelu a mea kola ne fakatonu ne te Aliki ki a Mose.